1 | Akam ‘Ẹtop Kpukpru Editịmede Esịt Mbufo Ẹnọ Enye’

Se Ọwọrọde

Jehovah Abasi ọdọhọ itịn̄ kpukpru se ifịnade nnyịn ye nte etiede nnyịn ke idem inọ enye. (Psalm 55:22) Idụhe mfịna ndomokiet nnyịn mîkemeke ndibọn̄ akam mban̄a, m̀mê edi ekpri m̀mê akamba. Edieke n̄kpọ afịnade nnyịn, afịna Jehovah. Ọfọn ibọn̄ akam inọ enye sia oro ayanam esịt ana nnyịn sụn̄.​—Philippi 4:6, 7.

Nte Akam Ekemede Ndin̄wam

Edieke edide imenyene mfịna ibuot, ekeme nditie nnyịn nte owo ndomokiet idiọn̄ọke nte etiede nnyịn ke idem. Mbon en̄wen isinen̄ekede idiọn̄ọ se iwọrọde mbon emi ẹnyenede mfịna ibuot. (Mme N̄ke 14:10) Edi edieke itịn̄de nte etiede nnyịn ke idem inọ Abasi ke akam, enye ayakpan̄ utọn̄ ọnọ nnyịn. Se iwọrọde nnyịn ayan̄wan̄a enye, enye oyonyụn̄ atua nnyịn mbọm. Jehovah ọdiọn̄ọ nnyịn, ọdiọn̄ọ kpukpru se iwọrọde nnyịn ye nte etiede nnyịn ke idem. Enye oyom nnyịn itịn̄ ofụri ofụri nte etiede nnyịn ke idem inọ enye ke akam.​—2 Chronicle 6:29, 30.

Ndisibọn̄ akam nnọ Jehovah esinam inen̄ede inịm ke enye ama nnyịn. Imekeme ndinam etie nnyịn ke idem nte eketiede andiwet Psalm, emi ọkọbọn̄de akam ete: “Afo omokụt ukụt mi; afo ọmọfiọk nnanenyịn ukpọn̄ mi.” (Psalm 31:7) Nnyịn ndidiọn̄ọ ke Jehovah okụt kpukpru se iwọrọde nnyịn ekeme ndin̄wam nnyịn iyọ. Edi enye isikwe mfịna nnyịn isio enyịn ifep. Se iwọrọde nnyịn esin̄wan̄a enye akan owo en̄wen ekededi. Enye esin̄wam nnyịn onyụn̄ anam ikụt itie Bible emi edidọn̄de nnyịn esịt.