Nso ke Owo Ndidi Christian Ọwọrọ?​—Nso ke Bible Etịn̄?

Mfịn, ediwak owo ke ererimbot ẹdọhọ ke mmimọ idi mme Christian, edi mmọ ẹsinam n̄kpọ abiakde mbon en̄wen. Ndusụk mmọ ẹdi ata ibụk, ndusụk isinamke akpanikọ, mîdịghe ẹdiọk uwem ye mbon en̄wen. Ndusụk mmọ ẹsikam ẹkpọn̄ ebe m̀mê n̄wan mmọ ẹkema owo en̄wen. Nte mmọ ẹsinamde n̄kpọ esinam ndusụk owo ẹkere: ‘Nso ke owo ndidi Christian enen̄ede ọwọrọ?’

Se owo ndidi Christian enen̄ede ọwọrọ

Esimem utom owo ndidọhọ ke imọ idi Christian. Edi owo ndidi Christian ikụreke ke ndinyụn̄ ntetịn̄ ke inua kpọt. Bible anam idiọn̄ọ ke owo emi edide Christian edi mbet Jesus Christ. (Utom 11:26) Jesus ke idemesie ọkọdọhọ ete: “Edieke ikọ mi odude ye mbufo, mbufo ẹdi mbet mi ke akpanikọ.” (John 8:31) Imọdiọn̄ọ ke idụhe owo emi ekemede ndikop uyo Jesus ata ofụri ofụri. Edi ana mme Christian ẹdomo ndinam se Jesus ekekpepde ẹnyụn̄ ẹwụt emi ke nte mmọ ẹbierede ndidu uwem kpukpru usen. Se uwụtn̄kpọ ifan̄ mi.

Mme Christian ẹsima mme owo ata ima

Se Jesus eketịn̄de: “Ami mmọnọ mbufo obufa ewụhọ, nte mbufo ẹma kiet eken; kpa nte n̄kamade mbufo, nte mbufo n̄ko ẹma kiet eken. Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.”​—John 13:34, 35.

Se Jesus akanamde: Jesus akama mme owo ata ima, enye ikasarike owo ndomokiet. Enye ama ọkọk mme owo udọn̄ọ, ọnọ mme owo udia, onyụn̄ ọnọ uwem esie ke ibuot kpukpru owo.​—Matthew 14:14-21; 20:28.

Se mme Christian ẹsinamde: Mme Christian ẹsima mme owo ata ima. Mmọ ẹsitat ubọk ẹnọ mme owo n̄kpọ, isisarike owo, ẹsịnyụn̄ ẹfen ẹnọ mme owo. Mme Christian ẹsin̄wam mbon oro ẹyomde un̄wam, mmọ esinyụn̄ ẹyak n̄kpọ atak mmọ man ẹn̄wam mbon en̄wen.​—1 John 3:16.

Mme Christian ẹsinam akpanikọ

Se Jesus eketịn̄de: “Ami ndi . . . akpanikọ.”​—John 14:6.

Se Jesus akanamde: Jesus ama esinam akpanikọ ke se enye etịn̄de ye se enye anamde. Enye ikesibian̄ake mme owo ikesinyụn̄ inamke mme owo ẹnịm se mîdịghe akpanikọ. Mme owo ẹma ẹdiọn̄ọ ke enye esinam akpanikọ, ndien emi ama anam ẹsikọbọ enye.​—Matthew 22:16; 26:63-67.

Se mme Christian ẹsinamde: Mme Christian isisụho nsu. Mmọ ẹsikpe tax, mmọ isiyịpke inọ, mmọ ẹsinyụn̄ ẹnam utom ẹtre ke ini oro akpanade ẹtre. (Rome 13:5-7; Ephesus 4:28) Mmọ isitọhọ mme owo ibọ n̄kpọ, isiyịpke udomo, ẹsinyụn̄ etịn̄ akpanikọ ke se mmọ ẹwetde ke n̄wed uyom utom mmọ.​—Mme Hebrew 13:18.

Mme Christian ẹsifọn ido ye mme owo

Se Jesus eketịn̄de: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu. Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde idem, ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ mi ememem, mbiomo mi onyụn̄ efefere.”​—Matthew 11:28-30.

Se Jesus akanamde: Jesus ama esifọn ido, mme owo ẹma ẹsinyụn̄ ekpere enye. Enye ama esiyak nditọwọn̄ ẹdi ẹbịne enye, ọdọn̄ mbon oro ẹfụhọde esịt, onyụn̄ okpono mme owo.​—Mark 10:13-15; Luke 9:11.

Se mme Christian ẹsinamde: Mme Christian ẹsitịn̄ ikọ emem emem ye mme owo; mmọ isisọn̄ke ido isinyụn̄ isụn̄ike owo. (Ephesus 4:29, 31, 32) Mme Christian ẹsikere ẹban̄a mme owo, ẹnam se ẹkekeme ndin̄wam mmọ.​—Galatia 6:10.

Mme Christian isikpọn̄ke ebe mmọ m̀mê n̄wan mmọ ikama owo en̄wen

Se Jesus eketịn̄de: “Se Abasi ama akadian yak baba owo kiet okûdian̄ade.”​—Mark 10:9.

Se Jesus akanamde: Kpa ye oro Jesus mîkọdọhọ n̄wan, enye ama etịn̄ se idin̄wamde mme ọdọ ndọ ẹkûkpọn̄ kiet eken. (Matthew 19:9) Enye ama odụri mmọ utọn̄ aban̄a mme n̄kpọ oro ẹkemede ndinam owo ekesịn efịbe, ndo onyụn̄ abiara.​—Matthew 5:28.

Se mme Christian ẹsinamde: Mme Christian isinamke n̄kpọ ekededi emi owụtde ke mmọ ikponoke ndọ mmọ. (Mme Hebrew 13:4) Ebe ye n̄wan ẹsinen̄ede ẹma ẹnyụn̄ ẹkpono kiet eken.​—Ephesus 5:28, 33.