Ikọ Abasi Ọfọn Ndida Nnọ Ukpep

1. Nso idi ibuotikọ mbono circuit eke 2014, ndien mbụme ewe ke ẹdibọrọ ke mbono oro?

¹ Jehovah emi edide “Akwa Anditeme” nnyịn edi akakan andikpep. (Isa. 30:20, 21) Edi, didie ke Jehovah esikpep nnyịn n̄kpọ? Enye ọnọ nnyịn n̄wed emi akande kpukpru n̄wed, oro edi, Ikọ esie oro ẹkedade odudu spirit esie ẹwet, kpa Bible. Didie ke ukpepn̄kpọ Abasi ekeme ndinọ nnyịn ufọn ke n̄kan̄ eke obụk, eke ekikere, ye ke n̄kan̄ eke spirit, onyụn̄ anam ikop inemesịt? Ẹyebọrọ mbụme emi ke edinam mbono circuit nnyịn eke 2014. Ibuotikọ mbono emi edi, “Ikọ Abasi Ọfọn Ndida Nnọ Ukpep,” ẹnyụn̄ ẹda enye ẹto 2 Timothy 3:16.

2. Mme ibọrọ mbụme ewe ẹdisio mme akpan n̄kpọ ke mbono emi ẹwụt?

² Yom Mme Akpan N̄kpọ Emi: Ibọrọ oro ẹdinọde ke mme mbụme oro ẹtienede mi ẹyesio mme akpan n̄kpọ ke mbono emi ẹwụt:

• Nso ufọn ke ukpepn̄kpọ Abasi enyene ke uwem nnyịn? (Isa. 48:17, 18)

• Nso ke ẹn̄wọn̄ọ ẹnọ nnyịn edieke inamde mme ukpụhọde ke ndutịm nnyịn man ikeme ndinam n̄kpọ Jehovah ofụri ini? (Mal. 3:10)

• Nso ke ikpanam iban̄a “esen ukpepn̄kpọ” ekededi? (Heb. 13:9)

• Didie ke ikeme ndikpebe ‘usụn̄ nte Jesus ekesikpepde owo n̄kpọ’? (Matt. 7:28, 29)

• Ntak emi mme andikpep ke esop ẹkpekpepde idemmọ? (Rome 2:21)

• Ikọ Abasi ọfọn ndida nnam nso? (2 Tim. 3:16)

• Mme owo ẹnam n̄kpọ didie ke ini ‘ẹnyen̄ede’ mme idụt? (Hag. 2:6, 7)

• Jehovah enịm ke nnyịn ikeme ndinam nso? (Eph. 5:1)

• Ntak emi anade isịn ofụri ukeme imụm ukpepn̄kpọ Jehovah ikama? (Luke 13:24)

3. Ntak emi edide akpan n̄kpọ nnyịn ndidụk mbon emi nnyụn ntịm nnọ n̄kpan̄utọn̄?

³ Esisịt ini mbemiso Paul ewetde mme ikọ emi ẹdide ibuotikọ mbono emi ke 2 Timothy ibuot 3, enye ama etịn̄ aban̄a ndiọi n̄kpọ oro ẹdidude ke mme akpatre usen emi. Enye ekewet ete: “Mme idiọkowo ye mbon abian̄a ẹyedọdiọn̄ ẹdiọk ẹka iso, ẹbian̄a owo, owo onyụn̄ abian̄a mmọ.” (2 Tim. 3:13) Edi akpan n̄kpọ nnyịn ndikpan̄ utọn̄ nnọ ukpepn̄kpọ Abasi nnyụn̄ nnam se ẹkpepde man ẹkûbian̄a nnyịn. Mmọdo, ẹyak ibiere ndidụk mbono emi nnyụn ntịm nnọ n̄kpan̄utọn̄.