Ofụn Emi Akabakde Abasi

Joseph ekedi udiana akpatre eyen Jacob. Ikpọ nditọete esie ẹma ẹkụt ke ete mmọ ama enye akan mmimọ. Esịt ikenemke mmọ. Mmọ ẹma ẹfịbe enye ẹnyụn̄ ẹsua enye. Ke ini Joseph akadabade esen esen ndap, enye ama etịn̄ ọnọ mmọ. Ndap oro ọkọwọrọ ke mmọ ẹyetuak ibuot ẹnọ Joseph usen kiet usen kiet. Oro ama anam mmọ ẹdọdiọn̄ ẹsua enye!

Usen kiet, ke ini nditọete Joseph ẹkekpemede erọn̄ ẹkpere Shechem, ete mmọ ama ọdọn̄ Joseph ekese nte n̄kpọ etiede ye mmọ. Ke ini mmọ ẹkedade ẹkụt Joseph ke anyan usụn̄, mmọ ẹma ẹdọhọ ẹte: ‘Se ete adaba ndap oro ko, ke edi. Ẹyak imụm enye iwot!’ Mmọ ẹma ẹmụm enye ẹtop ẹsịn ke ntotụn̄ọ obube. Owo mmọ kiet emi ekekerede Judah ama ọdọhọ mmọ ete: ‘Ẹkûwot enye! Ẹyak ikam inyanyam enye.’ Ntre mmọ ẹma ẹnyam enye mbak silver 20 ẹnọ mbon Midian emi ẹkemende n̄kpọ ẹka ndinyam ke Egypt.

Ekem mmọ ẹma ẹmen ọfọn̄idem esie ẹnyịni ke iyịp ebot ẹnọ ẹkedọhọ ete mmọ ẹte: ‘Ndi idịghe ọfọn̄ eyen fo edi emi?’ Jacob ekekere ke idiọk unam owot Joseph. Enye ama ofụhọ etieti, inyụn̄ ikopke ndọn̄esịt.

Mbon Midian ẹma ẹkenyam Joseph ẹnọ Potiphar, akwa owo ukara kiet ke Egypt. Edi Jehovah ikọkpọn̄ke Joseph. Potiphar ama okụt ke Joseph ọdiọn̄ọ utom etieti, onyụn̄ edi owo akpanikọ. Ibịghike, Potiphar ama ayak ofụri inyene esie esịn Joseph ke ubọk.

N̄wan Potiphar ama okụt ke Joseph okop idem onyụn̄ eye etieti. Ntre enye ama esikpak Joseph kpukpru usen ete edidan̄ ye imọ. Joseph ama esịn onyụn̄ ọdọhọ enye ete: ‘Ihih! Utọ n̄kpọ oro ifọnke. Afo edi n̄wan eteufọk mi, enye onyụn̄ ada mi nte owo akpanikọ. Edieke nnamde utọ idiọk n̄kpọ oro, Abasi idinemke esịt.’

Usen kiet n̄wan Potiphar ama odomo ndinyịk Joseph ete edidan̄ ye imọ. Enye ama omụm Joseph ọfọn̄, edi Joseph ama ọbọhọ enye efehe. Ini ebe esie ọkọnyọn̄de edi, enye ama osu nsu ete ke Joseph okoyom ndidan̄ imọ ke n̄kanubọk. Esịt ama ayat Potiphar etieti; enye ama omụm Joseph ekesịn ke ufọk-n̄kpọkọbi. Edi Jehovah ikefreke Joseph.