Nso Idinam N̄kpọ Ọfọn Fi ke Ini Iso?

SE EDIWAK OWO ẸNỊMDE

NDISIAK NTANTAỌFIỌN̄: Ndusụk owo ẹnịm ke ebiet emi ntantaọfiọn̄ okodude ini mmimọ imanade ediwụt nte ini iso mmimọ editiede. Mmọ ẹsika ẹbịne mme asiak-ntantaọfiọn̄ ẹkebụp se iditịbede inọ mmimọ ye se ikpanamde man idiọk n̄kpọ idisịm mmimọ.

NDITỊN̄ INI ISO: Mbon en̄wen ẹsika ẹbịne mme etịn̄-ini-iso ẹkebụp se ikanamde n̄kpọ etịbe ọnọ mmimọ ye se mmimọ ikpanamde iban̄a oro. Mmọ ẹsikere ke edieke idiọn̄ọde oro, ke iyọdiọn̄ọ nte ikpasan̄ade ibọhọ mfịna ye se ikpanamde man n̄kpọ ọfọn mmimọ ke ini iso.

NDIWA N̄KPỌ NNỌ MBON EMI ẸKEKPADE: Ndusụk owo ẹnịm ke ana iwa n̄kpọ inọ mbon mmimọ oro ẹkekpade mîdịghe iwa inọ nsio nsio abasi man ẹkpeme ẹnyụn̄ ẹdiọn̄ mmimọ. Van,a emi odụn̄de ke Vietnam ọdọhọ ete: “N̄kesikere ke edieke n̄kade n̄kawa n̄kpọ nnọ mbon nnyịn oro ẹkekpade, ke oro ayanam uwem enem mi idahaemi onyụn̄ anam n̄kpọ ọfọn mi ye nditọ mi ke ini iso.”

NDINỊM KE OWO ESIFIAK AMANA: Ediwak owo ẹnịm ke owo ama akpa, ke enye esifiak amana, ndien ke oro esitịbe ediwak ini. Mmọ ẹnịm ke nti n̄kpọ oro mmimọ ikanamde ke emana oko anam n̄kpọ ọfọn mmimọ idahaemi mîdịghe ke idiọkn̄kpọ mmimọ oyom mmimọ okụt.

Edi ediwak owo inịmke ekededi ke otu emi. Kpa ye oro, mmọ ẹsika use-n̄kpọ, ẹbre idiọn̄, ẹmụm ndomo, ẹse owo ekaubọk ẹtịn̄ se iditịbede inọ enye, ẹnyụn̄ ẹnam mme n̄kpọ en̄wen oro akade nditie ntre. Mmọ ẹkere ke mme n̄kpọ ntem ẹkeme ndinam idiọn̄ọ nte n̄kpọ editiede ye mmimọ ke ini iso.

NSO KE EMI ADA EDI?

Ndi ndinam utọ n̄kpọ emi esinam uwem enem owo? Ndi esinam n̄kpọ ọfọn owo ke ini iso?

Yak ineme se iketịbede inọ Hào emi odụn̄de ke Vietnam. Enye ama esiwa n̄kpọ ọnọ mbon mmọ oro ẹkekpade, onyụn̄ odomo ndida ntantaọfiọn̄ ndiọn̄ọ se iditịbede. Ndi oro ama an̄wam enye? Enye ọdọhọ ete: “Mbubehe mi ama atahade, mma n̄kama ata akamba isọn, mfịna odu ke ubon mi, esịt onyụn̄ enen̄ede etịmede mi.”

Qiuming, emi otode Taiwan, ama etiene enịm n̄ko ke ntantaọfiọn̄ ekeme ndinam owo ọdiọn̄ọ se iditịbede, enịm ke owo esifiak amana, enịm ke ẹma ẹbebiere kpukpru n̄kpọ, esinyụn̄ awa n̄kpọ ọnọ mbon emi ẹma ẹkekpa. Edi kop se enye ọkọdọhọde mi ke enye ama ekenen̄ede etie ekere mme n̄kpọ emi: “Mma ndikụt ke mme n̄kpọ emi edi ẹtetịn̄ ẹsịn ẹtetịn̄ ẹsio, owo inyụn̄ ikemeke ndinam enen̄ede an̄wan̄a owo. Mma ndikụt n̄ko ke ediwak se mme asiak-ntantaọfiọn̄ ẹsitịn̄de inenke. Ndien ke ini n̄ketiede n̄kere mban̄a owo ndifiak mmana, mma mbụp idemmi nte: ‘Edieke owo mîdiọn̄ọke nte uwem esie eketiede ke emana oko, enye edisan̄a didie idiọn̄ọ se akpanade enye anam ke emana en̄wen man uwem esie ọwọrọ n̄kpọ?’”

Hào, Qiuming, ye ediwak mbon en̄wen ẹdikụt ke owo ikebiereke-biere kpukpru n̄kpọ inịm, ke owo isinyụn̄ ifiakke imana. Mmọ ẹkụt n̄ko ke idịghe ntantaọfiọn̄ m̀mê ndiwa n̄kpọ nnọ mbon nnyịn oro ẹkekpade ekeme ndinam n̄kpọ ọfọn nnyịn ke ini iso. Edieke edide ntre, ndi emi ọwọrọ ke idụhe se ikpanamde man n̄kpọ ọfọn nnyịn ke ini iso?

Ediwak owo ẹkere ke edieke owo oyomde n̄kpọ ọfọn imọ ke ini iso, ke ana enye aka akamba ufọkn̄wed onyụn̄ enyene okụk. N̄kpọ esitie didie ye mbon emi ẹnamde utọ n̄kpọ oro?