Ẹnam Ẹkwọrọ Ikọ ke Ofụri Ererimbot Ẹkan Akpa

KE Wednesday, September 23, 2015, Otu Emi Ẹsede Ẹban̄a Utom Mme Ntiense Jehovah ẹma ẹdọhọ mbon Bethel ke ofụri ererimbot, ke esop Abasi ẹmọn̄ ẹkpụhọ nte ẹsinamde ndusụk n̄kpọ man ẹda okụk ẹnam se inen̄erede idi akpan n̄kpọ. Ke Saturday, October 3, 2015, otu oro ẹma ẹdọhọ ke sia Philippi 1:10 ọdọhọde ‘yak idụn̄ọde ifiọk se idide akpan n̄kpọ ikan,’ ke mmimọ iyom nditịn̄ enyịn nnam mme n̄kpọ oro ẹdinen̄erede inyene ufọn inọ ikọt Abasi, emi edinyụn̄ an̄wamde ẹnen̄ede ẹkwọrọ ikọ ke ofụri ererimbot.

Stephen Lett emi edide owo otu oro ama afiak ọdọhọ ke Edinam TV Mme Ntiense Jehovah ete: “Otu Emi Ẹsede Ẹban̄a Utom Mme Ntiense Jehovah ẹnen̄ede ẹyom ẹnam utom ukwọrọikọ emi usọp usọp idahaemi. Oro anam nnyịn ikere nte ikposiode urua ke okụk emi isibiatde ke nsio nsio n̄kọk itieutom man ẹnen̄ede ẹsịn okụk ẹnam utom ukwọrọikọ. Ke uwụtn̄kpọ imebiere nditre ata ediwak n̄kpọ emi ikesinamde ke Bethel mîdịghe isio urua ke ndusụk. Ke ntak oro, owo idisiwakke aba ke Bethel nte ẹkesiwakde.”

Ọtọn̄ọde ke September 2015, ẹma ẹdọhọ n̄kpọ nte owo 5,500 ẹkpọn̄ Bethel ẹkekwọrọ ikọ. Idịghe ekpri ukpụhọde ekedi emi, edi Jehovah ama ọdiọn̄ ubiere emi, imonyụn̄ ikụt ke emi anam ẹkwọrọ ikọ ẹnyụn̄ ẹkpep ediwak owo Ikọ Abasi ke nsio nsio ebiet.

Ini ẹkedọhọde ebe ye n̄wan kiet ke Bethel ke Sri Lanka ẹkekwọrọ ikọ, mmọ ẹkedọhọ ke ida oro nte ifet ndiwụt ke imọbuọt idem ye Jehovah inyụn̄ inịm ke esop esie inamke ndudue. Mmọ ẹkewet ẹte: “Nnyịn ikọdiọn̄ọke nte n̄kpọ editiede, edi ima idiọn̄ọ ke Jehovah idikpọn̄ke nnyịn. Ntre ima ibọn̄ akam ite, ‘Jehovah mbọk, ọkpọkọm nso itịbe, n̄wam nnyịn idiọn̄ọ nte idude uwem man nnyịn mbiba ikeme ndisiak usụn̄.’ Akpa ọfiọn̄ oro, okụk ama asat nnyịn ke ekpat. Edi Jehovah ama akama nnyịn, ima inyụn̄ ikụt ke enye ama nnyịn. Utom emi inamde idahaemi esinọ nnyịn okụk ise iban̄a idem nnyịn. N̄kpọ ọyọyọhọ nnyịn ubọk​—⁠ika utom, inam n̄kpọ ke ufọk, inam utom usiakusụn̄. Edi se ikekpepde ke Bethel an̄wam nnyịn idiọn̄ọ ini emi ikpanamde n̄kpọ kiet kiet. Idụhe se inemde nte ndin̄wam mme owo ẹdiọn̄ọ akpanikọ. Enem nnyịn ndidi mme asiakusụn̄ sia oro anam yak in̄wam mme owo ẹdiọn̄ọ akpanikọ.”

Ndusụk mbon Bethel ke Colombia emi ẹkedọhọde ẹkekwọrọ ikọ ẹma ẹkpep obufa usem ẹnyụn̄ ẹwọrọ ẹka esịt esịt obio ẹkekwọrọ etop Obio Ubọn̄ ẹnọ mme owo. Jehovah ada mmọ an̄wam mme owo ke mbufa esop mmọ. Esenyịn circuit kiet ama ewet n̄kpọ aban̄a ebe ye n̄wan kiet emi ẹkenọde ẹka esop kiet ke circuit esie. Enye ọkọdọhọ ete: “Nditọete ke esop oro ẹma se mmọ ẹnamde ẹnọ mmọ etieti. Mme owo ke esop oro ẹka ukwọrọikọ idahaemi ẹkan nte ẹkesikade, ke ẹnyụn̄ ẹkpep irenowo ke esop oro nte ẹkpenamde nsio nsio utom ke esop.” Ediwak nditọete emi ẹkesidude ke Bethel akpa ẹnyịme ndisito ufọk mmọ n̄ka n̄kan̄wam ke Bethel usen kiet ke urua m̀mê akande oro.

Ẹma ẹnọ eyenete kiet emi okodude isua 31 ke Bethel Japan aka esop emi mbiowo iba kpọt ẹkedude ke Kumamoto. Sia esop oro ẹkeyomde ndidiọn̄ Ufọkmbono Obio Ubọn̄, eyenete oro ama ọdọhọ ke imọ idikaha utom urua iba man ikeme nditiene n̄n̄wam. Edi mbemiso ẹtọn̄ọde utom oro, akamba unyekisọn̄ ama etịbe ke obio oro. Sia eyenete oro ama ekebebiere ke imọ idikaha utom urua iba, enye ama ada iso ke ndin̄wam mbon emi unyekisọn̄ akabiatde n̄kpọ mmọ nnyụn̄ ndọn̄ nditọete esịt. Enye ọdọhọ ete: “Ke ini ntide se iketịbede oro, nsidọhọ ke Jehovah akanam mi ntiene n̄ka itie emi mme owo ẹdinen̄erede iyom un̄wam.”

Phil ye Sugar, emi ẹkesidude ke n̄kọk itieutom Australasia, ẹdọhọ ẹte: “Ini ẹkedọhọde ikpọn̄ Bethel, ima ibiere ke nnyịn idiyomke ikpọ n̄kpọ. Ima iben̄e Jehovah ite an̄wam nnyịn idiọn̄ọ nnennen n̄kpọ emi ikpanamde onyụn̄ ọdiọn̄ se ededi emi inamde. Ikoyom ndika n̄kodu ye esop ke idụt en̄wen n̄kwọrọ ikọ. Jehovah ọdiọn̄ se ikebierede ndinam onyụn̄ anam emem nnyịn utom ndida ofụri ini nnyịn nnam n̄kpọ esie!” Mmọ mbiba ẹdu idahaemi ye ekpri otu Ikọmbakara ke Samal Island, ke Davao, ke Philippines. Mme asuanetop 34 ye mme asiakusụn̄ ofụri ini 9 ẹdu do. Phil ye Sugar ẹnyene owo 120 emi ẹmade ndikpep Ikọ Abasi. Mmọ ẹdọhọ ẹte: “Utom okpon mi, edi enenem nnyịn. Esịt enem nnyịn nte ikeberide edem ke Jehovah. Emi anam itetịm ima Jehovah inyụn̄ ibuọt idem ye enye!”

Ẹma ẹdọhọ sista kiet ke Bethel ke Russia ẹte ekedi akpan asiakusụn̄ ke obio kiet​—⁠enye idọhọ ebe. Sista oro ọdọhọ ete: “Ami ndidi asiakusụn̄ anam n̄keme ndinen̄ede nsịn idem ntiene n̄kwọrọ mban̄a Obio Ubọn̄ Abasi, nnyụn̄ nnam ata akpan utom emi owo mîdinamke aba ini ama ekem. Enem mi nte Jehovah adade mi an̄wam mme owo.” Sista oro ke ekpep owo itiokiet Bible idahaemi; mmọ ẹto Iraq, Nigeria, Sri Lanka, Syria, ye Zambia.

Ẹma ẹdọhọ ediwak mbon Bethel ke Zambia ẹfiak ẹka mme esop ẹkedi mme asiakusụn̄ ofụri ini. Nte mmọ ẹnen̄erede ẹkwọrọ ikọ ẹnyụn̄ ẹkpepde mme owo Ikọ Abasi idahaemi enem mmọ etieti. Andrew emi enye ye n̄wan esie edide asiakusụn̄ ofụri ini ọkọdọhọ ete: “Ibịghike ke ima ikọkpọn̄ Bethel, ima in̄wam owo iba ẹdiọn̄ọ ndikot n̄wed nnyụn̄ n̄wet n̄kpọ. Owo kiet ke otu mbon emi isikpepde Bible edi eyen isua duop. Enye ọmọn̄ okot Bible ke mbono esop urua emi; akpa ini enye edinamde n̄kpọ ke mbono esop edi emi. Ebe ye n̄wan kiet emi ikọkwọrọde ikọ inọ ẹma ẹdi Editi n̄kpa Christ, tọn̄ọ oro mmọ ifiakke mbono esop. Mmọ ke ẹsịn idem ẹkpep Bible. Ikere ke nnyịn nditiene ndausụn̄ Jehovah, ndiyak enye an̄wam nnyịn, nnyụn̄ mbet enye ọdiọn̄ nnyịn anam inyene kpukpru emi.”

Ọfiọn̄ ifan̄ kpọt ke Edson ye Artness ke Zambia ẹma ẹkenam ndọ, ẹma ẹdọhọ mmọ ẹkpọn̄ Bethel ẹka esop. Artness ọdọhọ ete: “Se ikekpepde ke Bethel an̄wam nnyịn idiọn̄ọ nte ibiatde ekpri okụk emi inyenede, onyụn̄ anam ikop inemesịt ikûnyụn̄ udụk isọn. Nnyịn ituaha n̄kpọfiọk nte ikakade Bethel. Ima ikpep ndikpụhọde se idade uwem nnyịn inam ke utom Jehovah, enye onyụn̄ an̄wam nnyịn inam enye emi inamde idahaemi. Imọbuọt idem ke Jehovah idahaemi ikan akpa, imonyụn̄ ibiere ke nnyịn idikpọn̄ke enye.”