Nam Enyịn Fo Enen̄ede Ese
1. Ndinyene enyịn oro enen̄erede ese ọwọrọ nso, ndien ntak emi edide akpan n̄kpọ?
1 Ke Ukwọrọikọ esie oro ke Obot, Jesus ama owụt ọkpọsọn̄ odudu emi ndamban̄a enyịn m̀mê enyịn eke spirit ekemede ndinyene ke ofụri uwem nnyịn. Enye ọkọdọhọ ete: “Ntre edieke enyịn fo enen̄erede ese, ofụri ikpọkidem fo ayayama. Edi edieke enyịn fo ọdiọkde, ofụri ikpọkidem fo eyekịm.” (Matt. 6:22, 23) Enyịn oro enen̄erede ese edi enye oro enyenede uduak kiet—edinam n̄kpọ Abasi—iyakke editịmede esịt oro mîdotke kaban̄a mme n̄kpọ obụkidem ọwọn̄ọde ntịn̄enyịn esie. (Matt. 6:19-21, 24-33) Nso ikeme ndin̄wam nnyịn inyene enyịn oro enen̄erede ese?
2. N̄wed Abasi esịn udọn̄ ọnọ nso ekikere kaban̄a mme n̄kpọ obụkidem?
2 Ndikop Uyụhọ: N̄wed Abasi ọnọ owo mbiomo ndise mban̄a udọn̄ mbonufọk esie nte ekemde. (1 Tim. 5:8) Edi emi iyomke nnyịn isịn idem iyom mbufa ye mfọnn̄kan n̄kpọ. (N̄ke 27:20; 30:8, 9) Utu ke oro, N̄wed Abasi esịn udọn̄ ọnọ nnyịn ndiyụhọ ke “se idiade ye se idade ifụk iferi,” kpa se ẹyomde ke uwem. (1 Tim. 6:8; Heb. 13:5, 6) Ndinam item emi ekeme ndin̄wam nnyịn inam enyịn nnyịn enen̄ede ese.
3. Nso ikeme ndin̄wam nnyịn ndifep edibiom idem nnyịn mbiomo?
3 Oyowụt eti ibuot nditre ndikama isọn nte mîdotke nnyụn̄ nnyene m̀mê ndiyom mme n̄kpọ oro ẹdade ekese ini ye ntịn̄enyịn nnyịn. (1 Tim. 6:9, 10) Didie ke nnyịn ikeme ndinam emi? Ke ini oyomde ndinam n̄kpọ, tịm bọn̄ akam ban̄a n̄kpọ oro nyụn̄ tịm dụn̄ọde ke idemfo se m̀mê n̄kpọ oro ọyọbiọn̄ọ mme edinam eke spirit. Biere ndinịm mme n̄kpọ eke spirit akpa ke uwem fo.—Phil. 1:10; 4:6, 7.
4. Ntak emi ikpoyomde mme usụn̄ ndidu mmemmem uwem?
4 Du Mmemmem Uwem: Un̄wam efen ke ndifep udọn̄ uma inyene edi ndiyom usụn̄ ndu mmemmem uwem. Eyenete kiet oro ekedifiọkde ke ubon imọ ẹkeme ndinam ọfọn ye unana ebeubọk n̄kpọ obụkidem ọkọdọhọ ete: “Idahaemi, mmekeme ndinam ekese ke esop man n̄n̄wam nditọete mi. Mmedifiọk ke Jehovah esidiọn̄ kpukpru mme asan̄autom esie ke ini mmọ ẹnịmde utuakibuot akpanikọ nte akpa n̄kpọ mbemiso ọkpọkpọ udọn̄ mmọ.” Nte afo emekeme ndinyene n̄kponn̄kan edidiọn̄ emi ebe ke ndidu mmemmem uwem?
5. Ntak oyomde ukeme ofụri ini man inam enyịn nnyịn ẹnen̄ede ẹse?
5 Oyom ukeme ofụri ini man ibiọn̄ọ odudu Satan, ererimbot uma inyene esie, ye anana-mfọnmma ikpọkidem nnyịn. Utu ke ndiyak enyịn nnyịn oyo, ẹyak inam mmọ ẹwụhọ ke edinam uduak Abasi ye ke ọsọn̄urua idotenyịn nsinsi uwem.—N̄ke 4:25; 2 Cor. 4:18.