Dara Isenowo

Ke March 23, n̄kpọ nte isenowo miliọn 12 m̀mê awakde akan oro ẹyetiene nnyịn ẹdụk Editi n̄kpa Christ. Se etịn̄ikọ edinemede usen oro ayanam isenowo emi ẹfiọk akakan enọ emi Jehovah ọnọde nnyịn, oro edi, ufak emi osiode nnyịn ke idiọkn̄kpọ ye n̄kpa. Etịn̄ikọ oyonyụn̄ anam mmọ ẹfiọk mme ufọn en̄wen emi enọ Abasi emi edinamde inọ nnyịn. (Isa 11:6-9; 35:5, 6; 65:21-23; Joh 3:16) Idịghe etịn̄ikọ kpọt edin̄wam isenowo emi ẹdiọn̄ọ Abasi, kpukpru nnyịn imekeme nditiene nnam emi edieke itịmde idara mmọ. (Ro 15:7) Se nte ikemede ndinam emi mi.

• Utu ke ndisụhọde ntie ke n̄kpọitie fo mbet ini emi edinam editọn̄ọde, tiene dara isenowo ye mbon oro mîwọrọke an̄wautom aba. Kọm mmọ ufan ufan nyụn̄ wụt ke esịt enem fi ndikụt mmọ

• Kpa ye oro mînaha afo efre mme ufan ye iman emi afo okokotde, ọfọn etiene ese m̀mê oyokụt owo emi odụkde edinam emi ke ntak n̄wedikot emi enye ọkọbọde. Dọhọ enye editie ye afo. Buana Bible ye n̄wedikwọ fo ye enye

• Ke edinam emi ama akasuana, bọrọ mbụme ekededi oro enye enyenede. Edieke ini mîdụhe ndida mbọrọ mbụme esie sia ẹyomde ndikpọn̄ ebiet oro nnọ esop en̄wen ẹda ẹnịm Editi n̄ko, dọhọ enye ke iyedi ufọk esie idibọrọ mbụme esie. Mbọk sọsọp ka bịne enye. Edieke mûdiọn̄ọke ufọk m̀mê nọmba fon esie, emekeme ndidọhọ enye ete: “N̄kpama ndidiọn̄ọ se afo ekerede aban̄a edinam emi. Mbọk ndinam didie mfiak n̄kụt fi?”