2 | “Ndọn̄esịt Oro N̄wed Abasi Ọnọde”

BIBLE ỌDỌHỌ ETE: “Kpukpru n̄kpọ oro ẹkewetde ke ini edem, ẹkewet mmọ ndida nteme nnyịn, man ikpenyene idotenyịn oto ke nnyịn ndiyọ nnyụn̄ mbọ ndọn̄esịt oro N̄wed Abasi ọnọde.”—ROME 15:4.

Se Ọwọrọde

Bible etịn̄ nti ikọ emi ẹkemede ndidọn̄ nnyịn esịt ke ini ikerede ke eke nnyịn okụre. Se Bible etịn̄de anam inyene idotenyịn ke ibịghike esịt idisitịmekede nnyịn aba.

Nte Bible Ekemede Ndin̄wam

Idịghe kpukpru ini ke esịt esinem owo; edi enyene mbon emi esịt esinen̄erede etịmede ẹsinyụn̄ ẹfụhọde kpukpru ini. Didie ke Bible ekeme ndin̄wam?

Bible etịn̄ nti ikọ emi ẹkemede ndin̄wam nnyịn ke ini ikerede ke eke nnyịn okụre. (Philippi 4:8) Se Bible etịn̄de ekeme ndinam esịt ana nnyịn sụn̄ ke ini esịt etịmerede nnyịn.—Psalm 94:18, 19.
Bible ekeme ndin̄wam nnyịn itre ndikere ke nnyịn iwọrọke n̄kpọ.—Luke 12:6, 7.
Ediwak itie ke Bible owụt ke Abasi Andikobot nnyịn ikpọn̄ke nnyịn, enye onyụn̄ ọdiọn̄ọ nte etiede nnyịn ke idem.—Psalm 34:18; 1 John 3:19, 20.
Bible ọdọhọ ke Abasi ayanam ifre iban̄a kpukpru mme n̄kpọ emi ẹsitịmerede nnyịn esịt. (Isaiah 65:17; Ediyarade 21:4) Ke ini inen̄erede ifụhọ m̀mê ke ini esịt enen̄erede etịmede nnyịn, se Bible etịn̄de emi ekeme ndin̄wam nnyịn iyọ.

Nte Bible An̄wamde Jessica

Se Ọkpọsọn̄ Mfụhọ Anamde Mi

“Ini n̄kedide isua 25, mma nsinen̄ede n̄kop ndịk ndien ke mma n̄kaka ufọkibọk, dọktọ ama ọdọhọ ke ọkpọsọn̄ mfụhọ anam. Esidi mma ntie ntie ntise iketịbede inọ mi ndien nnen̄ede mfụhọ. Dọktọ ama edinam n̄kụt ke ami ndisinen̄ede n̄kere mban̄a se iketịbede inọ mi esinam nnen̄ede mfụhọ. Enye ama ọnọ mi ibọk, edi akana nyom dọktọ emi edin̄wamde mi nsikere nti n̄kpọ.”

Nte Bible An̄wamde Mi

“Ini emi nsinen̄erede mfụhọ, idem esinyek mi, esịt esinen̄ede etịmede mi, nsinyụn̄ n̄kemeke ndide idap. Ndusụk ini, nsio nsio ekikere ẹsiyọhọ mi ibuot tutu ndiọn̄ọke se n̄kpanamde. Psalm 94:19 anam idiọn̄ọ ke Abasi ekeme ndidọn̄ nnyịn esịt ke ini esịt etịmerede nnyịn. Mmesinịm Bible ye n̄wed emi n̄wetde mme itie Bible emi ọdọn̄de owo esịt n̄kpere ibuot bed mi. Ke ini mmen̄kemeke ndide idap, mmesikot mme itie Bible ifan̄ man ọdọn̄ mi esịt.

“Bible an̄wam nnyịn itre ndikere ndusụk n̄kpọ emi ikesikerede iban̄a Abasi ini nnyịn mîkọdiọn̄ọke enye. Akpa akpa, n̄kesikere ke n̄wọrọke n̄kpọ ndomokiet, ke Abasi imaha mi, ke nnyụn̄ nnyeneke ufọn. Edi idahaemi mmedikụt ke utọ ekikere oro isan̄ake ye se Bible ekpepde. Bible ọdọhọ ke Abasi edi edima Ete emi amade onyụn̄ esede aban̄a nnyịn owo kiet kiet. Ke ntọn̄ọ ndimek se n̄kerede utu ke ndiyak se n̄kerede anam mi mfụhọ. Mmọtọn̄ọ ndida idem mi nte Abasi adade mi. Se inen̄erede in̄wam mi ntre ndikere ke n̄wọrọke n̄kpọ edi oro.

“Ke mbet ini emi mme n̄kpọ emi ẹsinamde nnyịn ifụhọ mîdidụhe aba ye ini emi idisikerede sụk nti n̄kpọ kpọt. Ami ndidiọn̄ọ ke ini ke edi emi mme owo mîdinyeneke mfịna ibuot aba anam n̄keme ndiyọ ke ini mfụhọde onyụn̄ anam nnyene idotenyịn ke usen kiet usen kiet ke ndifụhọke aba.”