Ima Ifiak Ididiana Kiet!

Linda: Ke ini n̄kedide isua 12, eka mi ama ọdọhọ mi ke mmenyene ekpri eyeneka, edi ke ima imen enye inọ owo. Sia mmen̄kọdiọn̄ọke enye toto ke nsek, mma nsikere m̀mê enye edi inan nte ami.

Sally: N̄kọdiọn̄ọke ke mma emi ndụn̄de kiet idịghe ata eka mi. Mma oro ama esitịm mi tutu onyụn̄ akama mi nte ofụn. Emi ama esinam mi mfụhọ nnyụn̄ n̄kere ke n̄wọrọke n̄kpọ, akpan akpan sia ndide inan. Mma n̄kụt Mme Ntiense Jehovah nnyụn̄ ntọn̄ọ ndikpep Bible. Ke ini mma oro ọkọdiọn̄ọde, enye ama akama n̄kpahaisịn etịm mi onyụn̄ okpụhọ kpukpru ukpọhọde ke ufọk mbak ndiwọrọ. Mma mfehe n̄kpọn̄ ufọk ke ini n̄kedide isua 20, ndien Mme Ntiense Jehovah ẹma ẹmen mi ẹkama. Ke ntọn̄ọ ntọn̄ọ 2012, mma nna baptism.

Linda: Mma ntọn̄ọ ndikpep Bible ye Mme Ntiense Jehovah ke ini n̄kedide isua 20, nnyụn̄ nsitiene n̄ka ikpọ mbono mmọ ke Jakarta nte ini akade. Ẹma ẹsikabade se ẹtịn̄de ẹnọ mme inan ke usem idiọn̄ọ. Do ke n̄kokụt mme inan eken ye Sally, ekpri eyenan̄wan emi edide inan. Enye okodụn̄ ke North Sumatra. Kpa ye oro enye ekebietde owo emi mma n̄kọdọdiọn̄ọ, n̄kọdọn̄ke enyịn do.

Sally: Ami ye Linda ima itọn̄ọ ufan. Mma n̄kụt ke enye ebiet mi, edi n̄konyụn̄ nda nte ke owo ebiet owo.

Linda: Ke August 2012 ama enen̄ede ọdọn̄ mi ndikụt eyeneka mi. Ke usen emi ekesierede usen baptism mi, mma mben̄e Jehovah nte: “Mbọk n̄wam mi n̄kụt eyeneka mi, nyom ndinam enye ọdiọn̄ọ fi.” Ikebịghike owo ama ọnọ eka mi etop aban̄a eyeneka mi oro. Akpa n̄kpọ emi akan̄wamde nnyịn ikụt Sally edi oro.

Sally: Ke ini Linda ọkọdọhọde mi ke ndi eyeneka imọ, mma nsọsọp ndụk ubomofụm n̄ka ndikụt enye. Ke mma n̄kọwọrọ ke ubomofụm nnyụn̄ mbe mme bodisi emi ẹsisede ekpat ye n̄wedisan̄, mma n̄kụt Linda, ete mi, eka mi, ye adiahaeka mi nte ẹdade ẹbet mi. Esịt ama enem mi mbiet idụhe. Ima ifat idem nnyịn inyụn̄ itịm inua. Eka mi akafat mi ebịghi akan. Kpukpru nnyịn ima itua. Ete ye eka mi ẹma ẹtua ẹkpe mi ubọk ke ndikemen mi nnọ owo, ndien oro ama anam nnyịn idọdiọn̄ itua.

Linda: Sia ami ye Sally mîkodụn̄ke kiet tọn̄ọ ke ekpri, akana ndomo ndidiọn̄ọ uwem esie, enye onyụn̄ anam ntre ye ami. Edi imama idem nnyịn etieti.

Sally: Ami ye Linda idụn̄ kiet inyụn̄ idu ke esop usem idiọn̄ọ ke Jakarta.

Linda: Ẹma ẹdian̄ade Sally ẹkpọn̄ mi ke se ibede isua 20. Imọkọm Jehovah ke ndinam ifiak ididiana kiet!