Ndiwụt Esịtekọm Nnọ N̄kponn̄kan Enọ Abasi
1. Nso idi akpan ntak emi isinen̄erede ikọm Jehovah?
1 Ke otu ediwak “nti enọ” Jehovah, ufak oro edima Eyen esie ọkọnọde okpon akan. (Jas. 1:17) Enọ emi anam inyene ediwak edidiọn̄, esịnede edifen mme idiọkn̄kpọ nnyịn. (Eph. 1:7) Ke ntak emi, imesikọm enye kpukpru ini. Ke ini Editi, imesinen̄ede ida ini itie ikere iban̄a ọsọn̄urua enọ emi.
2. Didie ke nnyịn ye ubon nnyịn ikeme ndinen̄ede n̄wụt esịtekọm nnọ ufak oro?
2 Nen̄ede Wụt Esịtekọm: Ke mme urua oro ẹdibemde Editi eke March 30 iso, ntak mûdaha ini oro mbufo ẹsinamde Utuakibuot Ubon udụn̄ọde mme n̄kpọ oro ẹban̄ade ufak man an̄wam mbonubon fo ẹnen̄ede ẹwụt esịtekọm ẹnọ ufak oro? N̄ko ẹtie ọtọkiet nte ubon ẹkot san̄asan̄a itie Bible oro ẹsikotde ke ini Editi kpukpru usen. Tie kere ufọn emi afo ọbọde oto ufak oro ye nte enye otụkde se afo ekerede aban̄a Jehovah, idemfo, mbon en̄wen, ye ini iso. Afo oyokụt n̄ko ke ọfọn nditọn̄ọ idahaemi n̄kpep ndikwọ mme ikwọ oro ẹdikwọde ke Editi.—Ps. 77:12.
3. Didie ke ikpowụt esịtekọm oro inyenede?
3 Nte Ẹkpewụtde Esịtekọm: Esịtekọm oro inyenede inọ ufak esinam itịn̄ inọ mbon efen iban̄a Jehovah ye akwa ima emi enye akamade nnyịn ke ndinọ Eyen esie. (Ps. 145:2-7) Ke March, April, ye May, ndusụk ubon ẹsiwụt esịtekọm mmọ ebe ke ndinam ndutịm man ke nsụhọde n̄kaha, owo kiet ke ubon anam utom usiakusụn̄ unọ un̄wam. Edieke ubon mbufo mîkemeke ndinam emi, ndi ẹmekeme ‘ndidedep ifet’ man ẹbuana ke utom ukwọrọikọ ẹkan nte ẹsinamde? (Eph. 5:16) Esịtekọm oro n̄ko ayanam in̄wam mbon efen ẹtiene nnyịn ẹdụk Editi oro. (Edi. 22:17) Tọn̄ọ idahaemi wet enyịn̄ mme mfiakn̄ka, nditọ ukpepn̄kpọ Bible, iman, nsan̄a utom, ye mme mbọhọidụn̄ fo emi oyomde ndikot, nyụn̄ tiene buana ọyọhọ ọyọhọ ke san̄asan̄a ubịnikọt edisuan n̄wedikot Editi.
4. Ke nso usụn̄ ke ikeme ndida ini Editi emi nnam n̄kpọ ọniọn̄ ọniọn̄?
4 Ini Editi esinọ nnyịn mme ifet ndiwụt Jehovah adan̄a nte iwụtde esịtekọm iban̄a enọ emi enye ọkọnọde ubonowo. Nnyịn ikpakam ida ini emi iwụt esịtekọm oro inyenede inọ ufak ye kpukpru “inyene Christ oro ayan̄ade owo ifiọk.”—Eph. 3:8.