Nso Idin̄wam Fi Ọfiọk Se Akpanamde Man N̄kpọ Ọfọn Fi ke Ini Iso?

Nte ikenemede ke mme ibuotikọ oro ẹkebede, mme owo ẹnam nsio nsio n̄kpọ emi mmọ ẹkerede ke ayanam n̄kpọ ọfọn mmimọ ke ini iso, utọ nte ndiyom mfọniso, ndika akamba ufọkn̄wed, ndiyom inyene, m̀mê ndidi eti owo. Edi owo ndinam mme n̄kpọ emi etie nte enye ndidọhọ owo emi mîdiọn̄ọke ebiet emi enye akade ete eteme imọ usụn̄. Ndi oro ọwọrọ ke idụhe n̄kpọ ndomokiet emi ekemede ndin̄wam owo ọdiọn̄ọ se enye akpanamde man n̄kpọ ọfọn enye ke ini iso? Iwọrọke ntre.

NNENNEN OWO EMI EKPETEMEDE NNYỊN SE IKPANAMDE

Ke ini iyomde ndibiere se ikpanamde, imesika ibịne owo emi ọsọn̄ọde nnyịn onyụn̄ ọdiọn̄ọde n̄kpọ akan nnyịn man an̄wam nnyịn. Kpasụk ntre, edieke iyomde ndidiọn̄ọ nnennen n̄kpọ emi ikpanamde man n̄kpọ ọfọn nnyịn ke ini iso, ana ika ibịne Owo emi ọsọn̄ọde kpukpru nnyịn onyụn̄ ọdiọn̄ọde n̄kpọ akan kpukpru nnyịn. Enye anam ẹwet nti item emi enye ọnọde nnyịn ẹdọn̄ ke n̄wed kiet. Ẹkot n̄wed emi Bible. Ẹketọn̄ọ ndiwet enye n̄kpọ nte isua 3,500 emi ekebede.

Ntak emi ikpenịmde ke Bible ekeme ndin̄wam nnyịn? Sia Owo emi okponde onyụn̄ ọdiọn̄ọde n̄kpọ akan kpukpru owo enyene Bible. Ẹkot enye “Andisọn̄ọ Usen,” enye onyụn̄ odu “ke nsinsi nsinsi.” (Daniel 7:9; Psalm 90:2) Enye edi “ata Abasi” emi okobotde enyọn̄ ye isọn̄. (Isaiah 45:18) Enye ọdọhọ ke imọ ikere Jehovah.—Psalm 83:18.

Bible idọhọke ke enyene idụt m̀mê obio emi ọfọnde akan en̄wen sia Abasi emi okobotde kpukpru owo enyene Bible. Item Bible an̄wam mme owo ke kpukpru idụt toto ke eset tutu esịm emi. Ẹkabade Bible ẹsịn ke usem awak akan n̄wed en̄wen ekededi, inyụn̄ idụhe n̄wed en̄wen emi mme owo ẹnyenede nte Bible.a Emi ọwọrọ ke mme owo ke ofụri ererimbot ẹkeme ndikot Bible ke usem emi an̄wan̄ade mmọ, ẹnyụn̄ ẹnam se Bible ọdọhọde. Ntak edi oro Bible ọdọhọde ke . . .

“Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—UTOM 10:34, 35.

Kpa nte ete emi amade nditọ esie esinọde mmọ item emi edin̄wamde mmọ, Jehovah Abasi nnyịn ama nnyịn esinyụn̄ ada Bible ọnọ nnyịn item. (2 Timothy 3:16) Imenịm ke se enye etịn̄de ọnọ nnyịn ke Bible ayan̄wam nnyịn sia enye okobot nnyịn, enye onyụn̄ ọdiọn̄ọ nnennen se ikpanamde man ikop inemesịt.

SE BIBLE ETỊN̄DE EDI AKPANIKỌ

Imenịm ke Bible ekeme ndin̄wam nnyịn ifiọk se ikpanamde man n̄kpọ ọfọn nnyịn ke ini iso sia n̄kpọ nte isua 2,000 emi ekebede, Bible ama etịn̄ mme n̄kpọ emi ẹditịbede ke ererimbot ye nte mme owo ẹdidude uwem. Se Bible eketịn̄de oro onyụn̄ edi se itịbede mfịn.

MME N̄KPỌ EMI ẸDITỊBEDE

“Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen; ikpọ unyekisọn̄ ẹyedu, ndiọi udọn̄ọ ye akan̄ ẹyenyụn̄ ẹdu ke nsio nsio ebiet.”—LUKE 21:10, 11.

NTE MME OWO ẸDIDUDE UWEM

“Ndiọkeyo emi ọsọn̄de ndiyọ oyodu ke mme akpatre usen. Koro mme owo ẹyedi mme ama idem, mme ama okụk, ẹtan̄ idem, ẹseri iseri, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, inyeneke nsọn̄ọnda, inyeneke ndammana ima, inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, mme andida owo nnọ, ẹsọn̄ ibuot, ẹkohode idem, ẹma unọ idem inemesịt utu ke ndima Abasi.”—2 TIMOTHY 3:1-4.

Ekere ke nso inam kpukpru se Bible eketịn̄de anyan ini ko aban̄a eyo nnyịn emi etịbe ata nnennen nnennen mfịn? Anaedi eyenyịme ye se Leung emi otode Hong Kong eketịn̄de. Enye ọkọdọhọ ete: “Ẹkewet mme prọfesi Bible ata anyan ini ko. Idụhe owo ndomokiet ke isọn̄ emi ekpekemede nditịn̄ nnennen nnennen se iditịbede ntre. Ntem, anaedi Owo emi ọfiọkde n̄kpọ akan kpukpru owo akanam ẹwet Bible.”

Ata ediwak prọfesi ẹdu ke Bible emi ẹma ẹkesosu. Emi owụt ke Bible edi Ikọ Abasi. Jehovah ọdọhọ ete: “Ami ndi Abasi ndien Abasi efen idụhe, baba kiet inyụn̄ ibietke mi; Enye emi etịn̄de akpatre ke ntọn̄ọ.” (Isaiah 46:9, 10) Omokụt do ke emekeme ndinịm kpukpru se Bible etịn̄de aban̄a ini iso.

MME ITEM EMI ẸDIN̄WAMDE FI IDAHAEMI YE KE NSINSI

Edieke anamde mme item emi ẹdude ke Bible, afo edidia ufọn. Yak ineme ndusụk item emi.

ETI ITEM EMI ABAN̄ADE OKỤK YE UTOM

“Esisịt nduọkodudu ọfọn akan ekese ọkpọsọn̄ utom ye edifehe mbịne ofụm.”—ECCLESIASTES 4:6.

SE AKPANAMDE MAN ẸKOP INEMESỊT KE UBON

“Yak owo mbufo kiet kiet enen̄ede ama n̄wan esie nte enye amade idem esie; ke n̄kan̄ eken, yak n̄wan enen̄ede okpono ebe esie.”—EPHESUS 5:33.

SE AKPANAMDE MAN ODU KE EMEM YE MME OWO

“Tre iyatesịt nyụn̄ kpọn̄ ifụtesịt; kûyat esịt koro emi adade esịm ndinam idiọk.”—PSALM 37:8.

Edieke anamde se Bible ọdọhọde, uwem eyenem fi idahaemi, n̄kpọ oyonyụn̄ ọfọn fi ke ini iso. Bible etịn̄ ediwak nti n̄kpọ emi Abasi ọn̄wọn̄ọde ndinam nnọ nnyịn ke ini iso, utọ nte . . .

EMEM YE IFỤRE

‘Ediwak emem ayadat mme owo esịt.’—PSALM 37:11.

KPUKPRU OWO ẸYENYENE UFỌK YE UDIA

“Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ.”—ISAIAH 65:21.

UDỌN̄Ọ YE N̄KPA IDIDỤHE ABA

“N̄kpa [ididụhe] aba, mfụhọ m̀mê ntuan̄a m̀mê ubiak idinyụn̄ idụhe aba.”—EDIYARADE 21:4.

Nso ke akpanam man odu uwem ke ini mme n̄kpọ emi ẹditịbede? Mbọk kot ibuotikọ oro etienede.

a Edieke oyomde ndifiọk n̄kpọ en̄wen mban̄a nte ẹkekabarede Bible ẹnyụn̄ ẹnamde ediwak owo ẹnyene enye, mbọk ka www.jw.org/efi, se ke ebiet emi okụtde SE BIBLE EKPEPDE > MBỤKESET YE BIBLE.