Ẹnam Ẹsọp Ẹbọp Ufọkmbono Obio Ubọn̄

ENEM nnyịn ndikụt nte Jehovah anamde mme owo ẹtetịm ẹwak ke esop esie ke ofụri ererimbot! (Isa. 60:22) Emi anam ẹyom ediwak mbufa Ufọkmbono Obio Ubọn̄. Ndien mbon emi anade ẹbọp m̀mê ẹfiak ẹdiọn̄ ebe 13,000 ke ofụri ererimbot.

Otu Emi Ẹsede Ẹban̄a Utom Mme Ntiense Jehovah ẹnam ndutịm man ẹkeme ndisọp mbọp Ufọkmbono Obio Ubọn̄, edi owo ibiatke okụk ikaha. Ẹma ẹsiak Itieutom Emi Ẹsede Ẹban̄a Ubọpn̄kpọ ke Ofụri Ererimbot (WDC) ke Brooklyn ke New York. Iso utom mmọ edi ndinam ẹsọp ẹdiọn̄ m̀mê ẹbọp n̄kpọ ekededi emi esop Abasi ẹyomde ke ofụri ererimbot. Itieutom Emi Ẹsede Ẹban̄a Ubọpn̄kpọ ke Ikpehe ke Ikpehe (RDC), ke n̄kọk itieutom Australasia, Central Europe, South Africa, ye ke United States ẹsise ẹban̄a utom emi ke nsio nsio itie emi mmọ ẹsede enyịn. Akpan utom mmọ edi ndinam ẹsọp ẹbọp Ufọkmbono Obio Ubọn̄, edi owo ibiatke okụk ikaha. Mmọ ẹsinyụn̄ ẹkpep nditọete ke nsio nsio idụt emi mmọ ẹsede enyịn nte ẹkpetịmde mme ufọk esop Abasi ẹkama. Ẹsiak n̄ko Itieutom Emi Ẹsede Ẹban̄a Ubọpn̄kpọ ke Idụt Mmọ (LDC) ke nsio nsio ọfis nnyịn. Mmọ ẹsiteme nte ẹkpebọpde ẹnyụn̄ ẹsede ẹban̄a Ufọkmbono Obio Ubọn̄ ye Itie Mbono.

Ke January 2015, ẹma ẹnịm mbono emi ẹkenamde kpukpru mbiowo ke United States ẹdiọn̄ọ obufa ndutịm emi ẹnamde man ẹbọp ẹnyụn̄ ẹtịm Ufọkmbono Obio Ubọn̄ ẹkama. Mmọ ẹketie ke nsio nsio itie ẹkop ẹnyụn̄ ẹkụt se ẹkenamde ke mbono oro ke TV. Se se ẹkenemede mi:

• Nte Ẹkpebọpde: Nte obio kiet kiet etiede ke ẹdida ibiere utọ ufọk emi ẹkpebọpde ye se ẹdidade ibọp, ndien ana ẹbọp nte Kọmiti Oro Ẹsede Ẹban̄a Usio N̄wed ẹdọhọde, ẹbọp ọsọn̄ idem, emem utom ndise mban̄a, onyụn̄ eye, edi owo ibiatke okụk ikaha.

• Nte Ẹkpetịmde Ẹkama: Ke esop kiet kiet, ẹyekpep nditọete emi ẹdinyịmede ndisida ini mmọ nse mban̄a mme ufọk emi nte mmọ ẹdinamde oro.

Ufọk emi anade ẹbọp ẹnyụn̄ ẹtịm ẹkama awak etieti. Obufa ndutịm emi ayanam ẹsọp ẹbọp mmọ edi owo ibiatke okụk ntịme ntịme.