Jesus Owụt Mme Ọkọiyak Idem

Ikebịghike ke Jesus ama okowụt mme apostle esie idem, Peter ama adaha ukọiyak ke Inyan̄ Galilee. Thomas, James, John, ye ndusụk mbet eken ẹma ẹtiene enye ẹka. Mmọ ẹma ẹdu do ofụri okoneyo oro imụmke iyak ndomokiet.

Tụhi-tụhi usenubọk, mmọ ẹma ẹkụt owo ke mbenesụk. Enye ama ada obụp mmọ ete: ‘Ndi ẹma ẹmụm iyak ndomokiet?’ Mmọ ẹma ẹdọhọ: “Ihih!” Enye ama ọdọhọ mmọ ẹduọk iyịre ke ubọk nnasia. Ke mmọ ẹma ẹkeduọk iyịre, iyak ama ọyọhọ iyịre tutu mmọ ikemeke ndikot iyịre nsịn ke ubom. John ama ọsọsọp ọdiọn̄ọ ke Jesus edi oro onyụn̄ ọdọhọ ete: “Edi Ọbọn̄!” Peter ama ọfrọ inikiet odụk mmọn̄ ọwọk aka obot. Mbet eken ẹma ẹwat ẹtiene.

Ini mmọ ẹsịmde esụk, mmọ ẹma ẹkụt bred ye iyak ke ikan̄. Jesus ama ọdọhọ mmọ ẹda ndusụk iyak ẹdidian do. Ekem enye ọdọhọ mmọ ete: ‘Ẹdidia n̄kpọ.’

Ke ẹma ẹkedia n̄kpọ ẹma, Jesus ama obụp Peter: ‘Ndi amama mi akan ukọiyak?’ Peter ama ọdọhọ ete: ‘Ih! Ọbọn̄ ọmọdiọn̄ọ ke mmama fi.’ Jesus ama ọdọhọ ete: “Bọk nditọerọn̄ mi.” Jesus ama afiak obụp ete: ‘Peter, ndi amama mi?’ Peter ama ọdọhọ ete: ‘Ọbọn̄, afo ọmọdiọn̄ọ ke mmama fi.’ Jesus ama ọdọhọ ete: “Kpeme n̄kpri erọn̄ mi.” Jesus ama afiak obụp mbụme oro ọyọhọ ikata. Peter ama enen̄ede ofụhọ onyụn̄ ọdọhọ ete: ‘Ọbọn̄, afo ọmọfiọk kpukpru n̄kpọ. Ọmọdiọn̄ọ ke mmama fi.’ Jesus ama ọdọhọ ete: “Bọk n̄kpri erọn̄ mi.” Ekem enye ama ọdọhọ Peter ete: “Ka iso tiene mi.”