“Ndinọ Ọyọhọ Ikọ Ntiense Mban̄a Obio Ubọn̄ Abasi”
1. Nso n̄wed ke nnyịn idikpep ke Ukpepn̄kpọ Bible Esop ọtọn̄ọde ke urua February 13?
1 Ke urua February 13, 2012, iyọtọn̄ọ ndikpep n̄wed “Ndinọ Ọyọhọ Ikọ Ntiense Mban̄a Obio Ubọn̄ Abasi” ke Ukpepn̄kpọ Bible Esop. N̄wed emi eneme n̄wed Utom ke usụn̄ oro andikot ekemede ndikop inem mme aduai-owo-idem n̄kpọntịbe emi ẹdude ke n̄wed emi. Utu ke ndineme mme ufan̄ikọ kiet kiet, n̄wed Ndinọ Ikọ Ntiense owụt se ikemede ndikpep nto mme mbụk oro ẹdude ke n̄wed Utom onyụn̄ an̄wam nnyịn ikụt nte nnyịn ke idem nnyịn ikemede ndida mmọ nsịn ke edinam.—Rome 15:4.
2. Nam ndusụk n̄kpọ oro ẹdude ke n̄wed Ndinọ Ikọ Ntiense ẹn̄wan̄a.
2 Se Idude ke N̄wed Emi: Ke page 2, afo oyokụt inem inem leta oro otode Otu Ukara emi etịn̄de nte mmọ ẹyomde nnyịn ibọ ufọn ito n̄wed emi. Ọtọn̄ọde ke ibuot 2, ekpri udịmikọ odu emi etịn̄de akpan n̄kpọ oro odude ke ibuot oro, ye itie N̄wed Abasi emi owụtde ikpehe n̄wed Utom oro ẹdinemede. Ediwak ibuot ke n̄wed emi ẹnyene mme ekebe oro ẹtịn̄de n̄kpọ ẹban̄a mme owo, mme ebiet, m̀mê mme n̄kpọntịbe oro ẹnemede ẹban̄a. Ẹnịm ufan̄ oro okponde ke mben n̄wed emi man nnyịn ikeme ndiwet mme akpan n̄kpọ. Mme ndise oro ẹnọde ọyọhọ ntọt ẹban̄a mme n̄kpọntịbe ke Bible, oro ẹkemede ndin̄wam nnyịn ikụt mme akpan n̄kpọntịbe ke enyịn ikike ẹdu ke n̄wed emi, ndien ke akpatre page, index ndise odu oro anamde se idude ke nsio nsio ndise ẹn̄wan̄a. Mme n̄wed ndise obio oro ẹdude ke esịt ikpaedem mbiba ẹn̄wam nnyịn ikeme ndida enyịn ikike n̄kụt mme ebiet oro ekemmọ mme andituak ibuot ke eyo mme apostle ẹkekade ke ini mmọ ẹketọn̄ọde ndisuan eti mbụk ‘nsịm ata utịt ikpehe isọn̄.’—Utom 1:8.
3. Mme akpan mbụme ewe ke ẹdibọrọ ke ini idikpepde n̄wed Utom?
3 Mme Akpan Mbụme Oro Ẹbọrọde: Ndikpep n̄wed Utom ayan̄wam nnyịn inen̄ede ifiọk mme akpan mbụme oro ẹbọrọde ẹban̄a utom ukwọrọikọ mme Christian. Ke uwụtn̄kpọ, ewe utom ye etop ẹnam ẹfiọk ata mme anditiene Jesus Christ? Anie ọnọ ndausụn̄ ke utom ukwọrọikọ oro ẹnamde mi ke ofụri ererimbot, ndien didie? Nso ifet ke ukọbọ ye ubiọn̄ọ ẹsiberede ẹnọ mme ọkwọrọikọ? Nso udeme ke edisana spirit enyene ke utom ukwọrọikọ nnyịn?
4. Didie ke ikeme ndinen̄ede mbọ ufọn nto edikpep n̄wed emi?
4 Man ekeme ndinen̄ede mbọ ufọn, bem iso kpep n̄wed emi, nyụn̄ tịm idem man etiene abuana ke ini esop ẹdinemede enye. Dụk kpukpru mbono esop, nyụn̄ kere nte akpadade mme n̄kpọ oro afo ekpepde esịn ke edinam ke an̄wautom. Ndikpep inem inem n̄wed emi akpakam edemede nnyịn udọn̄ ndinọ ọyọhọ ikọ ntiense mban̄a Obio Ubọn̄ Abasi!—Utom 28:23.