Ntak Ekọn̄ ye En̄wan Ẹkade Iso Mfịn

IDIỌKN̄KPỌ

Abasi okobot akpa ete ye eka nnyịn, Adam ye Eve, ke mbiet esie. (Genesis 1:27) Oro ọwọrọ ke mmọ ẹma ẹkeme ndinyene mme edu Abasi, utọ nte emem ye ima. (1 Corinth 14:33; 1 John 4:8) Edi, Adam ye Eve ẹma ẹsọn̄ ibuot ye Abasi ẹnyụn̄ ẹnam idiọkn̄kpọ. Nte kpukpru nnyịn ikasan̄ade ida idiọkn̄kpọ ye n̄kpa imana edi oro. (Rome 5:12) Idiọkn̄kpọ oro ikadade imana mi esinam ikere se mîfọnke, enye esinyụn̄ anam ediwak owo ẹnam n̄kpọ ibak ibak.​—Genesis 6:5; Mark 7:21, 22.

UKARA OWO

Abasi ikobotke nnyịn man idikara idem nnyịn. Bible ọdọhọ ete: “Ikam isịneke ke ubọk owo eke asan̄ade ndinen̄ede ikpatisan̄ esiemmọ.” (Jeremiah 10:23) Ntak edi oro ukara owo mîkemeke ndisio ekọn̄ ye afai ofụri ofụri mfep.

SATAN YE MME DEMON ESIE

Bible etịn̄ ke “ofụri ererimbot esịne ke idak odudu andidiọk.” (1 John 5:19) Ẹkot “andidiọk” oro Satan kpa Devil, ndien enye edi ata ibak ye owotowo. (John 8:44) Enye ye mme demon esie emi enyịn mîkwe ẹsisịn nsọk man mme owo ẹn̄wana ekọn̄ ẹnyụn̄ ẹnam n̄kpọ ibak ibak.​—Ediyarade 12:9, 12.