Kûmen̄e!
1. Ke nso usụn̄ ke nnyịn ‘mîsịnke ndida eti n̄kpọ’ nsọk mme owo?
1 Ebede ke ndibuana ifịk ifịk ke editan̄a eti mbụk Obio Ubọn̄ Abasi, nnyịn ‘isịnke ndida eti n̄kpọ’ nsọk mbon oro ẹdude ke efakutom nnyịn. (N̄ke 3:27) Idụhe etop oro ọfọnde akan edinam mme owo ẹfiọk nte ke n̄kpọ ọyọfọn ke idak ukara Abasi. Okposụkedi afo ekemede ndinen̄ede mbuana idotenyịn Obio Ubọn̄ ebe ke ndikwọrọ ikọ ke ido nneme m̀mê ke ndinịm mme n̄wed, ntak mûnamke edi utịtmbuba fo ndinịm ukpepn̄kpọ Bible edieke mûnamke ntre kan̄a?
2. Nso ikeme ndinam nnyịn imen̄e nditọn̄ọ ukpepn̄kpọ Bible?
2 Ke ndusụk idaha, kiet ke otu n̄kponn̄kan n̄kpọ oro esibiọn̄ọde nnyịn ndinịm ukpepn̄kpọ Bible edi nte nnyịn isede enye. Ndusụk owo ẹsimen̄e ndinịm ukpepn̄kpọ Bible ke ntak oro mmọ ẹkerede ke mmimọ ikemeke ndinam emi m̀mê ke ntak oro mmọ mînen̄ekede inyene ini. Mme ekikere oro ẹtienede mi ẹkeme ndin̄wam fi etre ndimen̄e ndibuana ke utom edikpep mme owo Bible.—Matt. 28:19; Utom 20:20.
3. Ntak emi nnyịn idotde ndikpep mbon en̄wen Bible?
3 Ndikere ke Imọ Ikemeke: Ekeme ndidi afo ukunen̄ekede uka n̄wed m̀mê ke ndusụk ntak eken ekere ke imọ ikemeke ndinịm ukpepn̄kpọ Bible. Mme asan̄autom Christian oro ẹkekụtde unen ke akpa isua ikie ẹkedi mmọ emi “mîfiọkke n̄wed ye mme usụhọde owo.” Nso ikanam mmọ ẹkeme ndikpep mbon en̄wen akpanikọ? “Mmọ ẹkesidu ye Jesus.” (Utom 4:13) Mmọ ẹma ẹkpep n̄kpọ ẹto Akwa Andikpep, kpa Jesus, ndien ẹma ẹwet mme n̄kpọ oro enye ekesikpepde ye mme usụn̄ oro enye ekesikpepde mmọ ke N̄wed Abasi ẹnọ nnyịn. Idem ọkpọkọm ukunen̄ekede uka n̄wed, afo ke ọbọ ukpep ke n̄kan̄ eke spirit, ndien ukpep emi ọfọn akan ukpep efen ekededi.—Isa. 50:4; 2 Cor. 3:5.
4. Nso ke nnyịn ikeme ndikpep nto uwụtn̄kpọ Amos?
4 Ndusụk ini Jehovah ama esida mme prọfet asua ọnọ mme andikara m̀mê mbon eken oro ẹkedude ke ikpọ itie, emi ẹkenamde ndudue. Ndusụk mmọ, utọ nte Amos, ikedịghe mme ọwọrọiso owo. Amos ọkọdọhọ ete: “Ami ndịghe prophet, ami nnyụn̄ ndịghe eyen prophet; koro ami ndide ekpeme-erọn̄ ye ekịbi mfri eto sycamore.” (Amos 7:14) Kpa ye oro, Amos ikemen̄eke nditan̄a etop ubiomikpe Jehovah nnọ Amaziah, kpa oku emi ekesituakde ibuot ọnọ eyenenan̄. (Amos 7:16, 17) Ana nnyịn iti kpukpru ini nte ke inam utom Abasi ye nte ke enye ayanam nnyịn itịm idot ndinam utom esie.—2 Tim. 3:17.
5. Ntak emi nnyịn ikpesịnde ukeme nditọn̄ọ ukpepn̄kpọ Bible idem ọkpọkọm nnyịn inen̄ekede inyene ini-e?
5 Ndikere ke Imọ Inen̄ekede Inyene Ini: Idem ọkpọkọm afo unen̄ekede unyene ini, eyedi afo omosio ini enịm man esida abuana ke an̄wautom kpukpru ini. Ndinịm ukpepn̄kpọ Bible ekeme ndidi kiet ke otu ikpehe utom ukwọrọikọ oro enemde etieti. Edi akwa ifet ndikụt nte Ikọ Jehovah anamde utom ke idem owo. (Heb. 4:12) Jehovah esinem esịt ndikụt nnyịn inamde n̄waidem man in̄wam owo enyene “nnennen ifiọk akpanikọ.” (1 Tim. 2:4) Idem mme angel ẹsidat esịt ke ini owo akabarede esịt ọkpọn̄ akani usụn̄ uwem esie onyụn̄ anamde n̄kọri ke n̄kan̄ eke spirit.—Luke 15:10.
6. Nso akpan ifet ke nnyịn inyene ndinam uduak Abasi?
6 ‘Edi uduak Abasi nte kpukpru orụk owo ẹnyene edinyan̄a ẹnyụn̄ ẹsịm nnennen ifiọk akpanikọ.’ (1 Tim. 2:4) Nso akpan ifet ke nnyịn inyene ntem ndinam utom ke n̄kemuyo ye uduak Abasi, itrede ndimen̄e ndinịm mme ukpepn̄kpọ Bible!