‘Yak Mme Ikọ Emi Ẹdu Fi ke Esịt’

Mme ete ye eka ẹtie nte mme ekpemerọn̄. Ana mmọ ẹnen̄ede ẹse ẹban̄a nditọ mmọ, sia nditọ mmọ ẹkeme ndisọp nsop usụn̄ nnyụn̄ nduọ ndụk ubọk mme idiọkowo. (N̄ke 27:23) Nso idin̄wam mmọ ẹnam emi? Ana mmọ ẹsineme nneme ye nditọ mmọ kpukpru usen man mmọ ẹfiọk se idude nditọ mmọ ke esịt. (N̄ke 20:5) Ana mme ete ye eka ẹnyụn̄ ẹn̄wam nditọ mmọ ẹnyene mbuọtidem emi n̄kpọ ndomokiet mîkemeke ndibiat. (1 Cor. 3:10-15) Vidio emi ‘Yak Mme Ikọ Emi Ẹdu Fi ke Esịt,’ owụt ke enen̄ede ọfọn isinịm utuakibuot ubon kpukpru ini. Mbọk ẹtie nte ubon ẹse vidio emi. Ekem ẹbọrọ mme mbụme emi.

(1) Nso ikanam ubon Roman ẹkûnen̄ede ẹsịn idem ke n̄kpọ Abasi? (2) Ntak emi Brọda Roman mîkesikemeke ndinịm utuakibuot ubon ọfọn? (3) Nso ke Bible ọdọhọ mme ete ye eka ẹnam man mmọ ẹkeme ndibọk nditọ mmọ ke usụn̄ oro ọfọnde? (Deut. 6:6, 7) (4) Nso idin̄wam mme ete ye eka ye nditọ ẹsineme nneme ọfọn? (5) Nso ye nso ke nditọ ẹnen̄ede ẹyom mme ete ye eka mmọ ẹnam? (6) Didie ke Brọda Martin ye n̄wan esie ẹken̄wam Brọda Roman ye ubon esie? (N̄ke 27:17) (7) Man utuakibuot ubon enem onyụn̄ enyene ufọn, nso ke ana ibuotufọk ebem iso anam? (8) Nso ke Brọda Roman ọkọtọn̄ọ ndinam man ubon esie ẹfiak ẹdiana kiet? (9) Ntak emi ọfọnde ndisinịm utuakibuot ubon kpukpru ini? (Eph. 6:4) (10) Siak ndusụk n̄kpọ oro mbufo ẹkemede ndinam ke ini utuakibuot ubon. (11) Didie ke Brọda Roman eketịn̄ ikọ onyụn̄ anam n̄kpọ man an̄wam Marcus anam se inende? (Jer. 17:9) (12) Didie ke ete ye eka Rebekah ẹken̄wam Rebekah ebiere nditre ndụk emi enye okodụkde ye Justin? (Mark 12:30; 2 Tim. 2:22) (13) Nso ukpụhọde ke ete ye eka Rebekah ẹkenam, emi owụtde ke mmọ ẹnyene mbuọtidem ke Jehovah? (Matt. 6:33) (14) Didie ke vidio emi owụt ke enen̄ede ọfọn ibuotufọk ẹsikpep ubon mmọ Ikọ Abasi? (1 Tim. 5:8) (15) Edieke afo edide ibuotufọk, nso ke ebiere ndinam?

SE IBUOTUFỌK ẸKPEKEREDE ẸBAN̄A: Vidio emi aban̄a drama oro ẹkenamde ke akamba mbono ke 2011. Ndi drama oro ama anam fi okụt ke oyom okpụhọ nte afo esinịmde utuakibuot ubon? Utuakibuot ubon mbufo etie didie idahaemi? Edieke osụk odude n̄kpọ oro oyomde anam, mbọk ben̄e Abasi an̄wam fi ekeme ndinam mmọ man mbufo ẹdiana kiet kpukpru ini.—Eph. 5:15-17.