Didie ke Bible Ekeme Ndin̄wam Mi?​—Ikpehe 2: Kot ke Usụn̄ Oro Edinemde Fi

Ekpri akparawa kiet emi ekerede Will ọkọdọhọ ke “ndikot Bible ekeme ndidorode owo, edieke owo mîdiọn̄ọke nnennen usụn̄ emi enye okpokotde”

Ndi akpama ndidiọn̄ọ se akpanamde man esinenem fi ndikot Bible? Ibuotikọ emi ayan̄wam fi.

• Nam etie nte se okotde etịbe idahaoro

• Dụn̄ọde se okotde!

• Se ubọkn̄ka fo ẹtịn̄de

Nam etie nte se okotde etịbe idahaoro

Nam nte odu ke itie n̄kpọ oro etịbede. Se se ikemede ndin̄wam fi mi:

1. Mek mbụk Bible emi edinemde-nem fi. Emekeme ndimek n̄kpọ emi eketịbede ke Bible, emek itie kiet ke Gospel, mîdịghe emek mbụk Bible oro ẹkotde nte drama ẹdọn̄ ke jw.org.

2. Kot mbụk oro. Emekeme nditie ikpọn̄ n̄kot, mîdịghe okot ye mme ufan fo m̀mê mbon ubon mbufo. Owo kiet ekeme ndidi ọnọmbụk, mbon eken ẹdi nsio nsio owo ke mbụk oro.

3. Nam kiet mîdịghe ndusụk se itienede emi:

   • Drọ nsio nsio ndise emi owụtde nte n̄kpọ oro eketịbede. Mîdịghe drọ n̄kpri n̄kpri ndise ban̄a n̄kpọ oro, nyụn̄ wet se idinamde ndise oro an̄wan̄a owo dian do.

   • Drọ ndise emi ẹsidade ẹkpep owo n̄kpọ. Ke uwụtn̄kpọ, nte okotde aban̄a asan̄autom Jehovah, wụt nti edu oro enye ekenyenede ye nte Abasi ọkọdiọn̄de enye ke ntak oro.

   • Da mbụk oro nam nte ọnọ news. Nọ mbụk oro ke nsio nsio usụn̄; nam ndụn̄ọde ye akpan owo ke mbụk oro, nyụn̄ nam ye ndusụk mbon oro ẹkekụtde se iketịbede.

   • Edieke owo ke mbụk oro akanamde se enye mîkpanamke, kere nnennen n̄kpọ emi enye akpakanamde. Uwụtn̄kpọ kiet edi mbụk emi aban̄ade nte Peter akakan̄de Jesus. (Mark 14:​66-​72) Nso ke Peter akpakanam man idikan̄ Jesus?

   • Edieke esimade ndiwet mbụk, emekeme ndida mbụk Bible oro ewet drama, onyụn̄ ọdọn̄ se idin̄wamde owo ekpep n̄kpọ oto mbụk oro.​—Rome 15:4.

     

Dụn̄ọde se okotde!

Edieke etịmde odụn̄ọde se okotde, ọyọdiọn̄ọ ediwak n̄kpọ aban̄a mbụk oro. Ndusụk ini ikọ kiet m̀mê iba ke mbụk Bible ekeme ndikpep fi n̄kpọ emi mûkekereke.

Ke uwụtn̄kpọ, men Matthew 28:7 domo ye Mark 16:7.

• Nso ikanam Mark asiak “Peter” esịn ke ini enye etịnde aban̄a mbon oro Jesus okoyomde ndikụt ke Jesus ama ekeset?

• Ndi ama ọfiọk: Mark ikodụhe ini n̄kpọ oro eketịbede; etie nte Peter eketịn̄ ọnọ enye.

• Mbufa n̄kpọ emi ikụtde: Ekere ke eketie Peter didie ke idem ini ẹkedọhọde ke Jesus oyom ndikokụt enye? (Mark 14:​66-​72) Nso ke Jesus akanam man owụt ke idi ata ufan Peter? Nso idiwụt ke amama ufan fo nte Jesus akamade Peter?

Akpanam etie nte ke odu ke ini n̄kpọ oro okotde ke Bible etịbede, onyụn̄ anam ndụn̄ọde ke se okotde, edisinenem fi ndikot Bible!