Mme Owo Idaha Ikọ Mbon Pọlitiks ke N̄kpọ Aba​—Se Bible Etịn̄de

Ibat election oro ẹdinamde ke ofụri ererimbot ke 2024 emi ayakan ibat election oro esinamde ke ofụri ererimbot ke mme isua eken. Edi, ediwak owo inịmke se mbon pọlitiks ẹtịn̄de aba.

• Ke September 19, 2023, mbon Pew Research Center ẹkedọhọ ẹte: N̄wakn̄kan ndụn̄ọde oro ẹnamde ke America owụt ke “ibụk ẹsinam ediwak owo ẹyom ndidi mbon pọlitiks” idịghe ndinam se idifọnde ye mbon en̄wen.a

Ediwak mme uyen n̄ko inịmke se mbon pọlitiks ẹtịn̄de aba.

• N̄wedmbụk n̄kpọntịbe, The New York Times, eke January 29, 2024, ọkọdọhọ ete: “Se ibehede mme uyen mfịn edi nte ikpasan̄ade itre mme mfịna oro inyenede, edi ndụn̄ọde oro ẹnamde owụt ke mbon pọlitiks isikereke-kere utọ n̄kpọ oro.”

• N̄wedmbụk n̄kpọntịbe, The Korea Times, eke January 22, 2024, ọkọdọhọ ete: “Ke ndụn̄ọde oro ẹkenamde, nsio nsio mme owo ẹma ẹtịn̄ ke mme uyen ẹnịm se mbon YouTube ẹtịn̄de, ẹkan se mbon pọlitiks ẹtịn̄de.”

Ndi ọfọn idori enyịn mbon pọlitiks ndinam n̄kpọ ọfọn ke ini iso? Anie ke ikpodori enyịn ke ayanam n̄kpọ ọfọn?

Kpeme mbon emi ọbuọtde idem

Ọfọn mme owo ndikpeme mbon emi mmọ ẹbuọtde idem. Bible ọdọhọ ete: “Ọkọi ọbuọt idem ke kpukpru ikọ, edi owo mbufiọk ekere ikpatisan̄ esie.”​—Mme N̄ke 14:15.

• Man ekeme ndidiọn̄ọ m̀mê se okopde edi akpanikọ m̀mê nsu, kot ibuotikọ emi “Kûyak Ẹbian̄a Fi.”

N̄kpọ en̄wen edi, ke ndusụk nti mbon pọlitiks isikemeke ndinam se mmọ ẹkpemade ndinam. Ntak edi oro Bible odụride nnyịn utọn̄ ete:

• “Mbufo ẹkûbuọt idem ye mbọn̄, ẹkûnyụn̄ ẹbuọt ye eyen owo, emi edinyan̄a mîdụhe enye ke ubọk.”​—Psalm 146:3.

Andikara emi ekemede ndibuọt idem

Bible etịn̄ ke Abasi emek andikara emi enyenede odudu ndinam kpukpru n̄kpọ, emi inyụn̄ ikemede ndibuọt idem. Enye edi Jesus Christ. (Luke 1:32, 33) Jesus edi Edidem Obio Ubọn̄ Abasi, ukara emi editiede ke heaven ikara.​—Matthew 6:10.

• Edieke oyomde ndidiọn̄ọ ntak emi ikpọbuọtde idem ye Jesus, onyụn̄ enịmde ke enye ayanam mme mfịna oro inyenede ẹtre, kot mme ibuotikọ emi “Anie Edi Edidem Obio Ubọn̄ Abasi?” ye “Nso ke Obio Ubọn̄ Abasi Edinam?”