Da Ikpehe Intanet Nnyịn Kpep Nditọ Fo N̄kpọ
1. Ntak emi ẹsịnde ikpehe oro ẹnemede n̄kpọ aban̄a “Nditọwọn̄” ke ikpehe Intanet nnyịn?
1 Ẹtịm ikpehe Intanet jw.org/efi nnyịn ke ufọn kpukpru owo, n̄kpri ye ikpọ. Ikpehe Intanet oro ẹnemede n̄kpọ aban̄a “Nditọwọn̄” (ka Se Bible Ekpepde > Nditọwọn̄) an̄wam mme uyen ye mme ete ye eka mmọ ẹkpere kiet eken ẹnyụn̄ ẹkpere Jehovah. (Deut. 6:6, 7) Didie ke afo ekeme ndida ikpehe emi n̄kpep nditọ fo n̄kpọ?
2. Didie ke afo ekeme ndimek ukpepn̄kpọ oro odotde ye isua emana nditọ fo?
2 Ka Nsio Nsio Ikpehe: Nditọwọn̄ ẹsima n̄kpọ nsio nsio. (1 Cor. 13:11) Didie ke afo ekeme ndimek ukpepn̄kpọ oro odotde ye isua emana nditọ fo? Bụp idemfo ete: ‘Nso ke nditọ mi ẹdima? N̄kpọ ifan̄ idin̄wan̄a mmọ? Mmọ ẹkeme ndinọ n̄kpan̄utọn̄ ẹbịghi adan̄a didie?’ Edieke enyenede nditọ emi mîbehe isua 3, emekeme ndineme ye mmọ mme mbụk oro ẹdude ke “Ukpepn̄kpọ N̄kpri Nditọ.” Mme ubon eken ẹsima mme mbụk Bible oro ẹdude ke “Kpep Nditọ Fo.” Mîdịghe, se mme ikpehe eken oro ẹtienede mi.
3. Didie ke mme ete ye eka ẹkpeda mme mbụk ye mme edinam oro ẹdude ke “Se Ẹkpenamde ke Ini Utuakibuot Ubon” ẹnam n̄kpọ uforo uforo?
3 Se Ẹkpenamde ke Ini Utuakibuot Ubon: Ẹnam ikpehe enye emi ndin̄wam mme ibuot ufọk ẹkpep nditọ mmọ n̄kpọ. Man ọfiọk nte akpadade mme mbụk ye mme edinam oro anam n̄kpọ, fịk itie oro ẹwetde sion̄o, nyụn̄ kot “Item Ẹnọde Mme Ete ye Eka” ke edinam kiet kiet. Da ndise ẹdade ẹkpep n̄kpọ, utọ nte ndise oro oyomde ẹ-kọlọ, kpep n̄kpri nditọ n̄kpọ. N̄wam nditọwọn̄ oro ẹkponide ẹkan isua ita ẹka itie oro ẹwetde “mme n̄kpọ ndida n̄kpep n̄kpọ” ẹkewet n̄kpọ ẹyọhọ ufan̄ oro ẹdude. Kpukpru edinam ke ikpehe kiet kiet ẹban̄a ukem mbụk Bible m̀mê ukem ukpepn̄kpọ, ntre kpukpru nditọwọn̄ inamke n̄kpọ m̀mê mmọ ẹdi isua ifan̄, ẹkeme nditiene nnam ukem n̄kpọ ke ini utuakibuot ubon.
4. Nso idu ke ikpehe “Di Ufan Jehovah”?
4 Di Ufan Jehovah: Mme vidio, mme ikwọ, ye mme edinam oro ẹdude ke ikpehe Intanet nnyịn enye emi ẹsin̄wam mme ete ye eka ẹdọdiọn̄ ẹkpep n̄kpri nditọ mmọ Ikọ Abasi. (Deut. 31:12) Mbio mbio vidio cartoon kiet kiet ekpep ata akpan n̄kpọ. Mme utọ edinam nte mbre uyom n̄kpọ n̄kụt ẹwụt mme ufọn oro ukpepn̄kpọ enyenede. Sia nditọwọn̄ ẹsimade ndikwọ ikwọ—ikwọ esinyụn̄ anamde mmọ ẹti se ẹkekpepde—mme ikwọ Obio Ubọn̄ ye mme ikwọ oro ẹwetde akpan akpan ẹnọ nditọwọn̄ ẹdu kpukpru ini ke ikpehe Intanet nnyịn.
5. Ntak emi mme ete ye eka ẹkpeben̄ede Jehovah ẹte an̄wam mmimọ ikpep nditọ mmimọ akpanikọ?
5 Mme ete ye eka, Jehovah oyom mbufo ẹkụt unen. Ntre, ẹben̄e enye an̄wam mbufo ẹkpep nditọ mbufo akpanikọ. (Judg. 13:8) Jehovah ayan̄wam mbufo ẹkpep nditọ mbufo n̄kpọ man mmọ ẹnyene “ọniọn̄ emi adade esịm edinyan̄a ebe ke edibuọt idem ye Christ Jesus.”—2 Tim. 3:15; N̄ke 4:1-4.