Ndifori Usọ Nnyịn ke An̄wautom—Wet Enyịn̄ Mbon Oro Ẹnyenede Udọn̄
“Kpeme idemfo kpukpru ini nyụn̄ kpeme se afo ekpepde owo.” (1 Tim. 4:16) Item eke odudu spirit emi apostle Paul ọkọnọde Timothy mi owụt ke nnyịn ikpenyene ndinam n̄kọri, edide idi mbufa owo m̀mê imodu ibịghi ke esop. Man ikeme ndinam emi, ẹyesimịn̄ ibuotikọ emi “Ndifori Usọ Nnyịn ke An̄wautom” ke Utom Obio Ubọn̄ Nnyịn. Ibuotikọ kiet kiet eyeneme akpan usọ oro oyomde inyene onyụn̄ ọnọ mme ekikere oro ẹdin̄wamde nnyịn inyene enye. Ke ọfiọn̄ oro ẹdinemede akpan usọ emi, ẹsịn udọn̄ ẹnọ kpukpru owo ndinọ akpan ntịn̄enyịn ke nte ẹkpenyenede usọ emi. Ke ọfiọn̄ oro okụrede, iyada ikpehe Esoputom kiet itịn̄ mme ufọn oro ikọbọde ke ndida akpan usọ oro nnam n̄kpọ. Ẹsịn udọn̄ ẹnọ nnyịn ọfiọn̄ emi ndiwet enyịn̄ mbon oro ẹnyenede udọn̄.
Ntak Emi Edide Akpan N̄kpọ: Man inam utom oro ẹdọn̄de nnyịn ima, idịghe ukwọrọikọ kpọt ke inyene ndinam. Ana ifiak ika ibịne mbon oro ẹnyenede udọn̄ ikọduọk mmọn̄ ke n̄kpasịp akpanikọ oro ikọtọde ke ndikpep mmọ n̄kpọ. (Matt. 28:19, 20; 1 Cor. 3:6-9) Emi oyom ifiak ikoyom owo oro ikụt, itịn̄ iban̄a se ibehede enye, inyụn̄ ika iso ke se ikenemede ye enye. Mmọdo, ke ini ikụtde owo oro enyenede udọn̄, ọyọfọn iwet enyịn̄ esie inịm.
Nte Ikpanamde:
• Kụt ete emenyene n̄wed ke ekpat fo ndida n̄wed enyịn̄ owo oro enyenede udọn̄. Yak se ewetde an̄wan̄a onyụn̄ enen. Wet se oyomde ndiwet ndondo owo okụrede nneme ye enyeneufọk.
• Wet n̄kpọ ban̄a enyeneufọk oro. Wet enyịn̄ esie ye ebiet emi ekemede ndisobo ye enye, utọ nte adres ufọk, nọmba fon, m̀mê e-mail. Nso ke ọdiọn̄ọ aban̄a owo emi ye ubon esie emi edin̄wamde fi?
• Wet se ekenemede ye enye ke nde ke nde. Ewe itien̄wed ke afo okokot? Enye ọkọdọhọ ke nso ke inịm ke akpanikọ? Ewe n̄wed ke ọkọnọ enye? Wet ini ye usen oro okosobode ye enye.
• Wet se aduakde ndinam ini efen emi edifiakde aka. Afo ọkọdọhọ ke idineme nso ima ifiak idi? Ọkọdọhọ ke idifiak ika nso usen?
• Wet mbufa n̄kpọ ini ekededi oro afiakde aka. Idiọk idụhe ndiwet n̄kpọ awak mban̄a enyeneufọk.
Nam Emi Ọfiọn̄ Emi:
• Ke ini ewetde n̄kpọ, tịn̄ se ewetde nọ mbon emi ẹsan̄ade ye afo.