Ẹyak N̄kọk Itieutom Ẹnọ Abasi

ẸMA ẹyak ọfis nnyịn ke Madagascar ẹnọ Abasi ke Saturday, January 24, 2015. Sista kiet ọkọdọhọ ete: “Esịt enem mi utọ oro idụhe.” Ama enem enye ye owo 583 eken ndikụt mbufa ubet 19, itie utemudia, ye itieudia emi ẹnamde afiak okpon. Ẹma ẹbọp mbufa ọfis ẹdian ẹnọ mbon emi ẹsitịmde utom, mbon emi ẹsede ẹban̄a n̄kpọ okụk, ye mbon emi ẹsede ẹban̄a ubọpn̄kpọ ke idụt oro. Ẹma ẹbọp n̄ko obufa itie ẹnọ mbon vidio ye mbon usem idiọn̄ọ, ẹnyụn̄ ẹtọn̄ọ ndisinam n̄wed mme nnan. Ke ẹma ẹkenọ mbụk utom ukwọrọikọ ke Madagascar ẹma, Mark Sanderson, owo Otu Emi Ẹsede Ẹban̄a Utom Mme Ntiense Jehovah, ama ọnọ utịn̄ikọ emi ẹkedade ẹyak ufọk oro ẹnọ Abasi. Mme owo ẹma ẹma utịn̄ikọ oro tutu.

Mme Ntiense Jehovah ke Jakarta ke Indonesia, ẹma ẹkọm Abasi ke ini mmọn̄ ukwọ akasatde mbemiso February 14, 2015, emi ẹkeyakde ọfis nnyịn do ẹnọ Abasi. Ọyọhọ enyọn̄ 31 ke ufọk kiet emi enyenede enyọn̄ 42 ye nsio nsio enyọn̄ 12 ke ufọk en̄wen emi ekperede enye oro ke ẹda ẹnam ọfis nnyịn emi. Nsio nsio itieutom Bethel ẹdu n̄ko ke n̄kpri ufọk en̄wen emi ẹkperede do. Anthony Morris, owo Otu Emi Ẹsede Ẹban̄a Utom Mme Ntiense Jehovah, ọkọnọ utịn̄ikọ emi ẹkedade ẹyak mme ufọk oro ẹnọ Abasi. Edem usen, owo 15,257 ẹma ẹdi an̄wambre bọl ẹdikop utịn̄ikọ esie emi, “Ka Iso Nam Utom Oro Ọfọnde.” Ẹma ẹnyụn̄ ẹsio mbono oro ke TV ẹnọ owo 11,189 ke nsio nsio itie 41 eken. Akanam owo iwakke ntem ke edinam Mme Ntiense Jehovah ke Indonesia. Kiet ke otu akpa isụn̄utom emi ẹkedide Indonesia, emi ekerede Ronald Jacka, ọkọdọhọ ete: “Ke ini n̄kedide mi ke 1951, owo 26 kpọt ẹkedi Ntiense. Edi mfịn imebe owo 26,000 ke mbono emi. Jehovah enen̄ede ọdiọn̄ ikọt esie ke Indonesia!”