Da Mmọn̄ Akpanikọ Sụk Mme Iman Fo Itọn̄
“NTE mbịtmbịt mmọn̄ etiede ye itọn̄ eke asatde, kpa ntre ke eti uyo eke otode anyan idụt etie,” ntre ke Solomon ọkọdọhọ. (Mme N̄ke 25:25) Nso nduaidem nduaidem ifiọk n̄kpọntịbe ke emi edi ntem ọnọ ukpọn̄ eke akpade mba ndikpan̄ utọn̄ n̄kop nte afo ọnọde eti ntọt aban̄ade nsinsi uwem ke Paradise oro edide! Ke usụn̄ emi, inua fo akabade edi “idịm uwem.”—Mme N̄ke 10:11; Isaiah 52:7.
Mmọn̄ esibịt isọn̄ onyụn̄ anam n̄kpọ ọkọri, ke adan̄aemi ukwọ mmọn̄ ekemede ndikama nsobo. N̄ko, mbịtmbịt mmọn̄ oro ẹn̄wọn̄de esibịt owo idem, edi anie akpama ọkpọsọn̄ mbịtmbịt oyobio m̀mê edịm itiat osịm enye ke usụn̄? Sia ẹdade se iwọrọde nnyịn ke inua ẹdomo ye mmọn̄, oyom inọ ntịn̄enyịn ket-ket ke ukpepn̄kpọ nnyịn. (1 Timothy 4:16) Ana nnyịn inyene udọn̄ akpan akpan iban̄a nsio nsio utịp otode “mmọn̄” emi ke ini ikwọrọde ikọ inọ mme iman.
‘Ndinọ Mme Iman Mmọn̄’
Ke ini edem, Rahab ama eberede usụn̄ edinyan̄a ọnọ ubon mmọ, ndien Cornelius ama ọnọ ikọ ntiense ke iso mme iman esie. (Joshua 2:13; 6:23; Utom 10:24, 30-33) Andrew, ama an̄wam Peter, eyeneka esie ndikabade ndi mbet.Jesus. (John 1:40-42) Ndien mfịn ediwak Mme Ntiense Jehovah ẹsitịn̄ akpanikọ Bible ẹnọ mme iman mmọ. Mme N̄ke 11:25 ọn̄wọn̄ọ ete: “Edi andinọ mmọn̄ edikụt mmọn̄.”
N̄wan kiet ke Europe ama enyene udọn̄ ndibuana obufa mbuọtidem esie ye ete ye eka, nditọeka esie iren, ye nditọeka esie iban ẹmi ẹdụn̄de ke Philippines. Enye ọtọt ete: “Ami mma nnam ntre ke kpukpru leta ẹmi n̄kewetde nnọ ẹsọk mmọ. Mbemiso nnade baptism, ami n̄ko mma nnọ mme n̄wed ẹsọk mmọ nnyụn̄ mbụp m̀mê mmọ ẹkpema Mme Ntiense Jehovah ẹsobo ye mmọ.” Ke edide akwa idara ọnọ enye, mmọ ẹma ẹnyịme ẹsobo ye mmimọ, ndien idahaemi owo itiaita ke otu mmọ ke ẹtuak ibuot ẹnọ Jehovah. Ndusụk Mme Ntiense ẹma ẹnyene nti utịp ke ndinọ mme etịbe Enyọn̄-Ukpeme ye Awake! ke mfọn ẹsọk mme iman mmọ.
Edi nso edieke mme andibuana ke ubon mîwụtke udọn̄? Jesus ama osobo mbiet idaha emi, koro ke ini kiet “nditọeka Esie [ikọ]buọtke idem ye Enye.” Ke ukperedem, nte ededi, mmọ ẹma ẹda “esịt kiet” ẹdọdiọn̄ ẹyịre ke akam, ọkọrọ ye mme apostle. (John 7:5; Utom 1:14) Ntak ukpụhọde esịt emi-e? Jesus nte an̄wan̄ade ama ọnọ mme iman esie un̄wam mbemiso ọdọkde ke heaven. Didie ke akanam emi? Enye ama an̄wam mmọ ndinyene mbuọtidem ke ndiwụt James eyeneka esie idem. (1 Corinth 15:7) Ntem, kûtre ndidomo ndin̄wam mme iman fo. Ediwak Ntiense ẹma ẹkeme ndineme akpanikọ Bible ye mme iman mmọ oro mînịmke ke akpanikọ ke ẹma ẹkebet ye ime eti ifet ndiberede.
‘Ndinọ mme iman mmọn̄,’ nte ededi, iwọrọke ndin̄wan̄a ikọ mfụk mmọ. N̄wan ye ebe ẹmi ẹtode Yugoslavia ẹtịn̄ ẹte: “N̄kpọndịk odu kpukpru ini ke ndikwọrọ ikọ nnọ mmọ n̄kaha.” Esenyịn emi asan̄ade-san̄a ọdọhọ ete: “Nditọete ẹsiwak ndinam enye mbe ubọk, ẹwụtde ifịk ke idiọk usụn̄.” Ludwig eti se ikotịbede ke ini enye ọkọtọn̄ọde ndikpep Bible ete: “Ami ndien mma nsida ediwak hour ntịn̄ se ikperede ndidi ofụri n̄kpọ oro n̄kekpepde nto Bible ye unana nduọkodudu nnọ eka mi, ndien emi ekesiwak ndisụn̄ọ ke eneni, akpan akpan ye ete mi.”
Di ‘Obube Mmọn̄ Ifiọk’
Nnyịn ikot ite ke “edeme enyene-ibuot owo anam ifiọk ọfọn: edi inua mbon ndisịme an̄wan̄a ebiọ,” ndien “esịt eti owo otịm ekere ndibọrọ.” (Mme N̄ke 15:2, 28) Eti ekikere, ifiọk, ye mbufiọk ẹdi se iyomde man inam ikọ nnyịn ẹdi se isụkde owo itọn̄ inyụn̄ ibọpde-bọp. Ini, se itịn̄de, ye adan̄a ediwak ikọ oro nnyịn itịn̄de ẹdi akpan n̄kpọ.
Ke usen oro eyo ayatde, ke uwụtn̄kpọ, cup mbịtmbịt mmọn̄ edi n̄kpọ ubịtidem didie ntem ọnọ owo oro itọn̄ asatde! (Matthew 10:42) Edi idụhe owo ndomokiet oro akpaduakde ndin̄wan̄a ọyọhọ bọket mmọn̄ nduọk ke ibuot esie! Esenyịn circuit oro ẹsiakde ke enyọn̄ emi ọdọhọ ete: “Edi mbon oro ẹdemerede udọn̄ mme iman mmọ ke ndinọ ikọ ntiense ke usụn̄ oro enyenede-nyene udomo ẹsinyene nti utịp.” Ke ini itọn̄ asatde iman emi esitiede ubiọn̄ọ ubiọn̄ọ, yak idọhọ ntre, ndien ke ọtọn̄ọde ndibụp mme mbụme, nneme a-Bible ẹmi on̄wụmde mfri esiwak nditiene.
Huriye, Ntiense edide owo Turkey, ama enyene utịp emi ke ufọk ke ndikụbọde ibuotikọ ẹmi ẹdidemerede udọn̄ ebe esie emi mîdịghe andinịm ke akpanikọ, ke mme n̄wed ukpep Bible, nnịm. N̄wan emi ama esikot mme mbụk Bible ọnọ nditọ, ndien—edieke eren emi osụk akpan̄de utọn̄—enye esinam n̄kpọ ẹmi an̄wan̄a ke usụn̄ oro edidade ufọn ọsọk eren emi. Ndusụk ini n̄wan emi ama esibụp ete: “Ami n̄kekpep ntem ye ntem ke ukpepn̄kpọ mi mfịn. Nso ke afo ekere aban̄a oro?” Enye n̄ko etịn̄ aban̄a mme ido uwem oro enye ekenyenede ke ekikere ete: “Tie sụn̄sụn̄, kûtie utọk utọk m̀mê ndiyat esịt. Kûdi andidiọn̄ọ kpukpru n̄kpọ. Edi kam sụhọde idem nyụn̄ sụk ibuot.” Ebe esie ke akpatre ama onyịme akpanikọ Obio Ubọn̄ ndien idahaemi anam utom nte asan̄autom uyọhọ-ini.
Marijan ama an̄wam ediwak iman esie ndinyịme se enye onịmde ke akpanikọ. Enye ọnọ item ete: “Kûnam n̄kpọ ke odudu edi bet eti ifet ndiberede. Akpana nnyịn iwụt ukpono ke ini mmọ ẹdọhọde yak nnyịn ikûneme akpanikọ ye mmọ. Ana nnyịn inyene ime inyụn̄ iwụt ima. Ecclesiastes 3:7 enyene ufọn akpan akpan ke ini mme iman ẹtiede ubiọn̄ọ ubiọn̄ọ. Enye ọdọhọ ete ke odu “ini eke ẹdopde, ye ini eke ẹtịn̄de ikọ.” Oro ọnọ ekikere ndinyịme ndikpan̄ utọn̄ ye ime, idịghe ndisịbe ndụk, ndinyụn̄ n̄kpono mme ekikere mbon en̄wen. “Ufọn idụhe nditie iyatesịt iyatesịt ke ini inyenede nneme ye mme iman,” ntre ke Peter ọdọhọ, emi ini kiet ekedide ata andibiọn̄ọ edi emi okokpụhọrede idaha esie.
Yak Eti Edu Ọkwọrọ Ikọ
Ke ediwak isua ebe kiet oro mînịmke ke akpanikọ ama anam ikọ ye Christian an̄wan esie, ke ndusụk ini ọkọbide usụn̄ abaha enye ke an̄wa. Inikiet enye ama enen̄ede ayat esịt tutu eyedi se enye awakde n̄wed an̄wan emi, oro enye ekefrede nditịm nnịm. Nso ikokpụhọde edu esie? Eren emi anam an̄wan̄a ete: “Ami mma n̄kaiso ndibụp idemmi ntak emi n̄wan mi okosụk ọsọn̄ọde ada ntre onyụn̄ ọbuọtde idem ye Jehovah. Ami n̄kekemeke ndikụt ndudue nnọ enye, sia enye okonịmde ufọk eye, ndien enye ekedi eti n̄wanndọ ye eka ọnọ nditọ nnyịn.” Usen kiet ebe esie ke okoyom nti ibuotikọ oro enye edinemede ke minit ition ke mbono mme anam ndụn̄ọde, ntre n̄wan esie ama ọnọ enye nsiondi Awake! iba. Enye ama otop enyịn mmen̄e mmen̄e ese mmọ, ndien ke n̄kpaidem esie enye ama okụt ibuotikọ kiet oro enyenede ufọn, emi eketịn̄de aban̄a nte ẹbotde benetap. Ke usụn̄ emi udọn̄ esie ke magazine ẹmi ama edemede. Mfịn, ubon emi ẹmediana kiet ke ndituak ibuot nnọ Jehovah.
Item apostle Peter nte ke n̄wan ekeme ndidụri ebe oro mînịmke ke akpanikọ nda ‘itoho ke ikọ edi oto ke edisana ido ye ntotụn̄ọ ukpono’ abuana n̄ko mme andibuana eken ke ubon. (1 Peter 3:1, 2) Ke ini mme ọdọ-ndọ ẹkekpọn̄de akani ido edinam oro mîkemke ye Bible ye ido ukpono ete ye eka mmọ ẹmi ẹdide mbon Romania, ubon mmọ ẹma ẹkọbọ mmọ ikan̄ ikan̄. Ekaebe emi okodomode ndiwot n̄wan emi, ama esikam otịbe utọk ye enye. Nikolic obụk ete, “Nnyịn ikayakke emi anam idem emem nnyịn m̀mê ayat nnyịn esịt. Nnyịn ima itop kpukpru editịmede esịt nnyịn idori Jehovah.” Isua duopekiet ke oro ebede, ete ye eka esie, nditọeka esie iban, ye mme ebe nditọeka esie ẹdidi Mme Ntiense oro ẹnade baptism. Nso ikanam ẹkụt unen emi? “Eti uwụtn̄kpọ ye edu Christian. Ke ikọ efen, nnyịn ikabiatke ekese ini nditịn̄ ikọ ye mmọ mban̄a akpanikọ. Utu ke oro, nnyịn ima idomo ndida enye nsịn ke edinam.”
Kûduọk Idotenyịn!
Ke adan̄aemi edide n̄kpọ akwa idara ndikụt nte mme iman ẹtọn̄ọde ndituak ibuot nnọ Abasi akpanikọ, nso edieke ndusụk ẹkade iso ndibiọn̄ọ? Didie ke afo edinam n̄kpọ? Jesus ama ebemiso ada okụt nte ke utuakibuot akpanikọ eyeda akwa ubahade edi ke otu mme iman nte ini akade. (Matthew 10:34-37) Kpukpru mme andibuana ke ubon ẹma ẹsọn Marica ke ini enye akakabarede edi kiet ke otu Mme Ntiense Jehovah. Ke adan̄aemi enye mîkakan̄ke utuakibuot esie, kpa ye oro enye ama ọdiọn̄ọ “ete ke idem mme iman esie ẹnyene unen ndinọ mme ekikere ye uduak mmọ.” Edu esie ama onụk mmọ ndikpono enye nte mmọ ẹkekponode ke mbemiso.
Ludwig ama ọdiọn̄ọ ete ke obiomo imọ ndima ete ye eka imọ idem okposụkedi oro mmọ ẹkpemekde isio isio usụn̄uwem. Enye ndien ndien ama esiti udọn̄ikọ Bible ẹmi ẹnyenede ebuana ye edinam emi, utọ nte: “Kpono usọ ye uka”; “ẹyak nneme mbufo ẹnyene inem ke esịt kpukpru ini, nte ẹsịnde inụn̄ ke esịt”; “ẹben̄e idem ndibọrọ . . . ke sụn̄sụn̄ ido ye ke ido uten̄e”; ye, “owo Ọbọn̄ inyeneke ndidi owo utọk.” (Ephesus 6:2; Colossae 4:6; 1 Peter 3:15; 2 Timothy 2:24) Enye obụk ete, “Ini kiet ekededi oro nnọde ete ye eka mi ikot ke urụk ukopikọ m̀mê n̄kade n̄kese mmọ, ami mma nsibọn̄ akam nnọ Jehovah mben̄e ifiọk, ndien sụn̄sụn̄ itie ebuana nnyịn ama akabade etie ifụre ifụre, onyụn̄ etie ufan ufan akan.”
Kûduọk idotenyịn nte ke n̄kpasịp akpanikọ ẹyekọri ke esịt mme iman fo ke akpatre. Ebe kiet emi anade baptism nte kiet ke otu Mme Ntiense Jehovah, ke n̄wan esie ama akanana baptism ke isua 31 mbemiso enye, ọdọhọ ete: “Ke ndikere mfiak edem, ana nnyịme nte ke n̄wan mi ama enyene ekese ime ye ami. Ami mma nnen̄ede mfiọk nte ke enye ama esibọn̄ akam ọnọ Jehovah ke ibuot mi.”
Mme ikọ oro ẹwọrọde fi ke inua kpukpru ini ẹkpekam ẹtie nte mbịtmbịt mmọn̄ oro ọnọde uwem onyụn̄ osụkde nsatitọn̄! Ih, buana ‘ubọn̄ ubọn̄ eti mbụk Abasi idatesịt’ ye kpukpru owo, esịnede mme iman fo. (1 Timothy 1:11; Ediyarade 22:17) Do ikọ Jesus eyesu: “Owo eke ọbuọtde idem ye Ami, nte N̄wed Abasi ọdọhọde, akpa odu-uwem mmọn̄ eyeto enye ke idem ọwọrọ”—John 7:38.