Kpebe Mbuọtidem Mmọ
1. Ewe n̄wed ke idikpep ke Ukpepn̄kpọ Bible Esop ọtọn̄ọde ke urua October 19, 2015?
1 Ọtọn̄ọde ke urua October 19, 2015, nnyịn idikpep n̄wed Kpebe Mbuọtidem Mmọ ke Ukpepn̄kpọ Bible Esop. N̄wed emi aban̄a iren ye iban 14 ke Bible oro ẹkebuọtde idem ye Jehovah. Enye anam inen̄ede ifiọk nte n̄kpọ eketiede ye mmọ. Anam ikụt ke mmọ ẹkedi owo nte nnyịn, ẹnyene mme mfịna, ẹnyụn̄ ẹka iso ẹnam n̄kpọ Jehovah. N̄wed emi owụt n̄ko se ikemede ndikpep nto mme owo ke Bible man an̄wam nnyịn idiọn̄ọ nte ikpodude uwem mfịn.—Heb. 6:12.
2. Siak ndusụk n̄kpọ oro ẹdude ke n̄wed Kpebe Mbuọtidem Mmọ.
2 Mme N̄kpọ Emi Ẹdude ke N̄wed Emi: Ẹwet isua emi nsio nsio n̄kpọ eketịbede ye mme ndise obio ke n̄wed emi man an̄wam nnyịn idiọn̄ọ ini emi mme owo kiet kiet okodude ye ebiet emi mmọ ẹkedụn̄de. Kpukpru ibuot ke n̄wed emi ẹnyene ikpehe oro ẹkotde “Kere Ise . . . ,” emi edin̄wamde nnyịn itie ikere se ẹnemede ke mbụk oro ye nte ikpadade se ikpepde idu uwem. Se ikpepde ke n̄wed emi enen̄ede an̄wan̄a nnyịn sia ẹdọn̄ ediwak ndiye ndise emi ẹkedade ini ẹwet.
3. Nso ke ikpanam man ibọ ufọn ito ukpepn̄kpọ n̄wed emi?
3 Nte Ikemede Ndibọ Ufọn: Leta emi otode Otu Emi Ẹsede Ẹban̄a Utom Mme Ntiense Jehovah ke ọyọhọ page iba ọdọhọ nnyịn ete: “Domo ndida enyịn ikike n̄kụt se ẹnemede; yak se ẹnemede an̄wan̄a fi. Yak etie fi ke idem nte eketiede mmọ; domo ndikụt se mmọ ẹkekụtde. Tie kere nte mmọ ẹkenamde n̄kpọ nyụn̄ kere nte afo akpakanamde edieke okpokodude do.” Emi iwọrọke ke ana itie ikere mme n̄kpọ oro mîketịbeke. Edi ọwọrọ ndinam nte idu ke ebiet emi n̄kpọ oro eketịbede inyụn̄ ikere nte eketiede mbon emi ẹtịn̄de ẹban̄a ke idem. Ekpedi mme owo do ẹketua eyet nnyịn itiene itua. Emi oyom isida ini itie ikere n̄kpọ oro ikotde. (Neh. 8:8) Edieke ẹtọn̄ọde ukpepn̄kpọ ke ufọt ufọt ibuotikọ ekededi, owo emi enịmde ukpepn̄kpọ oro ayada sekọn 30 esịm 60 afiak odụn̄ọde se ẹkekpepde ke urua oro ẹkebede. Edieke itie oro ekpepde mînyeneke “Kere Ise . . . ,” andinịm ukpepn̄kpọ oro ekeme ndibụp mbụme kiet m̀mê iba ndida ndụn̄ọde se ẹkpepde usen oro.
4. Ntak emi ọfọnde ikpep n̄wed Kpebe Mbuọtidem Mmọ?
4 Kpukpru usen, mbon ererimbot emi ẹyom ndinam ikûnam n̄kpọ Jehovah nte ikpanamde, mîdịghe ẹnam itetre ndikpono enye. Jehovah ọnọ nnyịn n̄wed emi ye mme ibuotikọ Kpebe Mbuọtidem Mmọ emi ẹkade iso ndiwet ke Enyọn̄-Ukpeme man an̄wam nnyịn inen̄ede ibuọt idem ye enye. (Jas. 1:17) Ẹyak kpukpru nnyịn isidụk Ukpepn̄kpọ Bible Esop kpukpru ini man itie ọtọkiet ikpep n̄wed emi inyụn̄ idomo nditiene nnọ ibọrọ ke ini ẹbụpde mbụme.