Ntak Emi Owo Mîsiakke Enyịn̄ Ndusụk Owo Ke Bible?

N̄wed Ruth okot owo emi mîkamaha ndifak iman esie nte Ibet Moses ọkọdọhọde Da. (Ruth 4:1-12) Ndi emi ọwọrọ ke mbon oro Bible mîsiakke enyịn̄ ntem ẹkedi ndiọi owo, m̀mê mbon oro mîkọwọrọke n̄kpọ ndomokiet?

Ihih, iwọrọke. Se inamde itịn̄ emi edi ke ini Jesus okoyomde ndidia akpatre Passover ye mme mbet esie, enye ọkọdọhọ mmọ “ẹdụk obio ẹbịne owo ntem ye ntem” ẹketịm n̄kpọ ẹben̄e imọ ke ufọk esie. (Matthew 26:18) Ndi emi ọwọrọ ke ete emi ekedi idiọkowo sia owo mîsiakke enye enyịn̄, m̀mê ke enye ikọwọrọke n̄kpọ ndomokiet? Iwọrọke, sia owo emi ekedi mbet Jesus. Etie nte ufọn ikodụhe ndisiak enye enyịn̄.

Imọfiọk n̄ko ke Bible asiak enyịn̄ ndiọi owo edi isiakke enyịn̄ ata ediwak ikọt Abasi. Ke uwụtn̄kpọ, Bible asiak enyịn̄ Eve, ndien iwakke eke mîkopke n̄kpọ iban̄a enye. Edi nsọn̄ibuot ye idiọkitọn̄ esie esịn nnyịn ke ofụri afanikọn̄ emi sia enye akanam Adam anam idiọk. (Rome 5:12) Edi Bible isiakke enyịn̄ n̄wan Noah emi akakam edide eti an̄wan emi akawade idem, etiene ebe esie anam se Abasi ọkọdọn̄de mmọ. Ndi emi ọwọrọ ke n̄wan Noah ikedịghe n̄kpọ ndomokiet ke enyịn Abasi? Iwọrọke.

Mme owo ẹwak ke Bible emi ẹketienede ẹsịn idem ẹnam n̄kpọ Jehovah Abasi, edi owo isiakke mmọ enyịn̄. Idịghe emeti ekpri n̄kaiferi Israel emi ekedide ofụn an̄wan Naaman. Kpa ye oro Naaman ekedide etubom ekọn̄ Syria, ekpri n̄kaiferi emi ama adaha uko uko eketịn̄ ọnọ n̄wan Naaman ete ke prọfet Jehovah ke Israel ekeme ndikọk Naaman akpamfia. Ikọ ekpri n̄kaiferi emi ama anam ata akwa utịben̄kpọ etịbe. (2 Ndidem 5:1-14) Adiaha Jephthah ama onyụn̄ anam akwa n̄kpọ. Enye ama enyịme nditre ndidọ ebe nnyụn̄ mman nditọ man ete esie ekpekeme ndisio se enye akakan̄ade ọnọ Abasi. Edi Bible isiakke enye m̀mê n̄kaiferi enye eken enyịn̄. (Judges 11:30-40) Nso kaban̄a mbon oro ẹkewetde se ibede Psalm 40 emi owo mîsiakke mmọ enyịn̄? Bible etịn̄ n̄ko aban̄a mme prọfet emi ẹkenyụn̄ ẹnamde ata ikpọ n̄kpọ edi isiakke mmọ enyịn̄.—1 Ndidem 20:37-43.

Enye emi akam akande kpukpru emi edi nti angel Abasi ke heaven. Mme angel emi ẹwak etieti, edi iba kpọt ke Bible asiak enyịn̄—oro edi, Gabriel ye Michael. (Daniel 7:10; Luke 1:19; Jude 9) Ete Samson ama obụp angel kiet ete: “Afo ekere didie, man nnyịn ikpokpono fi ke ini ikọ fo ediwọrọde osu?” Angel oro ọkọdọhọ enye ete: “Ntak emi okpobụpde mi enyịn̄ mi?” Angel oro ikamaha ndibọ ukpono emi ẹkpekponode Abasi.—Judges 13:17, 18.

Nnyịn idiọn̄ọke ntak emi Bible asiakde enyịn̄ ndusụk owo edi isiakke ndusụk. Edi imekeme ndikpep ekese nto mbon emi ẹkesịnde idem ẹnam n̄kpọ Abasi, ibeheke mmọ m̀mê ẹsiak mmọ enyịn̄ m̀mê owo isiakke.