Obio Ubọn̄ Abasi—Nte Afo Ọmọfiọk Se Enye Ọwọrọde?
“Enye emi ẹsuande . . . ke eti isọn̄, edi owo emi okopde ikọ, onyụn̄ ọfiọkde se enye ọwọrọde.”—MATTHEW 13:23.
1. Nso idi ndusụk ọsọ n̄kpọ oro ẹnịmde ke akpanikọ ẹban̄a ‘Obio Ubọn̄ heaven’?
NTE afo ‘ọmọfiọk’ se Obio Ubọn̄ Abasi edide? Ekikere ẹban̄ade ‘Obio Ubọn̄ heaven’ ẹkpụhọde akamba akamba ke ediwak isua ikie ẹmi ẹbede. Ọsọ n̄kpọ oro ẹnịmde ke akpanikọ ke otu ndusụk mme aka ufọkabasi mfịn edi nte ke Obio Ubọn̄ oro edi n̄kpọ emi Abasi esịnde owo ke esịt ke ini enye akabarede esịt. Mbon efen ẹkere ke enye edi ebiet emi nti owo ẹkade ke ẹma ẹkekpan̄a man ẹkenyene nsinsi inemesịt. Ndusụk owo n̄ko ẹdọhọ ke Abasi ayak edida Obio Ubọn̄ ndi esịn mme owo ke ubọk ebe ke mmọ ndinam n̄kpọ man ẹsịn mme ukpepn̄kpọ ye mme edinam Christian ke mbubehe ebuana otuowo ye eke ukara.
2. Didie ke Bible anam se Obio Ubọn̄ Abasi edide an̄wan̄a, ndien nso ke enye edinam?
2 Nte ededi, Bible owụt in̄wan̄în̄wan̄ ete ke Obio Ubọn̄ Abasi idịghe ndutịm emi odude ke isọn̄. Enye idịghe idaha emi odude owo ke esịt m̀mê ndidi edinam n̄kaowo akabade edi eke Christian. Edi akpanikọ, nditịm mfiọk se Obio Ubọn̄ emi edide ada osịm edinam ikpọ ukpụhọde ke uwem mbon oro ẹbuọtde idem ye enye. Edi Obio Ubọn̄ oro ke idemesie edi ukara eke heaven oro Abasi owụkde emi anamde ẹnam uduak Abasi, osiode odudu idiọkn̄kpọ ye n̄kpa efep onyụn̄ afiakde owụk ndinen idaha ke isọn̄. Obio Ubọn̄ emi akakara ke heaven, ndien ke mîbịghike “enye eyenuak onyụn̄ ama kpukpru mme idụt ẹmi, ndien enye eyeda ke nsinsi.”—Daniel 2:44; Ediyarade 11:15; 12:10.
3. Ke ini Jesus ọkọtọn̄ọde utom ukwọrọikọ esie, nso mme ifet ẹkeberede ẹnọ mme owo?
3 Ewetmbụk oro H. G. Wells ekewet ete: “Ukpepn̄kpọ emi aban̄ade Obio Ubọn̄ Heaven mi, emi ekedide akpan ukpepn̄kpọ Jesus, emi onyụn̄ enyenede ata esisịt itie ke mme ikọ mbuọtidem Christian, enen̄ede edi kiet ke otu mme akpan ukpepn̄kpọ oro anamde ukpụhọde oro akanam edemerede onyụn̄ okpụhọrede ekikere owo.” Toto ke ntọn̄ọ, ibuotikọ ukwọrọikọ Jesus ekedi: “Ẹkabade esịt; koro Ubọn̄ Heaven ke ekpere.” (Matthew 4:17) Enye ama odu ke isọn̄ ini oro nte Edidem emi ẹyetde aran, ndien nte akakan idara, ẹma ẹberede usụn̄ kemi ẹnọ ubonowo idịghe n̄kukụre man ẹbuana ke mme edidiọn̄ Obio Ubọn̄ oro edi n̄ko ndidi mme nsan̄a andikara ye mme oku ye Jesus ke Obio Ubọn̄ oro!—Luke 22:28-30; Ediyarade 1:6; 5:10.
4. Ke akpa isua ikie, didie ke ediwak owo ẹkenam n̄kpọ ẹban̄a “gospel Ubọn̄ Heaven,” adade osịm nso ubiereikpe?
4 Ke adan̄aemi edide akpakịp owo ẹkekop aduai-owo-idem “gospel Ubọn̄ Heaven” emi, ibat ibat owo kpọt ẹkenịm ke akpanikọ. Emi ke ubak ubak ekedi koro mme adaiso ido ukpono ẹma “ẹberi Obio Ubọn̄ Heaven ẹbaha owo.” Mmọ “[ẹma ẹmen] ukpọhọde ifiọk ẹfep” ebe ke nsunsu ukpepn̄kpọ mmọ. Ke ntak oro ata ediwak owo ẹkesịnde Jesus nte Messiah ye Edidem Obio Ubọn̄ Abasi oro ẹyetde aran, Jesus ama ọdọhọ mmọ ete: “Ẹyebọ mbufo Obio Ubọn̄ Abasi, ẹyak ẹnọ idụt emi edin̄wụmde mfri esie.”—Matthew 4:23; 21:43; 23:13; Luke 11:52.
5. Didie ke ata ediwak mbon oro ẹkekopde n̄ke Jesus ẹkewụt ke se mmọ ẹkekopde ikan̄wan̄ake mmọ?
5 Ke ini ekekpepde akwa otuowo n̄kpọ ini kiet, Jesus, nte ido esie edide, ama ada udịm udịm n̄ke man odomo otuowo ese onyụn̄ abahade mbon oro ẹkenyenede sụk enyọn̄ enyọn̄ udọn̄ ke Obio Ubọn̄. Akpa n̄ke akabuana asuan n̄kpasịp emi akasuande n̄kpasịp ke orụk isọn̄ inan̄. Akpa isọn̄ ita oro ikọfọnke se mfri ẹkọride, edi akpatre oro ekedi “eti isọn̄” oro okon̄wụmde mfri. Ibio ibio n̄ke oro eketre ye item emi: “Owo eke enyenede utọn̄, yak okop.” (Matthew 13:1-9) Ata ediwak mbon oro ẹkedude ẹma ẹkop se enye eketịn̄de, edi mmọ “ikakpan̄ke utọn̄.” (NW) Mmọ ikenyeneke n̄kpọ oro okonụkde mmọ ndinam n̄kpọ, ikenyeneke ata udọn̄ ndifiọk nte n̄kpasịp oro ẹtọde ke nsio nsio idaha ẹkebietde Obio Ubọn̄ heaven. Mmọ ẹma ẹfiak ẹnyọn̄ ufọk ẹkekaiso ke uwem mmọ eke usen ke usen, iso-ọfọn ẹkerede ẹte ke mme n̄ke Jesus ẹkedi sụk mme inem inem mbụk oro ibuotikọ ẹban̄ade nti ido uwem. Nso akwa ifiọk ndien nso mfọniso ye nti ifetutom ke mmọ ẹketaba ntem ke ntak nsọn̄esịt mmọ!
6. Ntak emi ẹkeyakde edifiọk “ndịbe n̄kpọ Obio Ubọn̄” ẹnọ mme mbet Jesus ikpọn̄?
6 Jesus ọkọdọhọ mme mbet esie ete: “Ẹyak ẹnọ mbufo ndifiọk ndịbe n̄kpọ Obio Ubọn̄ Heaven, edi iyakke inọ mmọ.” Ke okotde oto Isaiah, enye ama adian ete: ‘Koro esịt mbon ẹmi ama akabade odobi, utọn̄ mmọ onyụn̄ ọsọn̄ ndikop ikọ, mmọ ẹnyụn̄ ẹbọp enyịn; mbak mmọ ẹdida enyịn mmọ ẹkụt usụn̄, ẹnyụn̄ ẹda utọn̄ mmọ ẹkop ikọ, ẹnyụn̄ ẹda esịt mmọ ẹfiọk n̄kpọ, ẹnyụn̄ ẹtọn̄ọ ntak ẹkabade, ndien ami nnam udọn̄ọ okụre mmọ. Edi ọfọfọn ọnọ enyịn mbufo, koro mmọ ẹkụtde n̄kpọ; onyụn̄ ọfọfọn ọnọ utọn̄ mbufo, koro mmọ ẹkopde ikọ.’—Matthew 13:10-16; Mark 4:11-13.
‘Ndifiọk Se Obio Ubọn̄ Oro Ọwọrọde’
7. Ntak emi edide akpan n̄kpọ ‘ndifiọk se Obio Ubọn̄ emi ọwọrọde’?
7 Jesus ama anyan ubọk owụt se idide mfịna. Enye ekenyene n̄kpọ ndinam ye ‘ndifiọk se’ etop Obio Ubọn̄ oro “ọwọrọde.” Enye ama asian mme mbet esie ke ndịbe ete: ‘Mbufo ẹkop ndien n̄ke asuan n̄kpasịp. Ke ini owo ekededi okopde ikọ Obio Ubọn̄ Heaven, mînyụn̄ ifiọkke se ọwọrọde, andidiọk edi editan̄ se ẹkesuande ke esịt owo oro.’ Enye ama akaiso anam an̄wan̄a ete ke orụk isọn̄ inan̄ oro ẹda ẹban̄a nsio nsio idaha esịt owo emi ẹkesuande “ikọ Obio Ubọn̄” emi.—Matthew 13:18-23; Luke 8:9-15.
8. Nso ikọbiọn̄ọ “n̄kpasịp” oro ẹkesuande ke akpa orụk isọn̄ ita oro ndin̄wụm mfri?
8 “N̄kpasịp” oro ke idaha kiet kiet ẹma ẹfọn, edi mfri ọkọkọn̄ọ ke nte isọn̄ etiede. Edieke isọn̄ eke esịt eketiede nte usụn̄ emi ẹsan̄ade kpukpru ini, ẹtịmde tutu ọsọn̄, emi unana edinam eke spirit anamde enye akabade ọsọn̄, ekpedi mmemmem n̄kpọ ọnọ owo oro okopde etop Obio Ubọn̄ ndinyene se etịn̄de anyan̄a idemesie, ọdọhọde ke ikenyeneke ini inọ Obio Ubọn̄. Ẹkeme ndisọsọp ntan̄ n̄kpasịp oro ẹkefụmide mbemiso enye ọdọn̄de n̄kam. Edi nso edieke ẹkesuande n̄kpasịp oro ke esịt oro ebietde isọn̄ itiat? N̄kpasịp oro ekeme ndisiaha, edi edidi ọkpọsọn̄ n̄kpọ ndidọn̄ n̄kam ẹdụk ẹkesịm udia nnyụn̄ nsọn̄ọ nda. Idotenyịn ndidi asan̄autom Abasi oro okopde item, akpan akpan ke idak ọkpọsọn̄ ukọbọ, eyenịm ata akamba n̄kpọ-ata, ndien owo oro eyeduọ. Ndien n̄ko, edieke isọn̄ eke esịt ọkọyọhọde ye mme editịmede esịt m̀mê udọn̄ inyene obụkidem oro ẹtiede nte n̄kukịm, ẹmi ẹyebaba mfri Obio Ubọn̄ emi etiede ọkpọkpọ owot. Ke ndamban̄a idaha ita ẹmi ke uwem, mfri Obio Ubọn̄ ndomokiet idin̄wụmke.
9. Ntak emi n̄kpasịp oro ẹkesuande ke eti isọn̄ ẹkekemede ndin̄wụm nti mfri?
9 Edi, nso kaban̄a n̄kpasịp Obio Ubọn̄ oro ẹtọde ke eti isọn̄? Jesus ọbọrọ ete: ‘Enye emi asuande n̄kpasịp ke eti isọn̄, edi owo emi okopde ikọ, onyụn̄ ọfiọkde se enye ọwọrọde; emi onyụn̄ osion̄ode mfri ke akpanikọ, onyụn̄ on̄wụmde idem, ndusụk utịm ikikie, ndusụk utịm ikaata, ndusụk utịm ikedịp ye duop.’ (Matthew 13:23) Ke ‘ndifiọk se Obio Ubọn̄ ọwọrọde,’ mmọ ẹyen̄wụm nti mfri etiene idaha mmọ owo kiet kiet.
Ifiọk Asan̄a ye Mbiomo
10. (a) Didie ke Jesus okowụt ete ke ‘ndifiọk se Obio Ubọn̄ ọwọrọde’ asan̄a ye mme edidiọn̄ ye mbiomo? (b) Nte utom oro Jesus ọkọnọde ete ẹka ẹkenam mme mbet ekebehe mme mbet eke akpa isua ikie ikpọn̄?
10 Ke ama okotop n̄ke itiokiet efen efen ndinam nsio nsio ikpehe Obio Ubọn̄ ẹn̄wan̄a, Jesus ama obụp mbet esie ete: ‘Nte mbufo ẹmetịm ẹfiọk se ikọ ẹmi ẹwọrọde?’ Ke ini mmọ ẹkebọrọde ẹte “nnyịn imọfiọk,” enye ama ọdọhọ ete: “Kpukpru scribe ndien, emi ẹnamde enye edi owo mbet ke Obio Ubọn̄ Heaven, ebiet enyeneufọk, eke osion̄ode mbufa n̄kpọ ye n̄kani ke ubet-unịm-inyene esie.” Mme ukpepn̄kpọ ye ukpep oro Jesus ọkọnọde ẹyenam mbet esie ẹdi mme Christian oro ẹkọride ẹsịm ọyọhọ idaha ẹmi ẹdikemede ndision̄o nti udia eke spirit oro mîdikụreke ke ‘ufọk unịm inyene’ ndi. Ata ekese ke otu ẹmi ẹnyene ebuana ye Obio Ubọn̄ Abasi. Jesus ama anam an̄wan̄a ete ke ‘ndifiọk se Obio Ubọn̄ emi ọwọrọde’ eyeda n̄ko mbiomo edi, idịghe mme edidiọn̄ kpọt. Enye ama ọnọ ewụhọ ete: “Mbufo ẹka ẹkenam kpukpru mme idụt ẹdi mbet Mi, . . . ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo: ndien sese, Ami ndodu ye mbufo kpukpru ini, tutu osịm utịt ererimbot.”—Matthew 13:51, 52; 28:19, 20.
11. Ke ini 1914 ekedide edisịm, nso mme n̄kpọntịbe oro ẹkenyenede ebuana ye Obio Ubọn̄ ẹkeda itie?
11 Nte ọkọn̄wọn̄ọde, Jesus akaiso ndidu ye mme ata mbet esie ke mme isua ikie ẹmi ẹbede tutu osịm mfịn emi. Ke ukperedem ini emi, enye akaiso ndinam mme n̄kpọ ẹn̄wan̄a mmọ sụn̄sụn̄, ndien enye n̄ko ọnọ mmọ utom ndida un̄wana akpanikọ emi akade-kaiso ọkọri mi nnam n̄kpọ. (Luke 19:11-15, 26) Ke 1914, mme n̄kpọntịbe Obio Ubọn̄ ẹma ẹtọn̄ọ ndiyarade usọp usọp ye ke utịbe utịbe usụn̄. Ke isua oro, ikokụreke ke Obio Ubọn̄ oro ẹkedoride enyịn ẹban̄a ke anyanini ‘ndimana’ edi ‘utịt editịm n̄kpọ emi’ ama ọtọn̄ọ. (Ediyarade 11:15; 12:5, 10; Daniel 7:13, 14, 27) Mme ata Christian, ke ẹfiọkde se mme n̄kpọntịbe oro ẹdade itie idahaemi ẹwọrọde, ẹnam n̄kponn̄kan ubịnikọt edikwọrọ Obio Ubọn̄ ye edikpep owo n̄kpọ ẹkan nte akanam ẹnamde ke mbụk. Jesus ama ebem iso etịn̄ aban̄a emi, ọdọhọde ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:14.
12. (a) Nso idi utịp ntatara unọ ikọ ntiense Obio Ubọn̄ eke eyomfịn? (b) Ke ererimbot eyịghe emi, nso n̄kpọndịk odu ọnọ mme Christian?
12 Akwa utom edinọ ikọ ntiense Obio Ubọn̄ emi omosịm se iwakde ikan idụt 230. Kan̄a kemi, se iwakde ibe mme ata mbet miliọn ition ke ẹbuana ke utom emi, ndien ke ẹtatan̄ mbon en̄wen ẹbok. Edi edieke imende ibat mbet idomo ye owo biliọn 5.6 ẹmi ẹdụn̄de ke isọn̄, ana in̄wan̄în̄wan̄ nte ke ukem nte ekedide ke eyo Jesus, ata ediwak ke otu ubonowo ‘ifiọkke se Obio Ubọn̄ ọwọrọde.’ Ediwak owo, ukem nte ẹkebemde iso ẹtịn̄, ẹsak nsahi ẹnyụn̄ ẹdọhọ ẹte: “Edidi eke Enye ọkọn̄wọn̄ọde ete iyedi enye?” (2 Peter 3:3, 4) N̄kpọndịk emi odude ọnọ nnyịn nte mme Christian edi nte ke edu unana udọn̄, eyịghe, ye uma inyene mmọ ekeme nditụk usụn̄ oro nnyịn isede mme ifetutom Obio Ubọn̄ sụn̄sụn̄. Ye emi mbon ererimbot emi ẹkande nnyịn mi ẹkụk, nnyịn imekeme nditọn̄ọ nditiene ndusụk edu ye mme edinam mmọ mmemmem mmemmem. Edi akpan n̄kpọ didie ntem ete nnyịn ‘ifiọk’ se Obio Ubọn̄ Abasi ọwọrọde inyụn̄ isọn̄ọ imụm enye ikama!
Ndidụn̄ọde Idem Nnyịn ke Ebuana ye Obio Ubọn̄
13. Kaban̄a utom ẹnọde ete ẹkwọrọ eti mbụk Obio Ubọn̄, didie ke nnyịn ikeme ndidomo nse m̀mê nnyịn ke ikaiso ‘ndikop’ ye eti ibuot?
13 Jesus eketịn̄ aban̄a ini idọk emi nnyịn idude uwem mi ete: “Eyen Owo eyesio mme angel Esie ọdọn̄, ndien mmọ ẹyetan̄ kpukpru n̄kpọ ẹmi ẹsịnde owo ẹduọ, ye mmọemi ẹnamde ukwan̄ido ẹfep ke Obio Ubọn̄ Esie . . . Adan̄aoro ndinen owo ẹyeyama nte utịn ke Obio Ubọn̄ Ete mmọ. Owo eke enyenede utọn̄, yak okop.” (Matthew 13:41, 43) Nte afo ke akaiso “okop” ewụhọ nte ẹkwọrọ Obio Ubọn̄ emi ẹnyụn̄ ẹnam mme mbet onyụn̄ anam n̄kpọ aban̄a enye ye nsụkibuot? Ti ete, “enyeemi asuande n̄kpasịp ke eti isọn̄” ‘okop ikọ onyụn̄ ọfiọk se enye ọwọrọde’ onyụn̄ on̄wụm eti mfri.—Matthew 13:23.
14. Ke ini ẹnọde item, didie ke nnyịn iwụt ite ke ‘imọfiọk se item oro ẹnọde ọwọrọde’?
14 Ke ini inamde ukpepn̄kpọ idemowo inyụn̄ idụkde mme mbonoesop Christian, nnyịn inyene ‘ndisịn esịt nnyịn ke mbufiọk.’ (Mme N̄ke 2:1-4) Ke ini ẹnọde item ẹban̄a eduuwem, usịnen̄kpọ, ikwọ, ye unọ idem inemesịt, ana nnyịn iyak enye osụhọde odụk nnyịn esịt onyụn̄ onụk nnyịn ndinam edinen̄ede ekededi oro ẹyomde. Kûdede use ke usụhọde, ọnọde mme ntak, m̀mê ke usụn̄ efen okpude ndinam n̄kpọ mban̄a. Edieke Obio Ubọn̄ edide ata idem n̄kpọ ke uwem nnyịn, nnyịn iyeda mme edumbet esie idu uwem inyụn̄ itan̄a enye ifịk ifịk inọ mbon efen. Jesus ọkọdọhọ ete: “Idịghe kpukpru owo ẹmi ẹkotde Mi ẹte, Ọbọn̄, Ọbọn̄, ẹdidụk ke Obio Ubọn̄ Heaven; edi owo eke anamde uyo Ete Mi emi odude ke heaven.”—Matthew 7:21-23.
15. Ntak emi edide akpan n̄kpọ ‘ndibem iso nyom Obio Ubọn̄ ye edinen ido Abasi’?
15 Edi ntụhọ owo nditịmede esịt mban̄a udia, edisịnen̄kpọ, ye itie udakibuot oro ẹyomde, edi Jesus ọkọdọhọ ete: “Ẹkam ẹbem iso ẹyom Obio Ubọn̄ Esie ye edinen ido Esie [Abasi]; ndien ẹyedian kpukpru n̄kpọ ẹmi ẹnọ mbufo.” (Matthew 6:33, 34) Ke ndimek mme n̄kpọ oro ẹdide mme ebeiso n̄kpọ, nim Obio Ubọn̄ akpa ke uwem fo. Du mfefere uwem, oyụhọde ye mme n̄kpọ oro ẹdide akpan n̄kpọ. Ekpedi ndisịme ndiyọhọ uwem nnyịn ye mme edinam ye inyene oro mîdịghe akpan n̄kpọ, ndusụk ikerede ite ke ndinam emi edi se ẹnyịmede, sia mme n̄kpọ ẹmi nte ededi mîdiọkke ke idemmọ. Ke adan̄aemi oro ekemede ndidi akpanikọ, nso ke ndinyene nnyụn̄ nda mme utọ n̄kpọ oro mîdịghe akpan n̄kpọ mi nnam n̄kpọ ẹdinam ye ndutịm ukpepn̄kpọ idemowo nnyịn, edidụk mme mbonoesop Christian, ye edibuana ke utom ukwọrọikọ? Jesus ọkọdọhọ ete ke Obio Ubọn̄ ebiet owo urua eke okụtde “pearl kiet emi okponde ekọmurua, [ndien] aka akanyam kpukpru se enyenede, edep pearl oro.” (Matthew 13:45, 46) Emi edi nte nnyịn ikpekerede iban̄a Obio Ubọn̄ Abasi. Nnyịn ikpenyene ndikpebe Paul idịghe Demas, emi ọkọkpọn̄de utom ukwọrọikọ “sia enye amade eyo emi odude ke emi.”—2 Timothy 4:10, 18; Matthew 19:23, 24; Philippi 3:7, 8, 13, 14; 1 Timothy 6:9, 10, 17-19.
“Mme Anam-Ukwan̄ido Ididaha Obio Ubọn̄ Abasi Inyene”
16. Didie ke ‘ndifiọk se Obio Ubọn̄ Abasi ọwọrọde’ edin̄wam nnyịn ifep idiọk eduuwem?
16 Ke ini esop mbon Corinth ọkọyọde oburobụt ido, Paul ama etịn̄ an̄wan̄wa ete: “Nte mbufo ifiọkke ite, mme anam-ukwan̄ido ididaha Obio Ubọn̄ Abasi inyene? Ẹkûbian̄a idem mbufo. Mbon-use, ye mme okpono-ndem, ye mme esịn-efịbe, ye mmọ eke ẹbietde iban, ye mmọ eke ẹsabarede idem, ye mme inọ, ye mme esịn esịt ke n̄kpọ owo, ye mme ọyụhọ mmịn, ye mbon idiọk inua, ye mme akan owo ubọk ididaha Obio Ubọn̄ Abasi inyene.” (1 Corinth 6:9, 10) Edieke nnyịn ‘ifiọkde se Obio Ubọn̄ Abasi ọwọrọde,’ nnyịn idibian̄ake idem nnyịn ke ndikere nte ke Jehovah eyeyọ ndusụk orụk oburobụt ido adan̄a nte enye okụtde nte nnyịn isịnde idem ke utom Christian. Ikpanaha ẹyak ẹkam ẹtetịn̄ ẹban̄a ndek ndek ido ke otu nnyịn. (Ephesus 5:3-5) Nte afo omokụt nte ndusụk ndek ndek ekikere m̀mê mme edinam ererimbot emi ẹtọn̄ọde ndinyọni ndụk uwem fo? Biat mmọ fep ke uwem fo usọp usọp! Obio Ubọn̄ otịm ọsọn̄ urua tutu idịghe se ẹtabade ke ntak mme utọ n̄kpọ oro.—Mark 9:47.
17. Ke mme usụn̄ ewe ke esịtekọm oro ẹnyenede ẹnọ Obio Ubọn̄ Abasi edinam nsụhọdeidem ọkọri onyụn̄ abiat mme n̄kpọ oro ẹnamde owo ẹduọn̄ọ?
17 Mme mbet Jesus ẹkebụp ẹte: “Anie ndien okpon akan ke Obio Ubọn̄ Heaven?” Jesus ama ọbọrọ ke ndimen ekpri eyenọwọn̄ nnịm ke ufọt mmọ onyụn̄ ọdọhọ ete: “Ke akpanikọ ke ndọhọ mbufo, ibọhọke mbufo ẹwọn̄ọde ẹkabade ẹtie nte n̄kpri nditọwọn̄, mbufo ididụkke ke Obio Ubọn̄ Heaven. Mmọdo owo ekededi eke edisụhọrede idem nte ekpri eyenọwọn̄ emi, kpa enye okpon akan ke Obio Ubọn̄ Heaven.” (Matthew 18:1-6) Mbon n̄kohodeidem, mbon oro ẹyomde ekese ẹkaha ẹto mbon en̄wen, mbon oro mîkereke iban̄a mbon en̄wen, ye mme abiatibet ididụhe ke Obio Ubọn̄ Abasi, m̀mê mmọ ndidi mme andidụn̄ ke idak Obio Ubọn̄ oro. Nte ima emi afo enyenede ọnọ nditọete fo, nsụhọdeidem fo, uten̄e Abasi emi afo enyenede, ẹnụk fi efep ndinam mbon en̄wen ẹtuak ukot ẹduọn̄ọ ebe ke eduuwem fo? Mîdịghe nte afo emesisọn̄ọ eyịre ke “unen” fo inamke n̄kpọ m̀mê edu emi otụk mbon en̄wen didie?—Rome 14:13, 17.
18 Ete nnyịn eke heaven, Jehovah, eyesọp ọbọrọ akam ofụri esịt oro: “Yak Ubọn̄ Fo edi, yak inam uduak Fo nte ẹnamde ke heaven, yak inam ke isọn̄ kpasụk ntre.” Ibịghike Edidem oro akarade, kpa Jesus Christ, eyedi ke usụn̄ifiọk eke edisụhọde ntie ke ebekpo esie n̄kpe ikpe, man abahade “erọn̄” ye “ebot.” Ke edikem ini oro, “Edidem eyedọhọ mmọ ẹmi ẹdude ke ubọk nnasia, ete, Ẹdi, mbufo ẹmi Ete Mi ọdiọn̄de, ẹdida ubọn̄ emi ẹkonịmde ẹnọ mbufo toto ke editọn̄ọ ererimbot.” Mme ebot “ẹyedaha ẹkodụk ke nsinsi ufen; edi ndinen owo ẹyedụk ke nsinsi uwem.” (Matthew 6:10; 25:31-34, 46) “Akwa ukụt” eyekpọri akani editịm n̄kpọ ye kpukpru mbon oro ẹsịnde ‘ndifiọk se Obio Ubọn̄ ọwọrọde’ efep. Edi ediwak miliọn mme andibọhọ “akwa ukụt” ye ediwak biliọn oro ẹdinamde ẹset ẹyebọ mme edidiọn̄ Obio Ubọn̄ oro mîdinyeneke utịt ke Paradise isọn̄ oro ẹdifiakde ẹwụk. (Ediyarade 7:14) Obio Ubọn̄ oro edi obufa ukara eke isọn̄, ẹtiede ke heaven ẹkara. Enye eyeyọhọ uduak Jehovah kaban̄a isọn̄ ye ubonowo, kpukpru emi kaban̄a edinam ata edisana enyịn̄ esie asana. Nte oro idịghe inyene oro otịmde odot ndinam n̄kpọ mbịne, ndiwa idem nnọ, nnyụn̄ ntie mbet? Emi edi se ‘edifiọk se Obio Ubọn̄ ọwọrọde’ ekpenyenede ndiwọrọ nnọ nnyịn!
Didie ke Afo Ọkpọbọrọ?
◻ Nso idi Obio Ubọn̄ Abasi?
◻ Ntak emi ata ediwak mme andikokop ikọ Jesus ‘mîkọfiọkke se Obio Ubọn̄ oro ọwọrọde’?
◻ Didie ke ‘ndifiọk se Obio Ubọn̄ ọwọrọde’ ada mme edidiọn̄ ye mbiomo edi?
◻ Kaban̄a edikwọrọ ikọ, nso iwụt m̀mê nnyịn ‘imọfiọk se Obio Ubọn̄ oro ọwọrọde’?
◻ Didie ke nnyịn ikeme ndiwụt ebe ke eduuwem nnyịn nte ke nnyịn ‘imọfiọk se item oro ẹnọde ọwọrọde’?
18. Nso iditịbe inọ okopitem ubonowo ke ini Obio Ubọn̄ Abasi edinamde ẹnam uduak Esie ‘ke isọn̄, kpa nte ẹnamde ke heaven’?
[Mme Ndise ke page 17]
Mme mbet Jesus ‘ẹma ẹfiọk se Obio Ubọn̄ ọwọrọde’ ẹnyụn̄ ẹn̄wụm nti mfri