Editi Isua Emi An̄wam Nnyịn Iwụt Esịtekọm

1. Nso akpan ifet ke Editi ọnọ nnyịn?

¹ Editi oro ẹdinịmde ke April 14 ọyọnọ nnyịn ifet ndiwụt esịtekọm nnọ Jehovah ke nte enye ọfọnde ido ye nnyịn. Se idude ke Luke 17:11-18 owụt nte esitiede Jehovah ye Jesus ke idem ke ini owo owụtde esịtekọm. Edi owo kiet kpọt ke otu mbon akpamfia duop oro ẹkenamde asana okowụt esịtekọm. Ke ini iso, uwa ufak Jesus ayanam ẹkọk kpukpru orụk udọn̄ọ, ndien emi ayanam ikeme ndidu uwem ke nsinsi. Ndien ini oro, nnyịn iyọkọm Jehovah ke usen ke usen ke nte enye ọdiọn̄de nnyịn. Edi didie ke nnyịn ikeme ndiwụt esịtekọm ke mme urua oro ẹdide?

2. Nso ikeme ndin̄wam nnyịn inyene esịtekọm iban̄a ufak?

² Nyene Esịtekọm: Nditie n̄kere mban̄a n̄kpọ esin̄wam nnyịn inyene esịtekọm. Man an̄wam nnyịn inyene esịtekọm iban̄a ufak oro, ẹsịn san̄asan̄a itien̄wed Bible oro ẹdikotde ke ini Editi ke nsio nsio itie, utọ nte ke appendix B12 ke Edikabade Eke Obufa Ererimbot, nsiondi Ikọmbakara eke 2013, N̄wed Usenọfiọn̄, ye Ẹdun̄ọde N̄wed Abasi ke Usen ke Usen. Ẹtie nte ubon ẹneme n̄kpọ emi. Nnyịn ndinam emi ayanam inen̄ede iwụt esịtekọm iban̄a ufak oro. Emi oyonyụn̄ an̄wam nnyịn idu uwem nte mme Christian.—2 Cor. 5:14, 15; 1 John 4:11.

3. Mme usụn̄ ewe ke ikeme ndiwụt esịtekọm ke ini Editi?

³ Wụt Esịtekọm: Bible ọdọhọ nnyịn iwụt esịtekọm. Emi ọwọrọ ke ana inanam iwụt. (Col. 3:15) Owo emi ẹkenamde akpamfia esie asana ama edisan̄a oyom onyụn̄ ọkọm Jesus. Anaedi enye ama etịn̄ ye idatesịt aban̄a nte Jesus akanamde akpamfia esie asana. (Luke 6:45) Ndi imowụt esịtekọm ikem ndisịn ifịk nnam mme owo ẹdiọn̄ọ ẹnyụn̄ ẹdi ẹdidụk Editi emi? Usụn̄ en̄wen ndiwụt esịtekọm edi ndinam usiakusụn̄ unọ un̄wam m̀mê ndisịn ifịk n̄kwọrọ ikọ ke ini Editi emi. Ke mbubreyo oro ẹdinịmde Editi, esịtekọm oro inyenede ayanam nnyịn idara mbon oro ẹdide Editi inyụn̄ ibọrọ mbụme ekededi oro mmọ ẹbụpde.

4. Nso ke idinam man nnyịn iditua n̄kpọfiọk ke ini Editi emi ebede?

⁴ Ndi akpatre Editi emi idinịmde edidi emi? (1 Cor. 11:26) Nnyịn idiọn̄ọke kan̄a. Edi imọdiọn̄ọ ke ini Editi enye emi ama ebebe, san̄asan̄a ifet oro inyenede ndiwụt esịtekọm nnọ ufak onyụn̄ ebe kan̄a. Ndi ayada ifet emi anam n̄kpọ m̀mê ayayak enye ebe fi? Ẹyak nti ikọ oro nnyịn itịn̄de ye se itiede ikere enem Jehovah esịt, sia enye edi Andinọ ufak.—Ps. 19:14.