Ana Ẹduọk Mmọn̄ ke N̄kpasịp man Enye Ọkọri
1. Oyom ẹduọk mmọn̄ ke nso man enye ọkọri?
1 Ana ẹduọk mmọn̄ ke n̄kpasịp oro ẹtọde ke in̄wan̄ man enye ọkọri. Kpasụk ntre ke edi ye n̄kpasịp akpanikọ oro itọde ke esịt mme owo ke efakutom nnyịn. (1 Cor. 3:6) Edieke iyomde mme ndamban̄a n̄kpasịp emi ẹdọn̄ n̄kam, ẹkọri, ẹnyụn̄ ẹsehe, ana ifiak ika inyụn̄ ida Ikọ Abasi iduọk mmọ mmọn̄.
2. Didie ke ikeme ndisịn eti itiat idakisọn̄ nnọ mfiakn̄ka?
2 Bụp Mbụme: Ke ini etịmde se edinemede, tịm n̄ko edemede-owo-udọn̄ mbụme oro afo edibọrọde ke ini afiakde aka. Ke utịt nneme fo ke akpa ediwaha, bụp mbụme oro nyụn̄ nam eti ndutịm ndifiak n̄ka. Ediwak owo ẹkụt ke ọfọn ndida mbụme nto n̄wed Bible Ekpep man an̄wam mmọ ẹkeme ndiwụt nte ẹkpenịmde ukpepn̄kpọ Bible.
3. Nso ye nso ke ẹkpewet ke ini ẹwetde n̄kpọ ẹban̄a owo oro enyenede udọn̄?
3 Wet N̄kpọ Nịm: Ke ndondo oro afo ọkpọn̄de owo emi afo ọkwọrọde ikọ ọnọ ke akpa ini, wet n̄kpọ nịm. Wet enyịn̄ ye adres esie. Ọfọn ewet n̄ko usenọfiọn̄ ye ini emi afo eketịn̄de ikọ ye enye, se afo ekenemede, ye n̄wed oro afo ọkọnọde enye, edieke edide ama ọnọ. Ndi enye ama ọdọhọ ke imenyene ido ukpono imọ? Ndi enye enyene ubon? Ndi enye ama etịn̄ se enye amade ye se ifịnade enye? Mme utọ n̄kpọ ntre ẹyen̄wam fi eneme se idide akpan n̄kpọ inọ enye ke ini afiakde aka. Wet n̄ko ini emi afo ekenyịmede ndifiak n̄ka ye mbụme oro afo edibọrọde.
4. Ntak emi ikpesịnde ifịk inam n̄kpọ iban̄a udọn̄ oro ikokụtde?
4 Sịn Ifịk: Satan idikpaha mba ‘nditan̄ ikọ eke ẹkesuande’ ke esịt owo mfep. (Mark 4:14, 15) Mmọdo, kûyak idem emem fi edieke ọsọn̄de fi ndifiak n̄kụt owo emi ekenyenede udọn̄ ke ufọk. Ndi emekeme ndinọ leta ẹsọk enye mîdịghe ewet ekpri n̄kpọ enịm ke enyịnusụn̄ esie? Asiakusụn̄ kiet ama ọtọn̄ọ ukpepn̄kpọ Bible ke enyịnusụn̄ ye n̄wan kiet edi ikekemeke ndikụt enye aba ke ufọk, ntre enye ama ọnọ leta ẹsọk enye. Ke akpatre, ke ini eyenete an̄wan emi okokụtde enye ke ufọk, n̄wan oro ama ọdọhọ ke nte enye ekekerede aban̄a imọ ama enen̄ede otụk imọ. Nte iduọkde mmọn̄ ke n̄kpasịp akpanikọ, esịt ayadat nnyịn ndikụt nte mmọ ẹtịbede, ẹkọride ẹkponi, ẹnyụn̄ “ẹn̄wụmde mfri utịm ikedịp ye duop ye utịm ike-ata ye utịm ikikie.”—Mark 4:20.