Mme Ete ye Eka, Ẹnam Nditọ Mbufo Ẹdiọn̄ọ Se Akpanade Mmọ Ẹdiọn̄ọ

Nnyịn idu uwem ke ererimbot emi ẹdọhọde ke eti edi idiọk, idiọk onyụn̄ edi eti. (Isa 5:20) Ndusụk owo ẹsinam mme n̄kpọ emi Jehovah asuade, utọ nte erenowo ndidan̄ ye erenowo, n̄wan ndinyụn̄ ndan̄ ye n̄wan. Nditọ ufọkn̄wed m̀mê mbon en̄wen ẹkeme ndinam ọdọn̄ nditọ nnyịn nditiene nnam ndiọi n̄kpọ emi. Didie ke mbufo ẹkeme ndin̄wam nditọ mbufo ẹfiọk se mmọ ẹkpenamde ke ini utọ n̄kpọ emi etịbede?

Ẹnam nditọ mbufo ẹdiọn̄ọ se Jehovah amade ye se enye asuade. (Le 18:3) Ẹnam mmọ ẹfiọk se Bible etịn̄de aban̄a idan̄, edi ẹkûda usen kiet ẹtịn̄ kpukpru n̄kpọ. Isua emana mmọ ke ẹdida ẹfiọk se ẹkpetịn̄de ye mmọ. (De 6:7) Bụp idemfo ete: ‘Ndi mmanam nditọ mi ẹfiọk utọ mbre emi owo mîkpebreke ye mmọ, ntak emi ọfọnde mmọ ẹsisịne ọfọn̄ emi ofụkde owo idem, ye mme n̄kpọ emi mmọ mîkpayakke owo anam ye mmọ? Ndi nditọ mi ẹfiọk se ẹkpenamde edieke owo odomode ndinam mmọ ẹse ndise idan̄, m̀mê ọdọhọde mmọ ẹnam n̄kpọ emi Jehovah asuade?’ Ndibabak n̄kpep nditọ fo mme n̄kpọ emi ekeme ndinam mmọ ẹkûdụk mfịna. (N̄ke 27:12; Ec 7:12) Edieke ẹkpepde nditọ mbufo se Abasi amade ye se enye asuade, oro oyowụt ke ẹmenen̄ede ẹma eti enọ emi Jehovah ọnọde mbufo mi.—Ps 127:3.

ẸSE VIDIO ORO ẸBỌP UFỌK EMI MÎDIWỤREKE—ẸKPEME NDITỌ MBUFO MBAK OWO IDINAM MMỌ “SE IDIỌKDE,” EKEM ẸBỌRỌ MME MBỤME EMI:

• 

  Ntak emi esisọn̄de ndusụk owo ndikpep nditọ mmọ n̄kpọ mban̄a idan̄?

• 

  Ntak emi mme ete ye eka ẹkpekamade nditọ mmọ “ke ntụnọ ye ke item Jehovah”?—Eph 6:4

• 

  Nso ye nso ke esop Jehovah ẹsio, emi ẹkemede ndin̄wam mme ete ye eka ẹkpep nditọ mmọ n̄kpọ ẹban̄a idan̄?—w19.05 12, ekebe

• Ntak emi mbufo ẹkpesinemede nneme ke ubọk ke ubọk ye nditọ mbufo mbemiso akamba mfịna etịbede?