Ẹnam Kpukpru N̄kpọ Ẹnọ Abasi Ubọn̄
1 Esidi inem n̄kpọ didie ntem ndibuana ye ndima nditọete nnyịn iren ye iban! (1 Cor. 16:17, 18) Nnyịn isinam emi ke mme mbonoesop, ke n̄kpri mbono, ke ikpọ mbono, ye ke an̄wautom. Nnyịn n̄ko imesibuana ọtọkiet ke mme edinam ofụri ini, utọ nte ke ini inyenede isenowo ke ufọk nnyịn. Ke ndinam ntre, nnyịn imesiwụt edu edikama isenowo inyụn̄ isịn udọn̄ inọ kiet eken. (Rome 12:13; 1 Pet. 4:9) Ke ini anamde ndutịm ọnọ usọrọ udian ndọ, nyene eti item odude ke Enyọn̄-Ukpeme eke October 15, 1984, ke ekikere.
2 Mme Ebuana Otuowo Oro Ẹtịmde-Tịm: Edide nnyịn ‘idia udia m̀mê in̄wọn̄ n̄kpọ m̀mê inam n̄kpọ ekededi,’ nnyịn ikpenyene ‘ndinam kpukpru nnọ Abasi ubọn̄.’ (1 Cor. 10:31-33) Ndusụk owo inamke item emi, ndien mme mfịna ẹkaiso ndidu ke ntak mme mboho otuowo oro ẹkponde ẹkaha ndidi se ẹsede ẹban̄a nte odotde, utọ nte ke mme itie edinam udian ndọ. Ke ndusụk idaha, ẹsinọ mme owo ke mme itie ikie ikot ẹdi akwa usọrọ emi ẹsịnde edinam unọ idem inemesịt ererimbot. Se isitịbede ke ndusụk ebiet edi nte ke esidemede ndusụk owo oro ẹbuanade ke idem ndinọ okụk ke ukpụhọ ye ibọn̄. Mme utọ mboho oro ẹnen̄ede ẹbiet mme edinam ererimbot, emi edu esie mîkemke ye eti ido uwem ye mme edumbet Bible.—Rome 13:13, 14; Eph. 5:15-20.
3 Ẹtọt ẹte ke akwa otu Mme Ntiense ẹma ẹsop idem ke itie oro ẹbọde ke ukpeokụk emi unọ idem inemesịt edide oburobụt ye eke ererimbot emi onyụn̄ ananade ukpeme. Ẹsinịm mme ukem edinam oro, ẹsuande etop ẹban̄a nte usọrọ ndọ ido obio eke “Ntiense Jehovah,” ke mme ufọkisen m̀mê ke mme itie unọ idem inemesịt. Ke ntak mfịna oro esidude ke ndise mban̄a utọ ikpọ otu oro nte odotde, mme mfịna ẹsidemede. Ndusụk ini emi esida okosịm ọkpọsọn̄ uyom, ebeubọk edin̄wọn̄ n̄kpọsọn̄ mmịn, ye idem oburobụt ido. (Eph. 5:3, 4) Mme mboho otuowo oro utọ eduuwem oro adade itie inọhọ Jehovah ukpono. Utu ke oro, mmọ ẹda esuene ẹsọk eti enyịn̄ esop ẹnyụn̄ ẹnam mmọ efen ẹtuak ukot ẹduọn̄ọ.—1 Cor. 10:23, 24, 29.
4 Ẹsịn udọn̄ ẹnọ mme Christian ndikama isenowo, edi ẹkpenyene ndiwụk ntịn̄enyịn ke ndinọ nsịnudọn̄ ke n̄kan̄ eke spirit. (Rome 1:11, 12) N̄kpri mboho otu ẹsiwak ndidi se ifọnde ikan. N̄wed Our Ministry ọdọhọ ke page 135-136 ete: “Ndusụk ini, ẹkeme ndikot ediwak ubon ufọk kaban̄a ebuana ọtọkiet Christian. . . . Nte enende, mbon oro ẹdide mme enyeneufọk ke mme utọ idaha ntre ẹkpenyene ndifiọk nte ke mmimọ imenyene mbiomo kaban̄a se idade itie do. Ye emi ke ekikere, mme enyene-ọniọn̄ Christian ẹkụt ọniọn̄ emi odude ke ndisụhọde ibatowo ẹmi ẹbuanade ke utọ otu oro ye uniọn̄ ini emi ẹnamde utọ edisop idem oro.” Jesus ama owụt ete ke owo iyomke akamba n̄kpọ ndomokiet ke ini utịtmbuba nnyịn edide ndisịn udọn̄ nnọ mme ufan ke n̄kan̄ eke spirit.—Luke 10:40-42.
5 Edi eti n̄kpọ ndiwụt mfọnido nnọ ekemmọ mme Christian. Edi, akwa ukpụhọde odu ke ukeuke edisop idem oro inamde ke ufọk nnyịn ye akamba edinam oro owụtde edu ererimbot ke itie edinam oro ẹbọde ke ukpeokụk. Ke ini afo okotde mme owo ẹdi isen ẹnọ fi, afo ekpenyene ndikụt ete ke emekeme ndise mban̄a se ikade iso ọyọhọ ọyọhọ.—Se Enyọn̄-Ukpeme eke August 15, 1992, page 17-20.
6 Ke akpanikọ, Jehovah amada otu nditọete oro nnyịn ikemede ndibọ inem inem nsịnudọn̄ oro ekemede ndinụk nnyịn ndika iso ke nti utom ọdiọn̄ nnyịn. (Matt. 5:16; 1 Pet. 2:12) Ke ndiwụt nsụhọdeidem ye eti ibuot ke mme edinam unọ idem inemesịt, nnyịn iyenọ Abasi ubọn̄ kpukpru ini inyụn̄ inam mmọ efen ẹkọri.—Rome 15:2.