Nso ke Oyom Inam Man Bible An̄wan̄a Nnyịn?

Se Bible ọdọhọde

Bible ke idemesie etịn̄ ediwak n̄kpọ oro ikpanamde man se ikotde an̄wan̄a nnyịn. Inamke n̄kpọ m̀mê nso utọ owo ke afo edi, etop Abasi emi odude ke Bible “isọn̄ke ikan fi ndinam, inyụn̄ iyomke usụn̄.”—Deuteronomy 30:11.

Se oyomde inam man Bible an̄wan̄a nnyịn

1. Nyene nnennen edu. Da Bible nte Ikọ Abasi. Sụhọde idem koro Abasi imaha mbon ntan̄idem. (1 Thessalonica 2:13; James 4:6) Edi kûnịm kpukpru se ẹsiande fi—Abasi oyom ada “ukeme ukere n̄kpọ” oro enye ọnọde fi odụn̄ọde ọfiọk se idide akpanikọ.—Rome 12:1, 2.

2. Bọn̄ akam ben̄e ọniọn̄. Bible ọdọhọ ke Mme N̄ke 3:5 ete, ‘kûberi edem ke asian fo.’ Utu ke oro, ‘ka iso ndiben̄e Abasi’ ọnọ fi ọniọn̄ man se okotde ke Bible an̄wan̄a fi.—James 1:5.

3. Kpep Bible kpukpru ini. Eyenen̄ede ọbọ ufọn edieke ekpepde Bible kpukpru ini utu ke ndikpep enye ntomo ntomo.—Joshua 1:8.

4. Nyene ibuotikọ emi oyomde ndikot mban̄a. Ndinyene ibuotikọ emi oyomde ndikpep mban̄a ke Bible eyenen̄ede an̄wam fi ọfiọk se N̄wed Abasi ekpepde. Tọn̄ọ ye mme “akpa ukpepn̄kpọ” ndien ekem kpep ban̄a ntọtụn̄ọ ukpepn̄kpọ. (Mme Hebrew 6:1, 2) Afo eyekeme ndida itien̄wed kiet ndomo ye efen onyụn̄ okụt nte ndusụk itien̄wed ẹnamde mme itien̄wed eken ẹn̄wan̄a, esịnede mme itien̄wed oro “ẹsọn̄de owo ndifiọk.”—2 Peter 3:16.

5. Dọhọ mbon efen ẹn̄wam fi. Ikọ Abasi esịn udọn̄ ọnọ nnyịn ndinyịme mbon oro ẹfiọkde Bible ẹn̄wam nnyịn. (Utom 8:30, 31) Mme Ntiense Jehovah ẹsikpep mme owo Bible ke mfọn. Ukem nte mme Christian eyo mme apostle, mmọ ẹsikot nsio nsio itie N̄wed Abasi man ẹn̄wam mme owo ẹfiọk se Bible enen̄erede ekpep.—Utom 17:2, 3.

Se mîyomke

1. Akwa ifiọkn̄wed. Mme apostle Jesus 12 ẹma ẹfiọk se Bible ekpepde ẹnyụn̄ ẹsikpep mbon en̄wen kpa ye oro ndusụk owo ẹkedade mmọ nte “mmọ emi mîfiọkke n̄wed ye mme usụhọde owo.”—Utom 4:13.

2. Okụk. Afo emekeme ndifiọk se Bible ekpepde ke mfọn. Jesus ọkọdọhọ mme mbet esie ete: “Mbufo ẹkebọ ke mfọn, ẹnọ ke mfọn.”—Matthew 10:8.