Se Ẹkpenamde ke Ini Mbubehe Adade Mfịna Edi

Ke 1 Corinth 6:​1-8, apostle Paul ama etịn̄ n̄kpọ aban̄a eyenete ndikot eyenete ikpe. Ikenemke enye ndikop ke ndusụk mme Christian ke Corinth ẹkpenyene esịt ‘ẹkot kiet eken ikpe ke iso mme idiọkowo.’ (Ufan̄ikọ 1) Paul ama ọnọ nsio nsio ntak emi mme Christian ẹkpebierede utọk ke esop Abasi, utu ke ndikot kiet eken ikpe ke esop. Yak ise ndusụk ntak emi Abasi akanamde Paul ọnọ item oro, mbemiso ineme idaha ifan̄ oro mînen̄ekede isan̄a n̄kpọ ye item oro.

Edieke inyenede mfịna ke mbubehe oro inamde ye eyenete, akpana ibem iso iyom usụn̄ ibiere mfịna oro nte Jehovah ọdọhọde, idịghe nte nnyịn imade. (Mme N̄ke 14:12) Nte Jesus okowụtde, ọfọn isọsọp ibiere ndutan̄uyo mbemiso enye akabade akamba mfịna. (Matthew 5:​23-26) Edi ndusụk Christian ẹsinen̄ede ẹyat esịt tutu ẹmen utọ mfịna oro ẹka esop. Ọdiọk etieti. Paul ọkọdọhọ ete: “Emi ọwọrọ ke mbufo ẹmekpu ofụri ofụri ke emi mbufo ẹkotde kiet eken ikpe.” Nso ikanam enye ọdọhọ ntre? Akpan ntak kiet edi ke utọ ikpe oro ekeme ndibiat esop Abasi enyịn̄, onyụn̄ esuene Abasi emi nnyịn ikponode. Ntem, ọfọn inen̄ede ikere iban̄a mbụme oro Paul okobụpde ete: “Ntak emi mbufo mîkam iyakke ẹnam mbufo idiọk?”​—Ufan̄ikọ 7.

Paul ama ọdọhọ n̄ko ke Abasi anam eti ndutịm odu ke esop esie man ẹda ẹbiere ediwak mfịna. Mbiowo ẹdi irenowo emi ẹnyenede ọniọn̄ ke ntak ifiọk Ikọ Abasi, Paul okonyụn̄ ọdọhọ ke mmọ ‘ẹkeme ndibiere ikọ ke ufọt nditọete’ ke se iban̄ade “mme n̄kpọ uwem emi.” (Ufan̄ikọ 3-5) Jesus ama asiak n̄kpọ ita oro afo akpanamde man ebiere ikpọ mfịna, utọ nte edidọk ye n̄wo: akpa, domo ndibiere mfịna oro ke otu idem mbufo; ọyọhọ iba, edieke mûkemeke ndibiere mfịna oro ke akpa ini, da ntiense kiet m̀mê iba ka; ndien ọyọhọ ita, edieke mûsụk ukemeke ndibiere mfịna oro, men ndien bịne mbiowo esop.​—Matthew 18:​15-17.

Edi mbiowo idịghe mme ekpeibet m̀mê mme anam-mbubehe; idịghe mmọ ẹditeme mbufo se ibet oyomde m̀mê nte ẹkpenamde mbubehe mbufo. Mmọ inyeneke ibet idemmọ ndida mbiere mfịna mbubehe ke otu nditọete. Utu ke oro, mmọ ẹsidomo ndin̄wam iso ye edem ẹnam item N̄wed Abasi ẹnyụn̄ ẹbiere mfịna oro emem emem. Ọkpọsọn̄ akaha, mmọ ẹkeme ndineme ye esenyịn circuit mîdịghe ẹwet n̄kọk itieutom Mme Ntiense Jehovah. Edi odu mme idaha oro mînen̄ekede isan̄a n̄kpọ ye item Paul oro. Yak ineme ndusụk mmọ.

Ndusụk idaha, ẹsikot owo ikpe n̄kukụre sia ẹsinyụn̄ ẹnam ntre utọ n̄kpọ oro ama etịbe, mîdịghe mbak owo iditụk owo, man ebiere n̄kpọ emem emem, man ẹnọ owo unen esie. Ke uwụtn̄kpọ, ndikot owo ikpe ẹkeme ndidi n̄kukụre usụn̄ oro owo ekemede ndibọ n̄wed usiondọ, ndinyene unen ndise mban̄a eyen, ndibiere ibat okụk emi owo ẹdisinọde n̄wan m̀mê ebe esie ke ẹma ẹkedian̄ade ndọ, ndibọ okụk insurance, ndinam ẹsịn owo enyịn̄ man etiene ọbọ okụk mbubehe emi ọduọde, ye ndibọ udeme n̄kpọ akpa. Mme idaha ẹdu n̄ko oro eyenete ekemede ndikere ke oyom imọ itiene ikot owo ikpe mbak ẹdibiom imọ ikpe ke n̄kpọ emi imọ mîduehe.a

Edieke ẹkotde owo ikpe ke utọ n̄kpọ isụk ibatde mi, edi owo inamke ikọ ikọ, emi ituahake ye item oro Abasi akanamde Paul ọnọ do.b Kpa ye oro, se ikpebehede Christian ikan ekpedi ndinam enyịn̄ Jehovah asana, ndinyụn̄ nnam emem ye edidianakiet odu ke esop Abasi. Ata akpan n̄kpọ oro ẹdade ẹfiọk mme anditiene Christ edi ima oro mmọ ẹmade kiet eken, ndien “ima . . . iyomke ufọn idemesie.”​—1 Corinth 13:​4, 5; John 13:​34, 35.