Ẹyak N̄kọk Itieutom Ẹnọ Abasi

NDITỌETE ke Kyrgyzstan ye isenowo ẹma ẹdian ubọk ẹn̄wam ẹdiọn̄ ẹnyụn̄ ẹbọp mbufa ufọk ẹdian ke n̄kọk itieutom ke Bishkek, ibuot obio Kyrgyzstan. Mmọ ẹma ẹnam utom ofụri isua kiet ye ubak tutu utom oro okụre, ikpaha mba. Ọfiọn̄ kiet ke ẹma ẹkekụre utom oro, ẹma ẹyak itieutom oro ẹnọ Abasi ke October 24, 2015. Mbon emi ẹketiede ke Ufọkmbono Obio Ubọn̄ 18 ye itie 5 en̄wen ẹse edinam oro ke tv ẹma ẹbe 3,000. Stephen Lett, owo Otu Emi Ẹsede Ẹban̄a Utom Mme Ntiense Jehovah ekedi etịn̄ikọ emi akayakde itie oro ọnọ Abasi. Ibuotikọ esie ekedi, “Nam N̄kpọ Jehovah ke Ofụri Esịt.” Edem usen oro, ẹma ẹnịm mboho emi ọkọsọn̄ọde ediwak ikọt Jehovah ke idụt oro idem.

Ke Saturday, May 14, 2016, owo 6,435 ẹma ẹdụk edinam ediyak n̄kọk itieutom Armenia nnọ Abasi. Enye odu ke nsio nsio enyọn̄ itiokiet ke ediye ufọkenyọn̄ emi enyenede enyọn̄ 18. Ẹma ẹtiene ẹyak Itie Mbono ye ufọk emi ẹsinịmde Ufọkn̄wed Mme Ọkwọrọ Obio Ubọn̄ ẹnọ n̄ko. Ke edinam oro, ẹma ẹtịn̄ nte ikọt Jehovah ẹketọn̄ọde utom ke Armenia. Mbon Armenia emi ẹkewọrọde ẹkedụn̄ ke United States ẹkekop akpanikọ ke n̄kpọ nte isua 100 emi ekebede, akpanikọ okonyụn̄ esịm Armenia n̄kpọ nte isua 40 emi ekebede. Ini oro Armenia okodu ke Soviet Union. Ibịghike ukara Armenia ẹkesịn nnyịn enyịn̄ ke n̄wed, ẹma ẹnyụn̄ ẹsiak ọfis nnyịn do. Ediwak mbon emi ẹkedụkde edinam oro ikereke ke utọ n̄kpọ oro ekpetịbe ke eyo uwem mmimọ. Ata akpan ikpehe ke edinam oro ekedi ini emi kpukpru mbon emi ẹkedụkde edinam oro ẹkediande uyo ẹdọhọ David Splane, owo Otu Emi Ẹsede Ẹban̄a Utom Nnyịn, ke imenyịme ẹyak nsio nsio ufọk oro ẹnọ Jehovah.