Da jw.org Kwọrọ Ikọ —“Di Ufan Jehovah”

Edieke odụkde jw.org/efi aka SE BIBLE EKPEPDE > NDITỌWỌN̄, oyokụt “Di Ufan Jehovah.” Do ke edikụt mme vidio, mme ikwọ, ye mme edinam. Ndi emesida se idude do ọkwọrọ ikọ? Edieke ekpepde owo emi enyenede n̄kpri nditọ n̄kpọ, wụt enye se idude do. Emi ekeme ndinam enye aka mme itie en̄wen ke jw.org.

Ke ini ẹkenọde mme owo Mbụk Obio Ubọn̄, Ọyọhọ 38, eyenete kiet ama ọnọ mma kiet idem kiet, ndien mma oro ama ọsọsọp ọtọn̄ọ ndikọt. Nditọ mma oro ẹma ẹma se idude ke tract oro. Ntre eyenete oro ama etịn̄ ekpri n̄kpọ aban̄a tract oro onyụn̄ owụt enye jw.org emi ewetde ke edem tract oro. Sia enye okokụtde ke mma oro ama se idude ke tract oro, enye ama ada fon esie owụt enye ye nditọete esie vidio Kokoete kiet.

Eyenete an̄wan kiet ama owụt owo itieutom mmọ emi enyenede n̄kpri nditọ jw.org, onyụn̄ owụt enye ikpehe oro ẹnamde ẹnọ ubon. Owo itieutom mmọ oro ama etie ye nditọ esie ese se idude ke jw.org. Nte ini akakade, enye ama ọdọhọ eyenete nnyịn ete ke kpukpru ini idahaemi ke nditọ imọ ẹsikwọ “Kwọrọ Ikọ,” kiet ke otu ikwọ emi odude ke “Di Ufan Jehovah.”

Ndi emesika jw.org kpukpru ini okosion̄o mme vidio, mme ikwọ, ye mme edinam ọdọn̄ ke fon m̀mê ke tablet fo? Emi ayanam ekeme ndida mmọ n̄kwọrọ ikọ. Ata eti n̄kpọ emi edin̄wamde nnyịn idụk ufụn inọ Ọbọn̄ edi emi!—Utom 20:19.