Jesus Emek Apostle Duopeba

N̄kpọ nte isua kiet ye ubak ẹbe tọn̄ọ John Andinịm Owo Baptism ọkọdọhọ ke Jesus edi Eyenerọn̄ Abasi. Ke ini Jesus ọtọn̄ọde utom ukwọrọikọ esie, ediwak irenowo emi ẹmade Abasi ẹtọn̄ọ nditiene enye, utọ nte: Andrew, Simon Peter, John, ye James (eyeneka John), Philip, ye Bartholomew (emi ẹdiọn̄ọde n̄ko nte Nathanael). Nte ini akade, Christ edinyene ediwak mbet en̄wen.—John 1:45-47.

Idahaemi Jesus eben̄e idem ndimek mme apostle esie. Mmọ ẹdisan̄a ye enye kpukpru ini, ndien enye ọmọn̄ ọnọ mmọ san̄asan̄a ukpep. Edi mbemiso Jesus emekde mmọ, enye ọdọk enyọn̄ obot kiet, ekeme ndidi obot oro ekpere Inyan̄ Galilee ye Capernaum. Enye ada ofụri okoneyo oro ọbọn̄ akam, eben̄e Abasi eteme imọ se ikpanamde onyụn̄ ọdiọn̄ imọ. Ke ndan̄nsiere, enye okot mme mbet esie onyụn̄ emek owo mmọ 12 nte apostle.

Jesus emek owo itiokiet oro ikebemde iso isiak ye Matthew emi enye okokotde ke itie ubọ tax. Owo ition en̄wen oro enye emekde ẹdi Judas (emi ẹdiọn̄ọde n̄ko nte Thaddaeus ye “eyen James”), Simon emi ẹkotde Enyene-Ifịk, Thomas, James eyen Alphaeus, ye Judas Iscariot.—Matthew 10:2-4; Luke 6:16.

Owo 12 emi ẹma ẹsisasan̄a ye Jesus, enye onyụn̄ enen̄ede ọfiọk mmọ. Ediwak mmọ ẹdi iman esie. James ye John emi ẹdide nditọeka, ẹdi nditọ eyeneka eka esie. Edieke se mbon en̄wen ẹtịn̄de edide akpanikọ ke Alphaeus ekedi eyeneka Joseph, oro edi, ete Jesus, ọwọrọ James edi eyen eyeneka ete Jesus.

Isọn̄ke Jesus nditi enyịn̄ mme apostle esie, edi ndi esisọn̄ fi? Ndi emesiti enyịn̄ mmọ? N̄kpọ kiet emi ekemede ndin̄wam fi edi nditi ke owo iba ẹkere Simon, iba ekere James, ndien iba en̄wen ẹkere Judas. Simon (Peter) enyene eyeneka emi ekerede Andrew, ndien James (eyen Zebedee) enyene eyeneka emi ekerede John. Apostle itiaita ẹdi oro. Owo inan̄ eken ẹdi Matthew (emi ekedide ọbọ a-tax), Thomas (emi mîkọsọpke inịm ke Jesus eset), Nathanael, (emi Jesus okokotde ke idak eto), ye Philip ufan Nathanael.

Owo duopekiet ke otu mmọ ẹto Galilee, obio mme Jesus. Nathanael oto Cana. Philip, Peter, ye Andrew ẹto Bethsaida. Peter ye Andrew ẹma ẹwọrọ ẹkedụn̄ ke Capernaum nte ini akade, ndien etie nte Matthew n̄ko okodụn̄ do. James ye John n̄ko ẹdụn̄ ẹkpere Capernaum, do ke mmọ ẹkesikọ iyak. Etie nte n̄kukụre owo emi okotode Judea ekedi Judas Iscariot emi akadade Jesus ọnọ.