‘Yak Ẹnam Enyịn̄ Abasi Asana’
1. Nso idi ibuotikọ ndutịm mbono circuit eke isua 2012, ndien ẹda enye ẹto m̀mọ̀n̄?
1 Edi n̄kpọ ukpono didie ntem ndikere enyịn̄ Akakan Andikara Ekondo, kpa Jehovah! Edi Abasi ke idemesie akada enyịn̄ esie osio nnyịn, ndien akpan akpan ọtọn̄ọde ke isua 1931, ẹda san̄asan̄a enyịn̄ oro Mme Ntiense Jehovah ẹdiọn̄ọ nnyịn. (Isa. 43:10) Jesus, kpa ikpọn̄-ikpọn̄ edibon Eyen Abasi, ama enen̄ede okpono enyịn̄ Abasi, ọnọde enye akpa itie ke akam uwụtn̄kpọ esie. (Matt. 6:9) Ẹda ibuotikọ ndutịm mbono circuit eke isua 2012 ẹto mme ikọ Jesus oro. Enye edi “Yak Ẹnam Enyịn̄ Abasi Asana.”
2. Nso ke idori enyịn ndikop ke mbono emi?
2 Se Idikopde: Ke Saturday, utịn̄ikọ oro “Ẹnam Ẹfiọk Enyịn̄ Abasi nte Mme Asan̄autom Uyọhọ Ini,” eyeneme ntak emi utom uyọhọ ini edide usụn̄ uwem oro ọnọde uyụhọ. Iyokop n̄ko utịn̄ikọ eke ikpehe ke ikpehe emi edide “Kpeme Mbak Udûsuene Enyịn̄ Jehovah,” emi edin̄wamde nnyịn ikeme ndifep mme afia inan̄ oro owo ekemede ndiduọ ndụk. Utịn̄ikọ oro, “Ntak Emi Anade Ẹnam Enyịn̄ Abasi Asana,” ọyọbọrọ mme mbụme emi, Nso idin̄wam nnyịn ikwọrọ ikọ ifịk ifịk idem ke ini mme owo mînen̄ekede inyene udọn̄? ye, Nso idin̄wam nnyịn inam utom ukwọrọikọ nnyịn uforo uforo? Ke Sunday iyokop utịn̄ikọ ikpehe inan̄ emi aban̄ade nte ikemede ndinam enyịn̄ Abasi asana ke ekikere, ikọ, mme ubiere, ye edu uwem nnyịn. Mbufa owo ẹyenen̄ede ẹma utịn̄ikọ an̄wa emi ibuotikọ edide “Jehovah Ayanam Akwa Enyịn̄ Esie Asana ke Armageddon.”
3. Nso ifet ke inyene, ndien didie ke ndutịm emi edin̄wam nnyịn?
3 Ibịghike Jehovah ayanam enyịn̄ esie asana. (Ezek. 36:23) Kan̄a kemi, nnyịn imenyene akwa ifet ndinam akwa enyịn̄ Jehovah asana ke kpukpru usụn̄. Nnyịn imenịm ke ndutịm mbono circuit emi ayan̄wam owo nnyịn kiet kiet ndida mbiomo oro inyenede nte mme andikere enyịn̄ Abasi ke akpan n̄kpọ.