Ini Ewe ke Utịt Ererimbot Edidi?

Se Bible ọdọhọde

Edieke iyomde ndidiọn̄ọ ini emi utịt ererimbot edidide, ọkpọfọn idiọn̄ọ kan̄a se Bible okotde “ererimbot.” Ẹsiwak ndikabade ikọ Greek emi koʹsmos nte “ererimbot.” Ke ediwak itie ke Bible, ikọ oro esiwọrọ mme owo, akpan akpan mbon oro mînamke uduak Abasi. (John 15:18, 19; 2 Peter 2:5) Ndusụk ini, koʹsmos ekeme ndiwọrọ ndutịm unyamurua, ido ukpono, ye n̄ka ukaraidem ererimbot emi.—1 Corinth 7:31; 1 John 2:15, 16.a

Nso idi “utịt ererimbot”?

Ikọ oro “utịt ererimbot” odu ke ediwak Bible; ẹkeme ndikabade enye n̄ko nte “akpatre ini editịm n̄kpọ emi,” m̀mê “akpatre ini eyo emi.” (Matthew 24:3; Edisana Ŋwed Abasi Ibom) Ikọ oro iwọrọke ke ẹyesobo isọn̄ m̀mê kpukpru owo ẹfep, edi ọwọrọ ke ẹdisobo ndutịm unyamurua, ido ukpono, ye n̄ka ukaraidem ererimbot emi.—1 John 2:17.

Bible ọdọhọ ke “ẹyesịbe mme anamidiọk ẹfep” man nti owo ẹkeme ndidụn̄ ke isọn̄ emi ke ifụre ye ke emem. (Psalm 37:9-11) Ẹdisobo mme idiọkowo ke ini “akwa ukụt” emi editrede ke ekọn̄ Armageddon.—Matthew 24:21, 22; Ediyarade 16:14, 16.

Ini ewe ke utịt ererimbot edidi?

Jesus ọkọdọhọ ete: “Baba owo kiet ifiọkke usen ye hour oro, mme angel ke heaven ifiọkke, Eyen inyụn̄ ifiọkke, ke mîbọhọke Ete ikpọn̄.” (Matthew 24:36, 42) Enye ama onyụn̄ ọdọhọ ke utịt ererimbot edibabuat mme owo, “ke hour emi mbufo mîkereke.”—Matthew 24:44.

Kpa ye emi nnyịn mîdiọn̄ọke ata nnennen usen ye hour oro, Jesus ama ọnọ nnyịn “idiọn̄ọ,” m̀mê nsio nsio n̄kpọ oro edinamde nnyịn idiọn̄ọ ini emi utịt ererimbot enen̄erede ekpere. (Matthew 24:3, 7-14) Bible okot ini oro “utịt ini,” ye “mme akpatre usen.”—Daniel 12:4; 2 Timothy 3:1-5.

Ndi ẹyesobo isọn̄ ẹfep utịt ererimbot ama edi?

Ihih. Isọn̄ oyosụk odu, sia Bible ọdọhọ ke isọn̄ “idisehekede tutu amama, m̀mê ke nsinsi.” (Psalm 104:5) Mme owo ẹyedụn̄ ẹyọhọ isọn̄ emi sia Bible ọdọhọ ete: “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Abasi ayanam isọn̄ emi etie nte enye okoyomde toto ke editọn̄ọ:

• Isọn̄ edidi Paradise.—Isaiah 35:1; Luke 23:43.

• Mme owo ẹyenyene emem ye ifụre, n̄kpọ oyonyụn̄ ọfọn.—Micah 4:4.

• Kpukpru owo ẹyenam utom emi mmọ ẹmade onyụn̄ enemde mmọ.—Isaiah 65:21-23.

• Mme owo ididọn̄ọke aba idinyụn̄ isọn̄ke.—Job 33:25; Isaiah 33:24.