Jesus Ọnọ Ata Ediwak Owo Udia

Ke ini mme apostle Jesus ẹkenyọn̄de ukwọrọikọ emi mmọ ẹkekade ke nsio nsio obio ẹdi, Jesus ama ada mmọ odụk ubom aka Bethsaida man ẹkeduọk odudu. Emi eketịbe esisịt ini mbemiso usọrọ Passover isua 32 C.E. Edi ke ini ubom mmọ ekekperede mbenesụk, Jesus ama okụt ke ediwak tọsịn owo ẹma ẹwọn̄ọde ẹkeda do ẹbet mmọ. Kpa ye oro Jesus ekedide do man mme apostle esie ẹdiduọk odudu, enye ikọdọhọke mmọ ẹnyọn̄ọ. Enye ama anam idem ọsọn̄ mbon udọn̄ọ emi mmọ ẹkedade ẹdi, onyụn̄ ọtọn̄ọ ndikpep mmọ n̄kpọ. Enye ama ekpep mmọ aban̄a Obio Ubọn̄ Abasi ofụri usen oro. Ke mbubreyo, mme apostle esie ẹma ẹdọhọ enye ẹte: ‘Biọn̄ ọdọn̄ mme owo emi. Dọhọ mmọ ẹnyọn̄ man ẹkeyom n̄kpọ ẹdia.’

Jesus ama ọdọhọ ete: ‘Ẹkûdọhọ mmọ ẹnyọn̄ọ, ẹnọ mmọ n̄kpọ ẹdia.’ Mme apostle esie ẹma ẹbụp enye ẹte: ‘Ndi ikedep bred isọk mmọ?’ Apostle emi ekekerede Philip ama ọdọhọ ete: ‘Ekpededi imakama okụk awak, idikemke se idep yak ekem utọ udịm owo emi.’

Jesus ama obụp mmọ ete: ‘Nso ye nso idu?’ Andrew ama ọbọrọ ete: ‘Bred ition ye n̄kpri iyak iba. Enye oro ikemke n̄kpọ ndomokiet.’ Jesus ama ọdọhọ ẹmen bred ye iyak oro ẹdi, onyụn̄ ọdọhọ otuowo ẹsụhọde ẹtie ke mbiet, ke otu ke otu. Ndusụk otu ẹkedi owo 50, ndusụk owo 100. Jesus ama ọbọ bred ye iyak oro, emenede enyịn ese enyọn̄, ọbọn̄ akam, ekem ọnọ mme apostle esie ẹdeme. Irenowo 5,000 ye kpukpru iban ye nditọwọn̄ emi ẹkedude do ẹma ẹdia n̄kpọ ẹyụhọ. Ke mmọ ẹma ẹkedia ẹma, mme apostle ẹma ẹtan̄ nyọhọ nsụhọ mbak n̄kpọ ndomokiet iditak. Se mmọ ẹketan̄de ama ọyọhọ akpasa 12. Ndi idịghe ata utịben̄kpọ ekedi oro?

Ama enem mme owo tutu mmọ ẹyom ndimek Jesus edidem. Edi Jesus ama ọdiọn̄ọ ke idịghe ini oro ke Jehovah oyom imọ idi edidem. Enye ama ọdọhọ mmọ ẹnyọn̄ọ, onyụn̄ ọdọhọ mme apostle esie ẹka edem Inyan̄ Galilee n̄kan̄ oko. Mme apostle ẹma ẹdụk ubom ẹwat ẹdaha, Jesus onyụn̄ asan̄a ikpọn̄ ọdọk enyọn̄ obot. Ntak emi enye akanamde ntre? Enye okoyom ndidu ikpọn̄ mbọn̄ akam nnọ Ete esie. Kpa ye oro Jesus ekenyenede ediwak n̄kpọ ndinam, enye ikesitreke ndibọn̄ akam.