3 | Mbụk Bible Ekeme Ndin̄wam Fi
BIBLE ETỊN̄ ABAN̄A . . . Iren ye iban emi ẹkesobode ukem n̄kpọ emi nnyịn isobode. —JAMES 5:17.
Se Ọwọrọde
Mbụk ikọt Abasi iren ye iban emi ẹkefụhọde ọyọyọhọ Bible. Nte ikotde mbụk mmọ, imekeme ndikụt mbụk owo emi akade ndibiet eke nnyịn.
Nte Mbụk Bible Ekemede Ndin̄wam
Imesiyom mbon en̄wen ẹdiọn̄ọ nte etiede nnyịn ke idem. Edi mbon emi ẹnyenede mfịna ibuot ẹsinen̄ede ẹyom mme owo ẹdiọn̄ọ nte etiede mmọ ke idem. Ima ikot se iketịbede inọ mme owo ke Bible, ekeme ndin̄wan̄a nnyịn nte eketiede mmọ ke idem. Oro esinam ikụt ke idịghe nnyịn kpọt isikop editịmede esịt ye ọkpọsọn̄ mfụhọ, ke mbon en̄wen n̄ko ẹsitiene ẹsobo utọ mfịna emi.
Imekeme ndikụt se mbon emi ẹkekerede ke eke mmimọ okụre ẹketịn̄de ke Bible. Ndi akanam emekere ke udûkemeke ndiyọ aba? Moses, Elijah, ye David ẹma ẹdọhọ ke mmimọ ikemeke ndiyọ aba.—Numbers 11:14; 1 Ndidem 19:4; Psalm 55:4.
Bible etịn̄ aban̄a mma kiet emi ekekerede Hannah emi mîkenyeneke eyen ndien oro ama esinam “esịt ayat enye etieti.” N̄wan ufụp esie ama esinyụn̄ ọdiọk uwem ye enye etieti.—1 Samuel 1:6, 10.
Bible etịn̄ n̄ko aban̄a Job. Imọdiọn̄ọ se iketịbede inọ enye. Kpa ye emi enye ekenyenede mbuọtidem, enye ama enen̄ede ofụhọ tutu usen kiet enye ọdọhọ ke uwem odorode imọ.—Job 7:16.
Edieke idiọn̄ọde se ikanamde mme owo ke Bible ẹtre ndisitịmede esịt nnyụn̄ mfụhọ, oro ekeme ndin̄wam nnyịn iyọ ke ini esịt etịmerede nnyịn.