Edinyene Nneme ye Mbọhọidụn̄​—Ndi Abasi Esitụhọde Mme Owo ke Ikan̄ Nsobo?

MME NTIENSE JEHOVAH ẹsima ndineme Bible ye mme mbọhọidụn̄ mmọ. Ndi enyene n̄kpọ emi mîn̄wan̄ake fi ke Bible? Ndi emenen̄ede oyom ndifiọk se Mme Ntiense Jehovah ẹkpepde m̀mê mme edinam ido ukpono mmọ? Ke edide ntre, kûmen̄e ndibụp mmọ ke ini osobode ye mmọ. Mmọ ẹyema ndineme n̄kpọ emi ye afo.

Se itienede emi edi nte nneme oro Mme Ntiense Jehovah ẹsinyenede ye mme mbọhọidụn̄ mmọ esitiede. Ẹyak ida ke Ntiense emi ekerede Maurice aka ufọk mme Alex.

Ndi Abasi Oyotụhọde Mme Idiọkowo?

Maurice: Alex, esịt enem mi ndifiak n̄kụt fi.

Alex: Enem mi nde.

Maurice: Ke n̄kekere se ikosụk inemede isan̄ oko ikosobode.

Alex: Nso idi oro?

Maurice: Afo ọkọdọhọ ke idem ama akpa imọ ndikop ke Mme Ntiense Jehovah inịmke ke Abasi oyotụhọde mme idiọkowo ke ikan̄ nsobo.

Alex: Ih, idem ama akpa mi. Ndien ke nditịn̄ akpanikọ, nnịmke ke odu owo ndomokiet emi mînịmke ke Abasi oyotụhọde mme idiọkowo ke ikan̄ nsobo.

Maurice: Ọfọn nte onyụn̄ asiande mi. Mmesima ndifiọk se mme owo ẹkerede. Sia mme owo ẹkerede nsio nsio n̄kpọ ẹban̄a ikan̄ nsobo, mbọk yak mbụp fi ise, nso ke afo ekere aban̄a ikan̄ nsobo?

Alex: Toto ke editọn̄ọ nsụk nnịm nte ke ata ndiọi owo ẹdika ikan̄ nsobo ke ini mmọ ẹkpade ye nte ke ẹyetụhọde mmọ do ke nsinsi nsinsi.

Maurice: Ediwak owo ẹnyụn̄ ẹkere ntre. Edi yak mbụp fi ise Alex, ndi akanam n̄kpọ anam fi?

Alex: Ih. Ẹma ẹwot eyeneka mi isua ition emi ẹkebede.

Maurice: Mbọm-o. Utọ n̄kpọ emi esibiak owo tutu.

Alex: Ama abiak mi etieti. Nsụk n̄kere enye okoneyo ye uwemeyo.

Maurice: Se n̄kụtde edi ke ediwak owo ẹyom Abasi otụhọde mme idiọkowo emi ẹbakde mmọ ibak ke ikan̄ nsobo. Esidọn̄ nti owo ndikụt nte mme idiọkowo emi ẹbọde ufen idiọkn̄kpọ mmọ.

Alex: Ntre ke edi! Nyom owo emi okowotde eyeneka mi ọbọ ufen idiọkn̄kpọ emi enye anamde nnyịn.

Maurice: Esinyụn̄ etie ediwak owo ntem. Bible ekpep nte ke Abasi n̄ko esiyat esịt ke ini enye okụtde nte ẹtụhọrede nti owo. Enye ọn̄wọn̄ọ ndinọ mme idiọkowo ufen. Kop se ẹtịn̄de mi ke Isaiah 3:11: “Mbọm idiọkowo! . . . Koro ẹyenam ye enye kpa nte enye akadade ubọk esie anam!” Ntem nnyịn imọfiọk ke Abasi ọyọnọ mme idiọkowo ufen.

Alex: Edi enye edisan̄a didie inam emi edieke ikan̄ nsobo mîdụhe nte mbufo ẹdọhọde?

Maurice: Ata eti mbụme edi oro. Ke nditịn̄ ibio ibio, ufen emi Abasi edinọde mme idiọkowo edi ndisobo mmọ taktak. Kop se Bible etịn̄de mi ke 2 Thessalonica 1:9. Mbọk kot itie oro ise.

Alex: Ọfọn. Itie oro ọdọhọ ete: “Mmọ emi ẹyebọ ufen nsinsi nsobo ke iso Ọbọn̄.”

Maurice: Alex, idịghe omokụt do ke mme idiọkowo ididụhe aba uwem sia Abasi oyosobo mmọ taktak.

Alex: Mmonyụn̄ n̄kop se itie oro etịn̄de, edi utọ n̄kpọ oro ifọnke sia nti owo ye idiọkowo ẹkpakpa. Ndi mme idiọkowo ikposụk ibọhọ ufen emi okponde akan oro?

Nso ke Ẹkpenam Mme Idiọkowo?

Maurice: Mmokụt ke afo edi owo emi amade se inende.

Alex: Ntre ke edi.

Maurice: Oro ọfọn etieti. Ke akpanikọ, nnyịn mme owo imama se inende inyụn̄ isua se ikwan̄ade sia Abasi okobot nnyịn ke mbiet esie. Enye n̄ko ama se inende. Edi ke ini mme pastọ ẹkpepde mme owo nte ke Abasi oyotụhọde mme owo ke ikan̄ nsobo, mmọ ẹnam etie nte Abasi imaha se inende.

Alex: Ikọ fo in̄wan̄ake mi-o.

Maurice: Yak nnọ fi uwụtn̄kpọ kiet ise. Ndi emeti se Bible etịn̄de aban̄a Adam ye Eve?

Alex: Ih. Abasi ọkọdọhọ mmọ ẹkûdia mfri eto kiet, edi mmọ ẹsọn̄ ibuot ẹdia.

Maurice: Ntre ke edi. Yak ikot mbụk oro ise. Mi ke Genesis 2:16, 17. Itie oro ọdọhọ ete: “Jehovah Abasi onyụn̄ owụk owo oro ete: ‘Dia kpukpru mfri eto in̄wan̄ yụhọ. Edi amaedi mfri eto ifiọk eti ye idiọk, kûdia, koro ke usen eke afo adiade afo ayakpa n̄kpa.’” Abasi ọkọdọhọ ke nso iditịbe edieke Adam adiade eto oro ẹkekpande do?

Alex: Enye ọkọdọhọ ke Adam ayakpa n̄kpa.

Maurice: Ntre ke edi. Edi kere ise: Idiọkn̄kpọ Adam akanam ofụri ubonowo ẹkabade ẹdi mme anamidiọk.a Edi ndi Abasi ama ọdọhọ ke iyotụhọde enye ke ikan̄ nsobo kpa ye utọ akwa idiọkn̄kpọ emi enye akanamde do?

Alex: Ihih.

Maurice: Edi edieke Abasi okpokoyomde nditụhọde Adam ye Eve ke nsinsi, ndi enye ikpeketịn̄ke inọ mmọ? Emi okpowụt ke enye ama mmọ onyụn̄ ama se inende.

Alex: Ntre ke edi.

Maurice: Ti n̄ko se Abasi ọkọdọhọde Adam ye Eve ke ini mmọ ẹma ẹkenam idiọkn̄kpọ. Mbọk kot ise Genesis 3:19.

Alex: Ọfọn. Itie oro ọdọhọ ete: “Ke ibibiak iso fo ke afo edidia udia tutu afo afiak ke ntan, sia ẹkesiode fi do. Koro afo edide ntan, oyonyụn̄ afiak ke ntan.”

Maurice: Sọsọn̄ọ-o. Abasi ọkọdọhọ ke nso iditịbe inọ Adam?

Alex: Ọkọdọhọ ke enye edifiak ke ntan.

Maurice: Afo emenen. Edieke Adam mîkedịghe ntan, ndi Abasi ọkpọkọdọhọ ke enye ayafiak ke ntan?

Alex: Ikpọdọhọke.

Maurice: Afo ekere ke Adam okodu ke m̀mọ̀n̄ mbemiso Abasi obotde enye?

Alex: Enye ikodụhe.

Maurice: Omokụt ke Abasi itịn̄ke-tịn̄ n̄kpọ ndomokiet iban̄a ikan̄ nsobo mi. Ndi ọkpọfọn Abasi ndidọhọ Adam ke enye edifiak ke ntan ke ini Enye aduakde nditụhọde enye ke ikan̄ nsobo?

Alex: Ihih, ikpọfọnke.

Ndi Satan Edi Isụn̄utom Abasi?

Maurice: Enyene n̄kpọ en̄wen emi n̄kpamade ikere iban̄a ke ukpepn̄kpọ ikan̄ nsobo emi.

Alex: Nso idi oro?

Maurice: Ẹdọhọ ke anie edi etubom emi esịnede ke esịt ikan̄ nsobo otụhọde mme owo?

Alex: Satan nan̄a.

Maurice: Edi Satan edi ata asua Abasi. Edieke Abasi ọnọde mme owo ẹka ikan̄ nsobo man Satan okotụhọde mmọ do, ndi oro ikpowụtke ke Satan edi isụn̄utom Abasi?

Alex: Hmm. Akanam n̄kereke n̄kpọ emi ntem.

Maurice: Bet ise, n̄kọ emenyene eyen?

Alex: Ih, mmenyene, enye edi isua 15.

Maurice: Nso ke akpanam edieke enye ekpesịnde idem ke idiọkn̄kpọ onyụn̄ enen̄erede ọsọn̄ ibuot?

Alex: N̄kpodomo ndinam enye okpụhọde.

Maurice: Mmọfiọk ke ekpenen̄ede odomo ndin̄wam enye kpukpru usen.

Alex: Ih, n̄kpodomo.

Maurice: Edieke enye mîmaha ndikpụhọde kpa ye kpukpru se anamde, nso ke akpanam? Ndi ukpunọhọ enye ufen ndien?

Alex: N̄kpọnọ.

Maurice: Ekpetie fi didie ke idem edieke ọkpọfiọkde ke idiọk ete kiet ke efak mbufo ekpep eyen fo ofụri nsọn̄ibuot oro?

Alex: N̄kpayat esịt etieti ye enye.

Maurice: Mbọk tịm kere se nyomde ndibụp fi emi ise. Ke ama ọkọfiọk owo emi abiatde eyen fo, ndi ekpemen eyen fo oro ọsọk enye ete amia ufen ọnọ fi?

Alex: N̄kpanamke utọ ndisịme n̄kpọ oro!

Maurice: Ke edide ntre, ndi emekere ke Abasi akpayak Satan otụhọde mme owo emi edide enye okonyụn̄ abiat?

Alex: N̄kereke ntre.

Maurice: N̄kpọ en̄wen edi, Edieke Abasi okpoyomde nditụhọde mme owo, ndi emekere ke Satan emi edide ata asua Abasi ekpenyịme nditụhọde mme owo nnọ Abasi?

Alex: Ọmọdiọn̄ọ akanam n̄kereke n̄kpọ n̄ka n̄kan̄ oro!

Jehovah Ayanam Idiọkn̄kpọ Etre

Maurice: Abasi oyosobo kpukpru mme anamidiọk emi mîmaha ndikabade esịt. Yak n̄wụt fi itie en̄wen ke Bible emi ọsọn̄ọde emi. Mi ke Psalm 37:9. Mbọk fiak kot ise.

Alex: Ọfọn, okot ete: “Koro ẹyesịbe mme anamidiọk ẹfep, edi mmọ eke ẹdoride enyịn ke Jehovah ẹyeda isọn̄ ẹnyene.”

Maurice: Da sọsọn̄ọ. Ndi omokụt se Jehovah Abasi edinamde mme idiọkowo?

Alex: Itien̄wed oro ọdọhọ ke Abasi eyesịbe mmọ efep.

Maurice: Emenen. Oro ọwọrọ ke Abasi oyosobo mmọ taktak. Edi nti owo, oro edi, “mmọ eke ẹdoride enyịn ke Jehovah,” ẹyedu uwem mi ke isọn̄ ke nsinsi. Edi emi ekeme ndinam fi ekere, Ntak emi Abasi ayakde mme owo ẹka iso ẹnam idiọkn̄kpọ ke akpa ifet-e? Edieke enye enen̄erede aduak ndinọ mme idiọkowo ufen, ntak emi enye mînamke oro tutu emi-e?

Alex: Ata mbụme edi oro.

Maurice: N̄kpama ndifiak ndi man ndiwụt fi nte Bible ọbọrọde mbụme emi.b

Alex: Idiọk idụhe.

[Mme Ikọ Idakisọn̄]