Ẹtịm Ikpehe Intanet Nnyịn ke Ufọn Nnyịn ye Mbon En̄wen
Jesus okowụk nnyịn ete ikwọrọ eti mbụk Obio Ubọn̄ ‘ke ofụri isọn̄ nte ntiense inọ kpukpru mme idụt.’ (Matt. 24:14) Man an̄wam nnyịn ‘inam utom nnyịn ọyọhọ ọyọhọ ima,’ ẹtan̄ se idude ke watchtower.org, jw-media.org, ye jw.org ẹdọn̄ kiet ke obufa ikpehe Intanet jw.org.—2 Tim. 4:5.
“Ofụri Isọn̄”: Edieke ẹbaharede mme andidụn̄ isọn̄ ke itie ita, mbahade kiet ẹsika Intanet ẹkekot n̄kpọ. Intanet amakabade edi akpan ebiet oro ediwak owo, akpan akpan mme uyen, ẹkade ẹkeyom ntọt oro mmọ ẹyomde mfịn. Ikpehe Intanet nnyịn ayanam mbon oro ẹkade ẹkeyom n̄kpọ ke Intanet ẹnyene nnennen ibọrọ ke mme mbụme oro ẹbụpde ẹban̄a Bible. Enye anam mmọ ẹdiọn̄ọ n̄kpọ ẹban̄a esop Jehovah onyụn̄ anam emem mmọ utom ndisịn eben̄e ndọhọ owo edikpep mmimọ Bible ke mfọn. Enye anam eti mbụk esịm mme ebiet oro mme owo mîsinyeneke ifet ndikop etop Obio Ubọn̄.
“Kpukpru Mme Idụt”: Man ẹkeme ndinọ “kpukpru mme idụt” ikọ ntiense, ana nnyịn inam akpanikọ Bible esịm mme owo ke nsio nsio usem. Mbon oro ẹkemede ndidụk jw.org ẹkeme ndikụt mme ntọt ke n̄kpọ nte usem 400, ẹkan nte ẹkụtde ke ikpehe Intanet efen ekededi.
Da Enye Nam N̄kpọ Nte Ọfọnde: Owo itịmke obufa ikpehe Intanet jw.org ndida nnọ mbon oro mînịmke ke akpanikọ ikọ ntiense kpọt. Ẹtịm enye man Mme Ntiense Jehovah ẹda enye ẹnam n̄kpọ n̄ko. Edieke ekemede ndidụk Intanet, nnyịn imesịn udọn̄ inọ fi ite emehe ye se idude ke jw.org. Se itienede mi ẹdi ndusụk usụn̄ oro ẹkpedade enye ẹnam n̄kpọ.
[Ndise ke page 3]
(Ama oyom ndikụt nte enye enen̄erede etie, se n̄wed)
Domo Ndinam Emi
1 Wet www.pr418.com ke ufan̄ oro esiwetde enyịn̄ ikpehe Intanet oro oyomde ndidụk ke kọmputa fo.
2 Ka nsio nsio itie ke ikpehe oro ke ndifịk nsio nsio ibuotikọ, mme n̄kpọ oro ẹdude ke idak ibuotikọ oro, ye mme ebiet emi ẹkemede ndikụt mmọ.
3 Domo ndida n̄kpọ ekededi emi ẹkemede ndida ndụk Intanet ndụk jw.org. Edieke n̄kpọ emi adade odụk Intanet edide ekpri, se edikụtde ẹdidi n̄kpri n̄kpri, edi oyokụt kpukpru n̄kpọ.