Se Idin̄wamde Nnyịn Idi Nti Mme Ọkwọrọikọ—Tre Ndikpep N̄kpọ ye Owo Emi Mîmaha Ndinam Se Bible Ọdọhọde

NTAK EMI EDIDE AKPAN N̄KPỌ: Ana mme owo ẹkot enyịn̄ Jehovah man ẹnyan̄a mmọ. (Ro 10:13, 14) Edi idịghe kpukpru mbon oro ẹsiyomde ikpep mmimọ Bible ẹsinyịme ndidu uwem nte Jehovah ọdọhọde. Ọkpọfọn ida ini nnyịn in̄wam mbon oro ẹben̄ede idem ndinam se inemde Jehovah esịt. Edieke ikpepde owo n̄kpọ ibịghi, edi enye inamke n̄kpọ ndomokiet iban̄a se enye ekpepde, ọkpọfọn itre ndikpep enye n̄kpọ, ikabade ida ini oro in̄wam mbon emi Jehovah odụride ọnọ idemesie ye esop esie. (Joh 6:44) Edi, nte ini akade, edieke enye owụtde ke ‘imenyene eti esịt oro edinamde enye enyene nsinsi uwem,’ imekeme ndifiak ntọn̄ọ n̄kpep enye n̄kpọ.—Ut 13:48.

NTE AKPANAMDE:

• Kọm eyen ukpepn̄kpọ ke ntak emi enye oyomde ndinyene nnennen ifiọk akpanikọ.—1Ti 2:4

• Nam enye ọfiọk ntak emi ọfọnde ndinam se enye ekpepde ke Bible.—Lu 6:46-49

• Neme uwụtn̄kpọ oro Jesus ọkọnọde aban̄a asuan-n̄kpasịp, nyụn̄ dọhọ enye ekere m̀mê nso n̄kpọ ikpan enye ndinam se enye ekpepde.—Mt 13:18-23

• Da mbufiọk tịn̄ ntak emi oyomde nditre ndikpep enye n̄kpọ

• Dọhọ enye ke eyesidi ndusụk ini edise enye, ndien ke emekeme ndifiak ntọn̄ọ n̄kpep enye n̄kpọ edieke enye eben̄ede idem ndinam se Bible ekpepde

ẸSE VIDIO, EKEM ẸBỌRỌ MME MBỤME EMI:

• Nso ke okokop ke vidio oro, emi owụtde ke eyen ukpepn̄kpọ oro ikamaha ndinam se enye ekpepde?

• Didie ke eyenete oro ekekpepde enye n̄kpọ akanam enye ọfiọk ke oyom enye okpụhọde?

• Nso ke eyenete oro eketịn̄ ndiwụt ke imekeme ndifiak ntọn̄ọ n̄kpep enye n̄kpọ ke ini iso?