Kûkere ke Udûkemeke—Nte Ẹkpekande Mme N̄kpọ Oro Mîsiyakke Ẹnyene Ini
1. Ntak emi ndusụk owo mîsisọpke idiomi ndinịm ukpepn̄kpọ Bible ye mme owo?
1 Ndusụk owo isisọpke idiomi ndinịm ukpepn̄kpọ Bible ye mme owo sia mmọ mîdinyeneke ini ndinịm ukpepn̄kpọ oro. Ndise mban̄a eyen ukpepn̄kpọ Bible esida ini. Oyom ẹda ini ẹtịm idem ẹnọ ukpepn̄kpọ, ẹnịm ukpepn̄kpọ, ẹnyụn̄ ẹn̄wam eyen ukpepn̄kpọ akan mme mfịna oro enye enyenede. Apostle Paul ọkọdọhọ ke imọ ima iyak ukpọn̄ imọ inọ ndida n̄n̄wam mbon Thessalonica ẹfiọk Jehovah. (1 Thess. 2:7, 8) Didie ke ikeme ndinịm ukpepn̄kpọ Bible idem ọkpọkọm nnyịn inyeneke ini?
2. Didie ke idida ini nnyịn inam n̄kpọ edieke imade Jehovah?
2 Ndinam N̄kpọ Jehovah Esiyom Ini: Edi akpanikọ nte ke ndinam n̄kpọ Jehovah esiyom ini. Ke uwụtn̄kpọ, esiyom ini man idụk mme mbono esop, iwọrọ an̄wautom, ikot Bible, inyụn̄ ibọn̄ akam, kpukpru ini. Ọdọ ndọ oro mînyeneke ini oyokop inemesịt ndisio ini nnịm man odu ye n̄wan m̀mê ebe esie. Nnyịn n̄ko ikpenyene ndikop inemesịt ‘ndep ifet’ nnam mme n̄kpọ emi sia imade Jehovah. (Eph. 5:15-17; 1 John 5:3) Jesus ọkọdọhọ ke akpan ikpehe kiet ke utuakibuot nnyịn edi ndinam mme owo edi mbet. (Matt. 28:19, 20) Nnyịn nditie n̄kere n̄kpọ emi ayan̄wam nnyịn ikûtre ndinịm ukpepn̄kpọ Bible ye mme owo.
3. Didie ke ikeme ndise mban̄a eyen ukpepn̄kpọ Bible nnyịn idem ke ini nnyịn mîkemeke ndiwọrọ an̄wautom?
3 Edi nso ke ikpanam edieke utom idịbi udia, uyịre uyịre udọn̄ọ, m̀mê mme utom esop eken mîyakke nnyịn inyene ini? Ndusụk mme asuanetop oro mîsidụhe ke ufọk ke ndusụk ini ẹsida fon m̀mê kọmputa ẹnịm ukpepn̄kpọ Bible. Mbon oro uyịre uyịre udọn̄ọ mîyakke ẹwọrọ an̄wautom ẹsidiomi man eyen ukpepn̄kpọ edi ufọk mmọ edikpep n̄kpọ. Ndusụk owo ẹsidiomi man asuanetop en̄wen oro mmọ ẹkemede ndiberi edem esin̄wam enịm ukpepn̄kpọ mmọ ke ini mmọ mîdụhe.
4. Mme edidiọn̄ ewe ke idinyene edieke ikpepde mme owo Bible?
4 Paul ndida ini ye odudu esie n̄n̄wam mbon en̄wen ẹfiọk akpanikọ ama anam enye enen̄ede okop idatesịt. (Utom 20:35) Ke ini enye ekekerede aban̄a kpukpru mbon oro enye akan̄wamde ke Thessalonica, emi ama anam enye ọkọm Jehovah. (1 Thess. 1:2) Imekeme ndinen̄ede n̄kop idatesịt ke utom ukwọrọikọ nnyịn edieke nnyịn mîyakke unana ini anam nnyịn itre ndikpep mme owo Bible.