Nte Ikpadade Nso ke Bible Ekpep Nnyịn? Ikpep Owo N̄kpọ

N̄wed Bible Ekpep Nnyịn ye n̄wed Bible Ekpep ẹka nditie ukem ukem. N̄wed mbiba emi isidade ikpep mme owo Bible mi ẹtịn̄ ukem n̄kpọ, ndien ẹneme mme n̄kpọ emi ke adiana ke adiana. Edi n̄wed Bible Ekpep Nnyịn emem akan. Ẹnam n̄wed emi ẹnọ mbon oro n̄wed Bible Ekpep mîkesisọpke in̄wan̄a. Se Ẹwetde Ẹdian emi odude ke n̄wed Bible Ekpep Nnyịn emem akan enye emi odude ke n̄wed Bible Ekpep, ndien emi anam ndusụk ikọ ke esịt n̄wed oro enen̄ede an̄wan̄a. N̄wed emi inyeneke mme mbụme ke ntọn̄ọ ibuot kiet kiet inyụn̄ inyeneke ekebe ndụn̄ọde. Utu ke oro, ibuot kiet kiet etre ye ikpehe emi ẹkotde Se Ikpepde. Ikpehe emi etịn̄ mme akpan n̄kpọ oro ẹkenemede ke ibuot oro. Ẹkeme ndinọ owo n̄wed Bible Ekpep Nnyịn ini ekededi, idem ọkpọkọm idịghe enye ke ẹnọ ọfiọn̄ oro, kpa nte ikesinamde ye n̄wed Bible Ekpep. Didie ke ikeme ndida nsio nsio n̄kpọ oro ẹdude ke n̄wed emi n̄kpep mme owo Bible?

SE IKPEPDE: Ke ini idade n̄wed Bible Ekpep ikpep owo Bible, esidi ima ikot ikpehe, nnyịn ibụp mbụme ndien enye ọbọrọ. Edi nso ke ikpanam edieke eyen ukpepn̄kpọ nnyịn mînen̄ekede idiọn̄ọ usem nnyịn mîdịghe ikemeke ndikot n̄wed ọfọn? Imekeme ndida Se Ikpepde emi odude ke n̄wed Bible Ekpep Nnyịn n̄kpep enye n̄kpọ, inyụn̄ idọhọ enye oyom usụn̄ okot se idude ke ibuotikọ oro ke idemesie. Imekeme ndida n̄kpọ nte minit 15 n̄kpep owo se idude ke ikpehe kiet kiet ke Se Ikpepde. Sia owo mîtịn̄ke ofụri se idude ke ibuot kiet kiet ke Se Ikpepde, ana inen̄ede itịm idem inyụn̄ ikere nte idin̄wamde eyen ukpepn̄kpọ nnyịn. Edi edieke ikpepde ibuot kiet kiet ye eyen ukpepn̄kpọ nnyịn, imekeme ndida Se Ikpepde nnam ndụn̄ọde ye enye.

SE ẸWETDE ẸDIAN: Ẹbon se idude ke Se Ẹwetde Ẹdian ẹtiene ebiet emi mmọ ẹdude ke ibuot kiet kiet. Asuanetop kiet kiet edibiere m̀mê edi se inemede se idude mi ye eyen ukpepn̄kpọ imọ ke ini ikpepde enye n̄kpọ.