Ini Ewe ke Ẹkewet Mbụk Jesus?

Se Bible ọdọhọde

Kop se apostle John ekewetde aban̄a mbụk uwem Jesus: “Owo oro okokụtde n̄kpọ emi etie ntiense, ikọ ntiense esie onyụn̄ edi akpanikọ, ndien owo oro ọfiọk ete imọ itịn̄ mme n̄kpọ emi ẹdide akpanikọ, man mbufo n̄ko ẹkpenịm ke akpanikọ.”—John 19:35.

Ntak kiet emi anamde inịm se ẹwetde ke Matthew, Mark, Luke, ye John edi nte ke ẹkewet mme Gospel emi ke ini mbon oro ẹkekụtde mbụk emi ẹkesụk ẹdude uwem. Ẹdọhọ ke ẹkewet Matthew ke n̄kpọ nte isua itiaita ẹma ẹkebe tọn̄ọ Christ akakpa. Ediwak nta mme ekpep n̄kpọ mban̄a Bible ẹdọhọ ke ama ebịghi akan oro, edi ata ediwak n̄kpọ ẹdu emi ẹwụtde ke ẹkewet Matthew esịm Ediyarade ke eyo mme apostle.

Mbon oro ẹkekụtde Jesus ini enye odude ke isọn̄, ini enye akpade, ye ini enye esetde ẹma ẹkeme ndiwụt ke se ẹwetde ke mme Gospel ẹban̄a Jesus ẹdi akpanikọ. Edieke mbụk emi mîkpekedịghe akpanikọ, mmọ ẹkpeketịn̄. Prọfesọ F. F. Bruce ọdọhọ ete: “N̄kpọ kiet emi enen̄erede owụt ke se mme apostle ẹkekwọrọde edi akpanikọ edi ke mmọ ikesidọhọke mme owo n̄kukụre ite, ‘Se nnyịn ikokụtde edi emi,’ edi ẹma ẹsidọhọ n̄kọ ẹte, ‘Kpa nte mbufo ẹfiọkde’ (Utom 2:22).”