‘Yak Uduak Abasi Ada Itie’
1. Nso idi ibuotikọ ndutịm usen akpan mbono eke isua 2012, ndien ntak emi odotde nnyịn ineme ibuotikọ emi?
1 Ẹkebot nnyịn man inam uduak Jehovah. (Edi. 4:11) Ntem, edieke nnyịn mîkpepke mînyụn̄ inamke uduak Abasi, nnyịn idinamke se ẹkebotde nnyịn ẹnọ. Emi idịghe mmemmem n̄kpọ, sia inyene ndin̄wana mbiọn̄ọ udọn̄ edinam “mme n̄kpọ oro obụkidem ye ekikere nnyịn ẹduakde” m̀mê ndinam “se idide uduak mme idụt.” (Eph. 2:3; 1 Pet. 4:3; 2 Pet. 2:10) Ke mîkpedịghe un̄wam Abasi, ‘Devil okpomụm nnyịn ye uwem ete inam uduak imọ.’ (2 Tim. 2:26) Ndutịm usen akpan mbono nnyịn eke isua 2012 ayan̄wam nnyịn owo kiet kiet inam n̄kpọ ekekem ye ọyọhọ eben̄e ita oro odude ke akam uwụtn̄kpọ, oro edi, “yak uduak fo ada itie.”—Matt. 6:9, 10.
2. Mme mbụme ewe ke ẹdibọrọ ke ndutịm mbono emi?
2 Mme Mbụme Oro Ẹdibọrọde: Nte mbufo ẹkpan̄de utọn̄ ẹnọ ndutịm oro, ẹyom mme ibọrọ mbụme emi: Nso idi akpan n̄kpọ ukem nte edikop Ikọ Abasi? Didie ke ikeme ndika iso mfiọk se uduak Abasi edide ọnọ nnyịn? Ntak emi oyomde inyịme ndikwọrọ ikọ nnọ kpukpru orụk owo? Didie ke ikeme ndidu uwem oro enyenede uduak? Mme uyen, nso ke ana mbufo ẹnam ẹwụt Jehovah? Mme utịp ewe ke mbon oro ẹnamde uduak Abasi ẹbọ? Ntak emi oyomde idọdiọn̄ in̄wam inyụn̄ isịn udọn̄ inọ mbon en̄wen?
3. Didie ke ikeme ndibọ ọyọhọ ufọn nto ndutịm eke spirit emi?
3 Ẹkụt ẹte ẹmedụk ẹnyụn̄ ẹnọ ọyọhọ n̄kpan̄utọn̄ ke ndutịm emi. Eyedi owo ubon Bethel m̀mê esenyịn oro asan̄ade-san̄a oyodụk mbono emi nte etịn̄ikọ oro otode-to edi. Ẹkûmen̄e ndinyene nneme ye enye ye n̄wan esie, edieke edide enye ọdọ ndọ, mbemiso ndutịm ọtọn̄ọde ye ke ndutịm ama okokụre. Ke ini ẹnyọn̄de ẹsịm ufọk, ẹkûdi ‘mme andikokop eke ẹfrede,’ edi ẹdụn̄ọde ndutịm oro nte ubon ẹnyụn̄ ẹneme nte ẹkemede nditịm nnam n̄kpọ ekekem ye uduak Abasi.—Jas. 1:25.
4. Ntak emi edide akpan n̄kpọ nnyịn ndida edinam uduak Abasi nte ebeiso n̄kpọ?
4 Ibịghike ẹyesobo mbon oro ẹnamde mme udọn̄ idemmọ ẹnyụn̄ ẹsịnde ndinam uduak Jehovah. (1 John 2:17) Mmọdo nnyịn imenem esịt ke Jehovah ọmọnọ ekemini ntọt emi man an̄wam nnyịn ida edinam uduak Abasi nte ebeiso n̄kpọ!