Nam Utom Ofụri Ukpọn̄ ke Utom Ukwọrọikọ
1 Ndinam utom ukwọrọikọ ke ofụri ukpọn̄ ọkọn̄ọ ke ntotụn̄ọ esịtekọm oro inyenede inọ Jehovah ye kpukpru se enye anamde ọnọ nnyịn. (2 Sam. 22:2, 3) Edise nnanenyịn ofụri ubonowo oro adianarede ọkpọn̄ Abasi ye esịtmbọm ekpenyene ndinụk nnyịn ndisịn̄ede idem nnyịn ke an̄wautom. (Matt. 9:36; 2 Cor. 5:14, 15) Adan̄a nte nnyịn iyakde idem inọ Jehovah ye adan̄a nte nnyịn ikerede iban̄a mme owo, ntre ke edidemede nnyịn ke idem ndibuana ufiop ufiop ke an̄wautom. (Matt. 22:27-39) Do, utom nnyịn eyedi n̄kpọuto oro idade ke ọsọn̄urua n̄kpọ. (2 Cor. 4:7) Edi didie ke ẹkeme ndikọri utọ esịtekọm oro nnọ utom ukwọrọikọ?
2 Ukpọhọde Edikọri Esịtekọm: Ọkpọkpọ ukpepn̄kpọ Bible ye eke esop ọkọrọ ye editie n̄kere ke akam an̄wam nnyịn ndikọri ọkpọkpọ itie ebuana ye Jehovah. Nnyịn iyefiọk nti edu esie ye orụk owo emi enye edide inyụn̄ ikọri esịtekọm iban̄a nti edu emi ima ima Abasi nnyịn enyenede ye mme ndutịm esie kaban̄a utuakibuot akpanikọ. (Ps. 27:4) Ke ini nnyịn ikpepde iban̄a ubọn̄ ubọn̄ akwa uku Jehovah ye mme utịbe utom esie, onụk nnyịn nditan̄a ubom esie ndien nnyịn iyom usụn̄ ndisuan etop Obio Ubọn̄ ifịk ifịk. (Ps. 145:5-7; Luke 6:45) N̄ko-n̄ko, editịn̄ enyịn ndụn̄ọde nnyụn̄ ntie n̄kere mban̄a mme asan̄autom Abasi eken ẹdide mme anamutom ofụri ukpọn̄ ekeme ndinam esịtekọm nnyịn ọkọri. Mme utọ uwụtn̄kpọ oro ẹsịne Jeremiah, Jesus, ye apostle Paul.—Jer. 20:9; John 4:34; 1 Tim. 1:12, 13, 17.
3 Ntịmidem Edemede Nduaidem: Utom ofụri ukpọn̄ nnyịn oyom inyene nduaidem. Man inyene emi, ntịmidem edi akpan n̄kpọ. Emi edi koro ntịmidem esidemede nduaidem. Edi mmemmem n̄kpọ ndikop nduaidem mban̄a edinam oro nnyịn imade ndien ke ofụri ofụri owo esidara ndinam n̄kpọ oro enye ama okotịm idem. Didie ndien ke nnyịn ikeme nditịm idem ifịk ifịk nnọ utom ukwọrọikọ man otodo nnyịn ikeme ndidi mme anamutom oro inyenede usọ inyụn̄ inyenede idara idara utịp oro ọnọde uyụhọ?—John 2:17.
4 Ọfọn ndibiat ndusụk ini ndụn̄ọde mme akpan n̄kpọ ndida nnyene nneme ke n̄wed oro ẹdinọde. Nam ndomonse. Ndinam emi ọtọkiet nte ubon ekeme ndidi n̄kpọ un̄wam. N̄wed Reasoning edi ata eti n̄kpọutom ndida ntịm idem nnọ utom ukwọrọikọ. Ke uwụtn̄kpọ, edieke owo oro nnyịn isobode ke utom eke ufọk ke ufọk ọdọhọde ke imọ idi Muslim, nso ke nnyịn ikpetịn̄? Asuanetop oro ama okotịm idem mfọn mfọn ekeme ndidọhọ: “Oro edi inem n̄kpọ. Mma n̄kot n̄kpọ mban̄a ndusụk ke otu mme ukpepn̄kpọ ido ukpono fo ke ekpri n̄wed emi. [Kụbọde ka page 23 ke n̄wed Reasoning.] Enye ọdọhọ ete ke mbufo ẹnịm ke akpanikọ ẹte ke Jesus ekedi prọfet edi nte ke Muḥammad ekedi akpatre ye ata akpan prọfet. Nte idịghe ntre? [Bet ibọrọ.] Nte afo omonịm ke akpanikọ n̄ko ete ke Moses ekedi prọfet akpanikọ? [Bet ibọrọ, ndusụk enye eyenyịme ke edi ntre.] Nte mmekeme ndiwụt fi se Moses ekekpepde oto Abasi ye san̄asan̄a enyịn̄ Esie ke Edisana Uwetn̄kpọ?” Do afo emekeme ndikot Exodus 6:3. Ke usụn̄ emi, afo emekeme nditọn̄ọ inem inem nneme.
5 Ye esisịt ntịmidem ye ndomonse, nnyịn imekeme ndida ikpehe oro ẹkotde “Conversation Stoppers” (Mme Ikọ Utre Nneme) emi odude ke n̄kan̄ ntọn̄ọ ntọn̄ọ n̄wed Reasoning man an̄wam nnyịn ndineme nneme ye mme owo oro ẹdọhọde ke idi mme andibuana ke orụk ido ukpono kiet.
6 N̄wed Reasoning enyene ikpehe oro ọfọnde n̄ko ke n̄kan̄ ntọn̄ọikọ. Ekeme ndiyom nnyịn ikpụhọde nneme nnyịn ekekem ye idaha. Ke utịt utịt ekese ibuotikọ ke n̄wed Reasoning, ikpehe emi “If Someone Says” (Edieke Owo Ọdọhọde) odu, emi ọnọde nnennen n̄kpọ ndibọrọ mme akpan mbụme m̀mê mme mfan̄a oro ẹnyenede ebuana ye ibuotikọ oro. Nte ededi, kpukpru nti n̄kpọ ẹmi ẹnyene ufọn n̄kukụre ke udomo oro nnyịn idade enye inam n̄kpọ ke ntịmidem nnyịn.
7 N̄wam Mbon En̄wen Ẹnam N̄kọri: Nnyịn ndinam n̄kpọ ke ofụri ukpọn̄ ke utom ukwọrọikọ oyom nnyịn itịp n̄kpọ isịn ke n̄kọri mbon efen. Nnyịn ikeme ndinam emi ebe ke ndinọ mbon efen un̄wam ye ukpep oro oyomde. Itie ebuana oro okodude ke ufọt akani eyenete oro Paul ye enyene-ifịk akparawa Timothy ọnọ eti uwụtn̄kpọ ke ndinọ ukpep ke utom ukwọrọikọ. (1 Cor. 4:17; 2 Tim. 2:1) Ke esịt esop mfịn, ediyom oro oyomde ẹnọ ukpep ana in̄wan̄în̄wan̄ ke ini nnyịn ifiọkde ite ke mme asuanetop ẹdude idahaemi ẹda n̄kpọ nte owo 40,000 ẹwak ẹkan nte ekedide ke isua ita ẹmi ẹkebede. Anaedi ata ediwak ke otu ẹmi ẹyebọ ufọn ẹto ukpep oro mme asuanetop ẹmi ẹnyenede ifiọk ẹkemede ndinọ. Eyenete an̄wan kiet oro ekesibiatde hour kiet m̀mê iba kpọt ke ọfiọn̄ ke utom ukwọrọikọ ama ekpep nditịn̄ ikọ uforo uforo ke enyịnusụn̄ mme owo ke ini asuanetop oro enyenede ifiọk ọkọnọde enye un̄wam. Akpa umiọn̄ oro enye ekesikopde ndibuana ke utom ukwọrọikọ ama okụre usọp usọp, ndien enye ama akabade edi enyene-ifịk asuanetop eti mbụk. Idahaemi nte asiakusụn̄ oro enyenede uforo, enye eti ini edem onyụn̄ ọdọhọ ete: “Ofụri se n̄koyomde ekedi ndikpep mi se nditịn̄de, ndien ekem mma ntọn̄ọ ndikop inem utom ukwọrọikọ.”
8 Edieke afo edide ebiowo, asan̄autom unamutom, asiakusụn̄, m̀mê asuanetop oro enyenede ifiọk, didie ke afo ekeme nditịp n̄kpọ nsịn ke n̄kọri mbon en̄wen? Akpa usio-ukot edidi afo ndisian ada Ukpepn̄kpọ N̄wedesop mbufo nte ke imọ ikpama ndin̄wam asuanetop efen. Edi oyom afo anam ndutịm onyụn̄ otịm idem. Nam ndutịm oro enyenede iwụk ndisan̄a kiet. Nsan̄a fo ekeme ndinyek idem m̀mê ndikop ndịk mban̄a unana ukeme esie ke ntọn̄ọ ntọn̄ọ, edi enye eyekop inemesịt nte ke owo ke asan̄a ye imọ man an̄wam imọ edieke oyomde.—Eccl. 4:9.
9 Ke ini edinọ ukpep nsịtnsịt emi, neme ye asuanetop oro mîtịmke inyene ifiọk mi ban̄a nte ẹkpenamde mfiakn̄ka ke ebiet oro ẹkekụtde udọn̄. Oro esịne edisịn itiat idakisọn̄ ke akpa ediwaha ebe ke ndibụp enyeneufọk mbụme oro edibọrọde ke ini afiakde awaha. Kụt ete amanam asuanetop oro mînen̄ekede inyene ifiọk mi otịm idem, ndien ekem asan̄a ye enye ke mfiakn̄ka oro. Edieke ẹtọn̄ọde ukpepn̄kpọ ndien asuanetop oro osụk okopde ndịk nte ke imọ inyeneke ukeme, asuanetop oro enyenede ifiọk mi ekeme ndiyom ndinịm ukpepn̄kpọ oro ke ndusụk ini tutu obufa owo emi odot ndibọ ukpepn̄kpọ oro nnịm.
10 Mme Ndutịm ye Mme Utịtmbuba: Utom ukwọrọikọ nnyịn idịghe se inamde ke mbuari m̀mê ndidi usụhọde n̄kpọ ke uwem nnyịn. Man inam ndutịm uforo uforo inọ utom ukwọrọikọ nnyịn, ana nnyịn isio ini inịm inọ nsio nsio ikpehe esie inyụn̄ ibetke tutu inyene ufan̄. (Eph. 5:15, 16) Edi se ifọnde ndinịm utịtmbuba kaban̄a ibat hour oro afo edibiatde ke utom ukwọrọikọ ke ọfiọn̄ kiet kiet. Emi eyeyom otịm mme mbubehe fo ekekem ye ndutịm oro odiomide. Mme ete ye eka oro ẹdide Christian ẹkpenyene ndin̄wam nditọ mmọ man ẹnam ndutịm ẹnọ edibuana kpukpru ini ke nsio nsio ikpehe utom ukwọrọikọ nnyịn.—Deut. 6:7; N̄ke 22:6.
11 Ke uwụtn̄kpọ, nte afo emenyene tract oro awakde ekem? Nte afo emenyene mme magazine eke ndondo emi awak ekem, ndien nte mmọ ẹdu ke eti idaha? Nte afo emesida n̄wetnnịm n̄kpọ eke ufọk ke ufọk anam n̄kpọ ke eti usụn̄, adade kiet ndiwet udọn̄ oro okụtde onyụn̄ adade efen ewet mbon oro mîdụhe ke ufọk?
12 Oyom San̄asan̄a Ukeme: Udomo oro afo adarade mme ufọn oro Abasi ọnọde ọkọn̄ọ akamba akamba ke ukeme oro afo esịnde ke idemfo ndinam uduak Abasi. Kaban̄a utom ukwọrọikọ, Paul ekewet ete: “[Owo] kiet kiet ẹyenyụn̄ ẹbọ utịp mmọ, nte ekemde ye utom mmọ.” (1 Cor. 3:8) Ẹyak nnyịn ke ntre inyene ọyọhọ ebuana ke utom ukwọrọikọ nte ikekeme. Apostle Paul ama ọbọ ọkpọkpọ utịp ke ndin̄wam ediwak owo, idem ofụri esop, ẹdifiọk Abasi. Nso idatesịt ke enye ekenyene ntem ndikụt nte mmọ ẹsọn̄ọde ẹda ke mbuọtidem! (1 Thess. 2:19, 20) Ekeme ndidi idaha fo idiyakke fi esịn idem ke utom ukwọrọikọ nte Paul ekesịnde. Edi, nte ididịghe akwa edidiọn̄ ndin̄wam owo m̀mê idem ubon mbieterọn̄ kiet enyene iwụk ke usụn̄ oro adade osịm uwem? Nso n̄kpọ nsịnudọn̄ ke edi ntem ndinam utom ọkpọsọn̄ ke utom ukwọrọikọ eke ufọk ke ufọk nnyụn̄ nnam mme mfiakn̄ka nnyụn̄ nnịm mme ukpepn̄kpọ Bible!
13 Mme Ufọn Efen Efen: Ọsọn̄urua ufọn eke edinam utom ke ofụri ukpọn̄ edi nte ke, nte ekemmọ anamutom, enye eyedụri owo enen̄ede ekpere Jehovah ye Jesus Christ. (Matt. 11:29, 30; 1 Cor. 3:9) Nso idatesịt idu ntem ke ndikụt nte spirit Abasi an̄wamde fi ke utom ukwọrọikọ! (Matt. 10:20; John 14:26) N̄ko-n̄ko, ndinam utom ifịk ifịk ye mbon en̄wen ke esop ọsọn̄ọ mbọbọ ima ye edidianakiet nnyịn.
14 Nnyịn ikemeke ndidara ofụri edidiọn̄ ẹtode Jehovah ibọhọke nnyịn inọ esop oro enye adade anam uduak esie ke ukperedem ini emi ọyọhọ ibetedem. (Men 2 Ndidem 10:15 domo.) Ke ini nnyịn itịn̄de enyịn ke ofụri esịt itiene ndausụn̄ oro nnyịn ibọde ito usụn̄ oro Abasi adade anam n̄kpọ inyụn̄ isịnde idem ifịk ifịk ke mme edinam esop, ẹkpeme nnyịn ke n̄kan̄ eke spirit ẹsio ke mme n̄kari n̄kari edinam Satan. Ẹn̄wam nnyịn ndibuana ọyọhọ ọyọhọ ke usụn̄ oro on̄wụmde mfri ke utom ukwọrọikọ.
15 Jehovah oyom nnyịn ibọ ufọn ebe ke ndikop uyo nnọ enye. (Isa. 48:17) N̄ko-n̄ko, mme ufọn utom ofụri ukpọn̄ atara osịm mbon oro ẹkpan̄de utọn̄ ẹnọ fi. (1 Tim. 4:15, 16) Afo emekeme ndinyene mbuọtidem nte ke adan̄a nte afo esịnde idem ifịk ifịk ndinam utom emi anade ẹnam, Jehovah eyekụt emi ndien ‘afo ọyọbọ Ọbọn̄ udeme nte utịp fo,’ kpa nsinsi uwem.—Col. 3:23, 24.