Dara Mmọ!

1. Ewe edinam esinam nnyịn inyene ata eti ifet ndinọ ikọ ntiense, ndien ntak-a?

¹ Idụhe edinam emi anamde nnyịn inyene ifet ndinọ ikọ ntiense nte Editi emi isinịmde kpukpru isua. Kere ban̄a emi ise: Isua emi, idori enyịn ite ke se ibede isenowo miliọn duop ẹdidụk Editi ẹnyụn̄ ẹkpan̄ utọn̄ ẹkop akakan ima iba oro akanam ẹwụtde, ebe ke ufak. (John 3:16; 15:13) Ẹyesian mmọ mme edidiọn̄ emi mmọ ẹkemede ndinyene ke ntak enọ emi Jehovah ọnọde nnyịn. (Isa. 65:21-23) Edi, idịghe etịn̄ikọ ikpọn̄ edinọ ikọ ntiense ke edinam emi. Kpukpru mbon emi ẹdụkde Editi ẹyenyene ifet ndinọ akwa ikọ ntiense edieke mmọ ẹdarade isenowo.—Rome 15:7.

2. Didie ke ikeme ndidara isenowo?

² Utu ke ndiyom itie ntetie nnyụn̄ mbet edinam ọtọn̄ọ, da ifet oro tọn̄ọ nneme ye mbon emi ẹtiede ẹkpere fi. Sia isenowo mîfiọkke se nnyịn idinamde, mmọ ekeme ndikere m̀mê n̄kpọ editetie didie. Nnyịn ndituak inua imam nnyụn̄ n̄kọm mmọ ufan ufan ayanam enem mmọ ke idem. Man ọfiọk m̀mê esenowo edi ke ntak n̄wedikot emi ẹkenọde enye, afo emekeme ndibụp enye m̀mê akpa ini emi enye odụkde mbono esop nnyịn edi emi mîdịghe obụp enye m̀mê enye ọdiọn̄ọ owo ke esop nnyịn. Afo emekeme ndidọhọ enye editie ye afo onyụn̄ abuana Bible ye n̄wedikwọ fo. Edieke ẹnịmde Editi ke Ufọkmbono Obio Ubọn̄, emekeme ndida esisịt ini emen enye owụt Ufọkmbono Obio Ubọn̄. Ke ẹma ẹkekụre utịn̄ikọ, dọhọ enye ke imekeme ndibọrọ mbụme oro enye enyenede. Edieke anade esop mbufo ẹsọsọp ẹkpọn̄ Ufọkmbono Obio Ubọn̄ man esop efen ẹtọn̄ọ ekemmọ, afo emekeme ndidọhọ enye ete: “N̄kpama ndikop se afo ekerede aban̄a edinam emi. Ndinam didie mfiak nsobo ye afo?” Ekem nam ndutịm man afiak okosobo ye enye. Mbiowo ẹkpenyene ndidu ke mben̄eidem man ẹsịn udọn̄ ẹnọ mme asuanetop oro mîwọrọke an̄wautom aba, emi ẹdụkde Editi.

3. Ntak emi nnyịn ndidara isenowo emi ẹdide Editi edide akpan n̄kpọ?

³ Akpa ini emi ediwak isenowo ẹdikụtde idatesịt, emem, ye edidianakiet emi odude ke otu ikọt Jehovah edidi emi. (Ps. 29:11; Isa. 11:6-9; 65:13, 14) Nso ke mmọ ẹditi? Nte ididarade mmọ edibiere emi.