Se Ifọnde ye Se Idiọkde: Bible Ekeme Ndin̄wam Fi Ọdiọn̄ọ Se Akpanamde
Ikpanaha ikere ke se ibierede ọyọfọn edieke isidade nte etiede nnyịn ke idem m̀mê se mbon en̄wen ẹkerede ibiere n̄kpọ. Bible anam idiọn̄ọ ntak, edi ikụreke ke oro. Bible esin̄wam nnyịn idiọn̄ọ se ikpanamde ye se nnyịn mîkpanamke—ndien emi esinam ikop inem uwem.
IMOYOM ABASI AN̄WAM NNYỊN
Ke Bible, Jehovaha etịn̄ ke Enye okoyom mme owo ẹsiyak enye ada mmọ usụn̄, idịghe mmọ ndida idemmọ usụn̄. (Jeremiah 10:23) Ntak edi oro Enye etịn̄de se ikpanamde ye se nnyịn mîkpanamke ke Bible. Abasi ama nnyịn mme owo, Enye inyụn̄ iyomke nnyịn ibiere n̄kpọ emi edinamde ibọ ufen, m̀mê edinamde uwem ọsọn̄ ye nnyịn. (Deuteronomy 5:29; 1 John 4:8) Ke akande oro, nte Andibot nnyịn, enye enyene ifiọk ye ọniọn̄ ekem ndinọ nnyịn nti item oro ọfọnde akan. (Psalm 100:3; 104:24) Kpa ye oro, Enye isinyịkke nnyịn idu uwem nte enye ọdọhọde.
Jehovah ama ọnọ akpa erenowo ye n̄wan, oro ekedide Adam and Eve, kpukpru se mmọ ẹkeyomde man uwem enem mmọ. (Genesis 1:28, 29; 2:8, 15) Ekem Enye ama etịn̄ se mmọ ẹkpenamde oro mîkọsọn̄ke, ekere ke mmọ ẹyenam. Edi Enye ama ayak mmọ ẹbiere m̀mê mmọ ẹyenam m̀mê idinamke. (Genesis 2:9, 16, 17) Ọdiọk etieti sia Adam ye Eve ẹkemek ndidu uwem nte mmọ ẹmade, idịghe nte Abasi okoyomde. (Genesis 3:6) Nso ke oro akada edi? Ndi mme owo ndisibiere se ifọnde ye se idiọkde nnọ idemmọ anam n̄kpọ ọfọn mmọ? Ihih-o. Ke ediwak isua emi ẹbede, mme owo ẹdikụt ke nditre ndidu uwem nte Abasi ọdọhọde inamke owo enyene emem onyụn̄ okop inemesịt.—Ecclesiastes 8:9.
Bible ọnọ nnyịn nti item oro edin̄wamde nnyịn ibiere se ifọnde, inamke n̄kpọ m̀mê ito m̀mọ̀n̄, m̀mê ẹsinyụn̄ ẹnam didie n̄kpọ ke ubon nnyịn. (2 Timothy 3:16, 17; se ekebe oro “N̄wed Ofụri Owo.”) Se nte Bible esinamde oro mi.
Kpep ntak en̄wen emi enende ndidọhọ ke Bible edi “ikọ Abasi.”—1 Thessalonica 2:13. Se vidio emi Anie Enyene Bible? ke jw.org.
BIBLE ETỊN̄ SE ABASI OYOMDE NNYỊN INAM
Bible etịn̄ nte Jehovah ekesinamde n̄kpọ ye mme owo toto ke editọn̄ọ. Se idọn̄ọde ke Bible anam ikụt se Abasi adade nte eti ye idiọk, enye oro edinyenede ufọn inọ nnyịn ye enye oro edidade mfịna isọk nnyịn. (Psalm 19:7, 11) Se Bible ekpepde ọfọn onyụn̄ esin̄wam nnyịn ibiere nti n̄kpọ kpukpru usen.
Ke uwụtn̄kpọ, Mme N̄ke 13:20 ọdọhọ: “Owo eke asan̄ade ye mbon ọniọn̄ eyenyene ọniọn̄, edi ọyọdiọk ye owo eke odụkde nsan̄a ye mme ndisịme.” Se Bible etịn̄de oro ke ẹtịbe idahaemi, ukem nte okonyụn̄ edide ke eset. Nti item nte utọ enye isụk ikotde mi ọyọyọhọ Bible. Se ekebe oro “Se Bible Etịn̄de Osụk Enyenyene Ufọn.”
Edi emekeme ndikere, ‘N̄kpanam didie ndiọn̄ọ ke se Bible etịn̄de osụk enyenyene ufọn?’ Ibuotikọ en̄wen eyeneme nte Bible an̄wamde mme owo.
a Jehovah edi ata enyịn̄ Abasi.—Psalm 83:18.